[1] Liá-sṳ yî-heu, yû-têu Yî-set-lie̍t-ngìn ke liâng-chhiu lòi lâu ngài kóng: “Yî-set-lie̍t ngìn-mìn, chi-sṳ̂, Li-vi-ngìn pin mò lâu ke-têu lìn-koet ke Kâ-nàm-ngìn, Het-ngìn, Pí-li-sé-ngìn, Yâ-pu-sṳ̂-ngìn, Â-mùn-ngìn, Mô-ap-ngìn, Âi-khi̍p-ngìn, Â-mô-li-ngìn kak-lì. Kì-têu ho̍k ke-têu ngìn, cho khiung-yong sià-ok ke sṳ.
[2] Kì-têu vi chhṳ-kâ lâu chṳ́-sûn thó ngoi-koet ke se-moi-é, chiông Song-ti sṳn-kiet ke chṳ́-mìn tá-lá-sap; liâng-chhiu lâu kôn-chóng chhiu-he tai-thèu ke chhui-ngìn.”
[3] Ngài yit thâng-tó liá-sṳ, chhiu chhá-lan sâm lâu ngoi-phàu, yu pâng thèu-nà-mô lâu fù-sî, yù-sông thung-khú chhô-tén.
[4] Ngài ngòi-ngòi chhô-tén, chhṳ̍t-to lìm-am-é hien-chi ke sṳ̀. Yîn-vi Yî-set-lie̍t ke Song-ti sṳt kóng, Kì oi tui-fu liù-mòng chón-lòi ke ngìn só-fam ke chhui, só-yû thâng-tó liá-fa chhiu chho̍k-kiâng yù-sông ke ngìn chhiòn-phu chhi-si̍p to ngài mien-chhièn lòi.
[5] Lìm-am-é hien-chi ke sṳ̀, ngài tui yù-sông chûng hong-hí-lòi, hàn-he chok-tén chhá-lan ke sâm lâu ngoi-phàu khúi lo̍k-hi, chhûn-chhut sûng-sú hiong Song-chú — ngài ke Song-ti khì-tó.
[6] Ngài kóng: “Song-ti â, ngài chṳ̂n kien-seu lau-khui, m̀-kám chhai Ngì mien-chhièn ngo-hí thèu lòi. Ngài-têu ke chhui-ok tôi hí-lòi kô-ko thèu-nà, ngài-têu ke chhui-ko tù-thiên.
[7] Tui ngài-têu chú-siên ke sṳ̀-thoi chhṳ̍t-to liá-ha, ngài-têu ke chhui-ok chhin-chhûng. Yîn-vi ngài-têu ke chhui-ko, ngài-têu lâu ngài-têu ke vòng, pin ke-têu chi-sṳ̂ chhiòn-phu lo̍k chhai ngoi-pâng kiûn-vòng ke sú-chûng. Ngài-têu pûn-ngìn chhṳ̀, pûn-ngìn chhióng, pûn-ngìn chok-chéu, su-chhin vú-yu̍k, to kîm-pû-ngit hàn-he án-ngiòng.
[8] “Song-chú — ngài-têu ke Song-ti sṳt sṳ̂-ên pûn ngài-têu, sṳ́ ngài-têu chhûn-tó ke ngìn-mìn chhiam-sṳ̀ m̀-sṳ́ cho nù-chhòi, pûn ngài-têu ôn-vún he̍t chhai liá sṳ̀n-sṳn ke só-chhai. Ngài-têu ke Song-ti sṳ́ ngài-têu chhùng-kien kông-mìn, thot-lì khún-póng, pûn ngài-têu hàn-yû yit-si̍t-é hî-mong.
[9] Ngài-têu pún-lòi he nù-chhòi, chúng-he ngài-têu ke Song-ti mò pûn ngài-têu yit-chhṳ̍t cho nù-chhòi. Kì sṳ́ Pô-sṳ̂ ke fòng-ti hó khoán-thai ngài-têu, pûn ngài-têu chhùng-sîn hong hí-lòi, yu chhùng-kien Song-ti ke sṳn-thien, cháng-hó fí-fái ke só-chhai, sṳ́ ngài-têu chhai Yù-thai lâu Yâ-lu-sat-lâng yû sàng-chhiòng lòi pó-fu.
[10] “Chúng-he, ngài-têu ke Song-ti â, liá-ha liá-sṳ ki-yèn fat-sên, ngài-têu hàn-yû má-ke hó-kóng nè? Ngài-têu vì-poi
[11] Ngì thûng-ko Ngì ke phu̍k-ngìn — ke-têu siên-tî só pûn ngài-têu ke min-lin. Kì-têu sṳt lâu ngài-têu kóng, ngài-têu oi hi cham-liâng ke só-chhai he ô-chô ke thú-thi; yîn-vi tông-thi ke ngìn vû-ve sià-ok ke hàng-vì sṳ́ chhiòn-thi chhûng-mân lá-sap.
[12] Kì-têu yu lâu ngài-têu kóng: Na-he ngài-têu oi khiòng-sṳn, hióng-su liá-te thú-thi ke chhut-sán, yún-yén chhòn-pûn chṳ́-sûn, ngài-têu chhie̍t-tui cho-m̀-tet lâu ke-têu ngìn thûng-fûn, cho-m̀-tet pông-chhu kì-têu fàn-yùng hîn-vong.
[13] Ngài-têu ke Song-ti â, chhiu-son lìm-to ngài-têu ke chit-fa̍t chhiòn-phu he yîn-vi ngài-têu ke chhui-ok ko-fam, ngài-têu tî, Ngì tui ngài-têu ke chit-fa̍t hàn-he séu-ko ngài-têu só yin-tet ke; Ngì hàn-he liù ngài liá-têu ngìn ke sâng-miang.
[14] Ngài-têu ngióng-pân cho-tet chai vì-poi Ngì ke min-lin, lâu ke-têu sià-ok ke ngìn thûng-fûn nè? Na-he ngài-têu án-ngiòng cho, Ngì yit-thin voi fat-khién, sêu-me̍t ngài-têu, sṳ́ ngài-têu mò liù yit-sà.
[15] Song-chú — Yî-set-lie̍t ke Song-ti â, Ngì he kûng-ngi ke; chúng-he Ngì hàn liù ngài-têu chhui-ngìn ke sâng-miang. Ngài-têu hiong Ngì sṳ̀n-ngin ngài-têu ke chhui; ngài-têu mò chṳ̂-kiet lòi khî chhai Ngì ke mien-chhièn.”