[1] Só-yî, Thai-liù-sṳ fòng-ti min-lin thiàu-chhà pó-chhùn chhai Pâ-pí-lùn ke fòng-sṳt ki-liu̍k.
[2] Chúng-he kì-têu chhai Mí-tí-â-sén ke Â-mâ-thâ-sàng ke kiûng-nui fat-hien yit-kién kú-kién, táng-kô yû án-ngiòng ke ki-chai:
[3] “Sai-lû-sṳ cho fòng-ti ke thi-yit ngièn, ha-lin chhùng-kien Yâ-lu-sat-lâng Song-ti ke sṳn-thien, cho hien-chi ke só-chhai. Liá-thien oi yû ngi-sṳ̍p chhit kûng-chhak kô, ngi-sṳ̍p chhit kûng-chhak fat.
[4] Piak oi yung sâm-chhèn thai sa̍k-thèu kak yit-chhèn su-liau ke fông-sṳt lòi hí. Só-yû fi-yung tui koet-khu chṳ̂-chhut.
[5] Nì-pu-kap-nì-sat-vòng tui Yâ-lu-sat-lâng sṳn-thien tai-to Pâ-pí-lùn lòi ke kîm-hi, ngiùn-hi, ya oi kûi-vàn Yâ-lu-sat-lâng ke sṳn-thien, piong chhai Song-ti sṳn-thien tú ngièn-lòi ke vi-só.”
[6] Só-yî, Thai-liù-sṳ fòng-ti fì-sin kóng: “Hò-sî-sén sén-chóng Tha̍t-nâi, Sṳ-thâ-Pô-sṳ̂-nâi lâu Hò-sî-sén ke chung kôn-yèn: “Ngì-têu oi lì-khôi ke sṳn-thien;
[7] m̀-hó kôn-sa̍p kien-thien ke kûng-chhàng. Oi pûn Yù-thai sén-chóng lâu Yù-thai-ngìn ke liâng-chhiu chhai ngièn-lòi ke thi-fông chhùng-kien Song-ti ke sṳn-thien.
[8] Ngài liá-ha min-lin ngì-têu oi pông-chhu kì-têu chhùng-kien. Só sî-yeu ke chhiòn-phu fi-yung kiak-kiak tui vòng-khu lâu Hò-sî-sén soi-sû ke phu-fun pat-chhut, miên-tet kûng-chhàng thìn hâ-lòi.
[9] Ngì-têu oi ngit-ngit kiûng-yin Yâ-lu-sat-lâng chi-sṳ̂ ke sî-yeu; mò-lun he yung lòi-cho sêu-fa-chi hien-pûn thiên-táng Song-ti ke se ngiù-kú, mièn-yòng-kú, se mièn-yòng, ya-he ma̍k-é, yàm, chiú lâu kám-lám-yù, ngì-têu chhiòn-phu oi kiûng-kip.
[10] Án-ngiòng, kì-têu chhiu yû-hó hien thiên-táng Song-ti só fôn-hí ke chhîn-hiông sên-ngì, pin khì-khiù Kì su-fuk pûn ngài lâu ngài ke chṳ́-sûn.
[11] Ngài nang-ngoi ha-lin: Na-he yû-ngìn sùi-phien kói ngài ke min-lin, oi chiông kiâ vuk-táng ke liòng pâng-chhut yit-kî, chhiuk-chhôn kì, chiông kì koa chhai táng-kô, kì ke vuk-è ya oi sàng-cho lá-sap-tôi.
[12] Na-he yû kiûn-vòng ya-he ngìn-mìn kói liá-ke min-lin, sióng-oi fí-fái liá sṳn-thien, ngien ke kién-sién Yâ-lu-sat-lâng cho kin-pai Kì ke thi-fông ke Song-ti sêu-me̍t kì. Liá he ngài — Thai-liù-sṳ ke min-lin, thin-chho̍k oi chha̍t-tái chûn-hàng.”
[13] Só-yî, Hò-sî sén-chóng Tha̍t-nâi, Sṳ-thâ-Pô-sṳ̂-nâi pin kì-têu ke khiung-tóng, chha̍t-tái chûn-hàng Thai-liù-sṳ fòng-ti ke min-lin.
[14] Yù-thai-ngìn ke-têu chóng-ló tet-tó siên-tî Ha̍p-kâi lâu Yi̍t-tô ke sûn-é Sat-kâ-li-â ke kú-li, kien-thien ke kûng-chok chin-hàng tông sun-li. Kì-têu cheu Yî-set-lie̍t Song-ti ke chṳ́-yi, lâu Pô-sṳ̂ fòng-ti Sai-lû-sṳ, Thai-liù-sṳ, hàn-yû Â-tha̍t-siet-sî ke min-lin vàn-sṳ̀n hí sṳn-thien ke kûng-chhàng.
[15] Sṳn-thien vàn-kûng he chhai Thai-liù-sṳ cho fòng-ti ke thi-liuk ngièn, Â-tha̍t-ngie̍t chhû-sâm.
[16] Yî-set-lie̍t ke ngìn-mìn, pâu-hàm chi-sṳ̂, Li-vi-ngìn lâu só-yû tui liù-mòng chón-lòi ke ngìn, chhiòn-phu fôn-fôn hí-hí lòi kí-hàng fung-hien Song-ti sṳn-thien ke tién-lî.
[17] Vi fung-hien liá sṳn-thien ke tién-lî, kì-têu hien yit-pak chak ngiù-kú, lióng-pak chak mièn-yòng-kú, lâu si-pak chak se mièn-yòng cho sên-ngì, yu cheu Yî-set-lie̍t kî-chhu̍k ke su-muk hien sṳ̍p-ngi chak sân-yòng-kú cho su̍k-chhui-chi.
[18] Kì-têu cheu Mô-sî ke Sû só chṳ́-sṳ ke, chiông chi-sṳ̂ lâu Li-vi-ngìn chû-chṳt hí-lòi, cheu phài-pân chhai Yâ-lu-sat-lâng sṳn-thien tú fu̍k-sṳ Song-ti.
[19] Thi-ngi ngièn châng-ngie̍t sṳ̍p-si, tui liù-mòng chón-lòi ke ngìn-mìn sú Phàn-ko-chiet.
[20] Só-yû ke chi-sṳ̂ lâu Li-vi-ngìn chhiòn-phu cheu ngì-sṳt kiet-chhiang chhṳ-kâ. Li-vi-ngìn vi só-yû chón-lòi ke ngìn-mìn, chi-sṳ̂ hiûng-thi lâu chhṳ-kâ chhṳ̀ Phàn-ko-chiet ke yòng-è.
[21] Só-yû tui liù-mòng chón-lòi ke Yî-set-lie̍t-ngìn chhiòn-phu yû sṳ̍t liá yòng-è; ke-têu he̍t chhai liá-thi, lì-khôi yi-kau chón-lòi pai Song-chú — Yî-set-lie̍t Song-ti ke ngìn ya sṳ̍t liá yòng-è.
[22] Kì-têu fôn-fôn hí-hí khin-chuk Chhù-kau-chiet chhit-ngit kiú. Kì-têu chhûng-mân khoai-lo̍k; yîn-vi Song-chú sṳ́ Â-sut fòng-ti tui kì-têu tông-hó, pông-chhu kì-têu chhùng-kien Yî-set-lie̍t Song-ti ke sṳn-thien.