Әстәр 2
[1] Пәй ван йәкарʼа, гава һерса Аһʼашwерош пʼадша дани, әwи Wаштʼи ханьм, кьре wе у qьрара хwә бир ани.
[2] Хӧламед пʼадшейә бәрдәсти готьн: «Бьра бона пʼадше qизед щаһьлә бькʼьр у бәрбьчʼәʼв бенә дәстхьстьне.
[3] Пʼадша бьра ль нава qәзайед пʼадшатийа хwәда сәрwера кʼьфш кә, кӧ һʼәму qизед щаһьлә бькʼьр у бәрбьчʼәʼв тʼопи мала кʼӧлфәтайә ль Суса qәсьрда кьн, бьн сәʼвитийа Һегайе нәмере пʼадше у щабдаре кʼӧлфәт, wанрʼа тьштед бона шуштьн вәшуштьне бенә дайин.
[4] Һьнге кʼижан qиза кӧ пʼадша бәгәм кә, бьра әw бьбә ханьма пʼадше, дәwса Wаштʼи ханьме». Әв готьна ль пʼадше хwәш һат у ӧса жи кьр.
[5] Ль Суса qәсьрда мәрьвәки щьһу дьма, наве wи Мордокʼай бу, кӧрʼе Йаире, Шимийе, Кисе жь бәрәка Бьнйаминийа.
[6] Әва жь Оршәлиме тʼәви wан һесир һатьбу анине, кʼижан кӧ Нәбукәднәсәр пʼадше Бабилоне, тʼәви Йәхонийа пʼадше Щьһуда һесир анибун.
[7] Әви qизапа хwә Һадаса хwәй дькьр, кӧ дьготьне Әстәр, чьмки нә баве wе һәбу нә жи дийа wе. Әw qизькә бәдәw у бәжьн баледа хасә хәwан бу, пәй мьрьна де у баве wерʼа Мордокʼай әw чаwа qиз жь хwәрʼа хwәй дькьр.
[8] У гава сальхе qьрара пʼадше һатә бьһистьне у ль Суса qәсьрда гәләк qиз щьвийанә бьн сәʼвитийа Һегай. Һьнге Әстәр жи мала пʼадшеда һатә qәбулкьрьне, бьн сәʼвитийа Һегай бәрпьрсийаре жьна.
[9] Һегай qизьк бәгәм кьр у әwе ль бәр wи кʼәрәм дит у әwи перʼа перʼа һәр тьштед пʼара wейә шуштьн вәшуштьне хwарьнева, ӧса жи һʼәфт qизед щарийә мала пʼадшеда, кʼижан кӧ wерʼа дькʼәтьн данә wе у әw тʼәви wан щарийа щигӧһастә мала кʼӧлфәтайә щийе һәри qәнщ.
[10] Әстәре мьләт у рʼькʼьнйата хwә әʼйан нәкьр, чьмки Мордокʼай тʼәми дабу wе, кӧ әʼйан нәкә.
[11] Мордокʼай һәр рʼож дора мала кʼӧлфәта дьчу дьһат, wәки һаш жь сьһʼәт qәwат у һʼал һʼәwале Әстәре һәбә.
[12] Гава wәʼде һәр qизе дьһат кӧ әw бькʼәта щәм Аһʼашwерош пʼадша, гәрәке әw әʼдәте донздәһ мәһед кʼӧлфәт һазьрбунерʼа дәрбаз буйа, шәш мәһа бь рʼуне зьмьре у шәш мәһа жи бь рʼуне бинхwәш бьһата мәлһʼәмкьрьне у ӧса жи бь ду дәрманед майин,
[13] qизьк һьнге дькʼәтә щәм пʼадше, чь кӧ дьле wе дьхwәст, wерʼа дьһатә дайине, бона кӧ тʼәви хwә жь мала кʼӧлфәт бьбьра мала пʼадше.
[14] Еваре әwа дьчу щәм пʼадше сьбәһе зу вәдьгәрʼийа маләкә кʼӧлфәтайә майин, бьн сәʼвитийа бәрпьрсийаре кʼӧлфәта, Шаһашьгазе нәмере пʼадше. Әwа иди нәдьчу щәм пʼадше, һʼәта кӧ тәме пʼадше нәкʼьшандайе у бь наве wе гази wе нәкьра.
[15] Гава wәхте Әстәра qиза Абихайиле апе Мордокʼай перʼа гьһишт кӧ һәрʼә щәм пʼадше, йа кӧ Мордокʼай чаwа qиз хwәрʼа хwәй кьрьбу, әwа сәр готьна бәрпьрсийаре кʼӧлфәта Һегайе нәмере пʼадшерʼа дәрбаз нәбу, тьштәки башqә нәхwәст. Әстәре ль бәр wан һʼәмуйед кӧ әw дьдитьн кʼәрәм дит.
[16] Әстәр мәһа дәһа, аwа готи мәһа Тебетʼе кʼәтә щәм Аһʼашwерош пʼадша, һʼәфтсалийа пʼадшатийа wида ль мала пʼадшеда һатә qәбулкьрьне.
[17] Пʼадше Әстәр жь һʼәму кʼӧлфәтед хwә зәʼфтьр бәгәм кьр у әwе ль бәр wи жь һʼәму qиза зәʼфтьр һʼьзкьрьн у кʼәрәм дит у әwи тʼаще пʼадшатийе дани сәре wе, дәwса Wаштʼийе кьрә ханьм.
[18] Пʼадше мәсрәфәкә мәзьн бона хатьре Әстәре wәзир wәкʼил у хӧламед хwәрʼа дани, ӧса жи баре сәр qәза сьвьк кьр у wәкә мәрʼданийа пʼадше хәлат пʼешкеш дан.
[19] Гава щара дӧда qиз щьвандьн, Мордокʼай ль бәр дәре пʼадше рʼуньштьбу .
[20] Әстәре һе мьләт у рʼькʼьнйата хwә әʼйан нәкьр бу, чаwа кӧ Мордокʼай тʼәми дабуйе. Чьмки Әстәре һе ӧса гӧһдарийа Мордокʼай дькьр, чаwа кӧ һена бьн сәʼвитийа wида.
[21] Wан рʼожада гава Мордокʼай ль бәр дәре пʼадше рʼудьньшт, дӧ дәргәһван, Бигтʼан у Тʼәрәш, нәмеред пʼадше гәф ль пʼадше хwарьн у фькьрин кӧ дәсте хwә ль сәр Аһʼашwерош пʼадша бьльнд кьн.
[22] Мордокʼай кӧ ве йәке һʼәсийа, гиһандә гӧһе Әстәр ханьме, Әстәре жи әв йәк бь наве Мордокʼай пʼадшерʼа гьли кьр.
[23] Әв дәнг һатә леньһерʼандьне рʼаст дәркʼәт у һәр дӧ дәргәһван жи һатьнә дархьстьне. У Бона ве qәнщийа Мордокʼай кʼьтеба биранина сәрһатийада ль бәр пʼадше һатә ньвисаре.