Әстәр 9
[1] Сездәһе мәһа донздәһа, аwа готи мәһа Адаре, гава wәʼде фәрман у готьна пʼадше перʼа гьһишт, һʼәта wе рʼоже дьжмьнед щьһуйа ль сәр wе фькьре бун, кӧ wе ва һʼӧкӧми ль сәр wан бькьн, ле бона wан әw дәwр wәлгәрʼийа, чьмки щьһуйа һʼӧкӧми ль сәр wан нәйаред хwә кьрьн.
[2] Wе һьнге щьһуйед бажаред һʼәму qәзайед Аһʼашwерош пʼадшада пьшт данә пьшта һәв, кӧ дәстед хwә һьлдьнә ль сәр wан кәсед кӧ хwастьнә хьрабийе ль wан бькьн у кәсәк нькарьбу ль бәр wан рʼабуйа, чьмки саwа wан кʼәтьбу ль сәр һʼәму мьләта.
[3] У һʼәму миред qәза, wәкʼил, wәли у wәзиред пʼадше пьшта щьһуйа дьгьртьн, чьмки саwа Мордокʼай кʼәтьбу ль сәр wан.
[4] Рʼасти жи Мордокʼай мала пʼадшеда йәки мәзьн бу, нав у дәнге wи ль һʼәму qәза бәла бьбу, ӧса кӧ әw мәрьв, аwа готи Мордокʼай рʼож бь рʼож бьльнд дьбу.
[5] Щьһуйа бь шур һʼәму нәйаред хwә хьстьн, кӧштьн qьрʼкьрьн у чаwа хwәстьн ӧса сәре пәйкʼәтийед хwә кьрьн.
[6] Щьһуйа ль Суса qәсьрда пенсьд мәри кӧштьн кʼок ле анин.
[7] Ӧса жи Паршандатʼа, Далпон, Аспатʼа,
[8] Поратʼа, Адалйа, Аридатʼа,
[9] Пармаштʼа, Арисай, Аридай у Wайзатʼа,
[10] әв һәр дәһә кӧрʼед Һамане кӧрʼе Һамьдатʼа, нәйаре щьһуйа жи кӧштьн, ле дәст нәданә һәбука wан.
[11] Һәма wе рʼоже һʼәсабе кӧштийед Суса qәсьрда гьһиштә пʼадше.
[12] Пʼадше готә Әстәр ханьме: «Щьһуйа ль Суса qәсьрда пенсьд мәри у һәр дәһә кӧрʼед Һаман жи кӧштьнә, qьрʼ кьрьнә, гәло qәзайед пʼадшейә майинда ньһа чь кьрьнә? Дә бежә, иди чь дьхwази? Әwе бе дайине. Ньһа һивикьрьна тә чь йә? Wе бе сери».
[13] Әстәре ле вәгәрʼанд у готе: «Һәгәр бь дьле пʼадше бә, бьра сьбе жи щьһуйед Сусайерʼа мәщал бе дайине, кӧ ль гора ве qьрара иро бькьн у щьнйазе һәр дәһә кӧрʼед Һаман бенә дархьстьне».
[14] Пʼадше әʼмьр кьр, кӧ ӧса бьбә. Сусайеда фәрман һатә әʼламкьрьне, щьнйазе һәр дәһә кӧрʼед Һаман һатьнә дархьстьне.
[15] Щьһуйед Сусайеда чардәһе мәһа Адаре жи щьвийан у Сусайеда сесьд мәри кӧштьн, ле дәст нәданә һәбука wан.
[16] Щьһуйед майийә qәзайед пʼадшеда жи щьвийан, пьшт данә пьшта һәв, кӧ хwә хwәй кьн у жь дьжмьна рʼьһʼәт бун, жь нәйаред хwә һʼәфте пенщ һʼәзар мәри кӧштьн, ле дәст нәданә һәбука wан.
[17] Әв йәка сездәһе мәһа Адаре qәwьми у чардәһе wе мәһе щьһуйед qәзада рʼьһʼәт бун у әw кьрьнә рʼожа әшqе у шабуне.
[18] Ле щьһуйед Сусайеда сездәһ у чардәһе мәһе щьвийан йа хwә кьрьн у панздәһе мәһе рʼьһʼәт бун у әw кьрьнә рʼожа әшqе у шабуне.
[19] Ле бәле щьһуйед гӧнди, кӧ дәр у бәстед вәкьрида дьман, әwана чардәһе мәһа Адаре щәжьне дькьн, чаwа рʼожәкә әшqе у шабуне у пʼешкеша һәврʼа дьшиньн.
[20] Мордокʼай бона биранине әв йәк ньвиси у нәʼмә шандьнә һʼәму щьһуйарʼа, кʼижан кӧ ль qәзайед Аһʼашwерош пʼадшада дур у незик дьман,
[21] кӧ әwана һәр сал нава хwәда чардәһ у панздәһе мәһа Адаре кʼьфш кьн.
[22] Чьмки ван рʼожа щьһу жь нәйаред хwә рʼьһʼәт бун у мәһа кʼәдәра wан бу шабун у шина wан жи бу рʼожа щәжьне, кӧ ван рʼожа бькьнә рʼожед әшq у шабуне, пʼешкеша бьдьнә һәв у кʼәсибарʼа хера бькьн.
[23] Щьһуйа әв йәк qәбул кьр, кӧ иди кʼаре хwә кьрьбун бькьрана, чь кӧ Мордокʼай wанрʼа ньвиси.
[24] Чаwа нәйаре һʼәму щьһуйа, Һамане Һамьдатʼайе Агаги шеwьри бу, кӧ qьрʼа щьһуйа бинә у пʼур авитьбу, аwа готи пʼәшк, кӧ wан qьрʼ кә у кʼока wан бинә.
[25] Ле гава Әстәр чу щәм пʼадше, пʼадше бь нәʼма әʼмьр кьр, кӧ әw шеwьра Һаманә хьраб, йа кӧ әwи бона щьһуйа һазьр кьрьбу бе сәре wи у wи кӧрʼава жи дара хьн.
[26] Ләма жи ван рʼожарʼа готьн Пурим, анәгори фәʼмина хәбәра пур. Бона wан һʼәму готьнед ве нәʼме у ӧса жи бона wе йәке чь кӧ дитьн у чь кӧ һатә сәре wан.
[27] Щьһуйа qьрар кьр у әв йәка кьрьнә борще стуйе хwә у рʼькʼьнйата хwә у ӧса жи әwед кӧ гьһиштьбунә wан, wәки һәр сал бе тебәрʼдан ван һәр дӧ рʼожа анәгори ньвисар у wәхте wан кʼьфш кьн.
[28] Әв рʼож гәрәке qӧрʼнә qӧрʼнә бь щәжьне нава һәр qәбиле, һәр qәзайе у һәр бажарида бенә биранине. Әв рʼожед Пуриме гәрәке нава щьһуйада нәйенә һьлдане у биранина wан жь нава зарʼед wан дәрнәкʼәвә.
[29] Әстәр ханьма qиза Абихайил у Мордокʼайе щьһу һʼәта qәwата wанда чу, wана нәʼма дӧда бона әʼсәйикьрьна Пуриме ньвисин.
[30] У бь готьнед әʼдьлайийе у рʼастийе нәʼмә һʼәму щьһуйарʼа һатьнә шандьне, йед кӧ сәд бист һʼәфт qәзайед Аһʼашwерош пʼадшада дьман,
[31] wәки ван рʼожед Пуриме wәʼдада кʼьфш кьн, чаwа кӧ Мордокʼайе щьһу у Әстәр ханьме тʼәми да wан. Wан жи әв йәк кьрьнә борще стуйе хwә у зарʼед хwә, чаwа рʼожи бона охьрмед wанә гьранә һәwар газийе у шине.
[32] У бь ви аwайи фәрмана Әстәре тʼәмийа бона Пуриме әʼсәйи кьр у әw кʼьтебеда һатә ньвисаре.