[1] Yù-thai lâu Phien-ngâ-mén-ngìn ke sù-thi̍t yit thâng-kóng liù-mòng chón-lòi ke ngìn chhùng-kien Song-chú — Yî-set-lie̍t Song-ti ke sṳn-thien,
[2] chhiu hi kien Só-lò-pâ-pak lâu ke-têu chhu̍k-chóng, kóng: “Pûn ngài-têu kâ-ngi̍p ngì-têu hí sṳn-thien ke kûng-chok hó-mò! Yîn-vi ngài-têu lâu ngì-têu kin-pai ke he khiung yit-vi Song-ti. Chhṳ-chhiùng Â-sut fòng-ti Yî-sat-ha̍p-tun tai ngài-têu to liá yî-heu, ngài-têu yit-chhṳ̍t hiong Song-ti hien-chi.”
[3] Só-lò-pâ-pak, Yâ-sû-â, hàn-yû khì-thâ Yî-set-lie̍t ke chhu̍k-chóng tui kì-têu kóng: “Ngì-têu cho-m̀-tet kâ-ngi̍p, lòi vi Song-chú — ngài-têu ke Song-ti hí sṳn-thien. Ngài-têu oi cheu Pô-sṳ̂ fòng-ti Sai-lû-sṳ ke fûn-fu, chhṳ-kâ lòi hí.”
[4] Só-yî, Yù-thai-ngìn hí sṳn-thien ke sṳ̀, ke thi-fông ke ngìn chú-tóng khiúng-hak kì-têu.
[5] Tui Pô-sṳ̂ fòng-ti Sai-lû-sṳ tông-chṳn chhṳ̍t-to Pô-sṳ̂ fòng-ti Thai-liù-sṳ tông-chṳn khì-kiên, ke-têu ngìn hàn sòng-sòng sû-mâi Pô-sṳ̂ chṳn-fú ke kôn-yèn lòi yéu-lon kì-têu.
[6] Â-ha̍p-sùi-lû fòng-ti chṳp-chṳn mò kí-kiú, Yù-thai lâu Yâ-lu-sat-lâng ngìn-mìn ke sù-thi̍t tai-tén chhong-é hi ko kì-têu.
[7] Nang-ngoi, chhai Pô-sṳ̂ fòng-ti Â-tha̍t-siet-sî ngièn-kiên, Pí-sṳ̂-làn, Mí-thi̍t-li-tha̍t, Thâ-phe̍t lâu kì khiung-tóng ke siá sin-é pûn fòng-ti; liá sin-é he yung Â-làn-vùn siá ke, thu̍k ke sṳ̀ chang fân-cho Pô-sṳ̂-fa.
[8] Sén-chóng Li-fèn lâu sén pi-sû Sṳ̂n-soi ya siá-hó án-ngiòng yit-fûng ko Yâ-lu-sat-lâng-ngìn ke chhong-é, pûn Â-tha̍t-siet-sî fòng-ti:
[9] “Sén-chóng Li-fèn, sén pi-sû Sṳ̂n-soi, lâu ngài-têu ke thùng-phân — ke-têu fap-kôn lâu khì-thâ tui Yî-li̍t, Pâ-pí-lùn, lâu Yî-làn-thi ke Sû-sân sái-lòi ke phu-ha,
[10] lièn pûn ví-thai chûn-kui ke Â-sṳ̂-nâ-pâ tui ku-hiông sái-lòi he̍t chhai Sat-mâ-li-â lâu Hò-sî-sén ke-têu ngìn-mìn, khiung-ha siá sin-é.”
[11] Sû-sin ke nui-yùng he: “Hò-sî-sén ke ngìn-mìn song-cheu Â-tha̍t-siet-sî fòng-ti.
[12] “Ngài-têu hî-mong fòng-ti tî: Tui fòng-ti chhṳ-lî ke khì-thâ thi-khî sái-lòi he̍t chhai Yâ-lu-sat-lâng ke Yù-thai-ngìn tông-chhai chhùng-kien ke-chho sià-ok, phoi-ngia̍k ke sàng. Kì-têu yí-kîn khôi-sṳ́ hí sàng-chhiòng, chhin-kiak chhiu voi vàn-kûng lé.
[13] Fòng-ti â, liá-sàng na-yû yit-ngit hí-hó, sàng-chhiòng vàn-kûng, ke-têu ngìn chhiu m̀-voi chai chin-kung, na̍p kok-chúng soi lé; fòng-ti ke koet-khu sû-ngi̍p yit-thin voi kám-séu.
[14] Yîn-vi ngài-têu he sṳ̀n-phu̍k, tui fòng-ti yû ngi-vu, mò-oi khon-tó fòng-ti sṳ̍t-khûi, só-yî hiong fòng-ti kien-ngi,
[15] chhiáng fòng-ti fûn-fu ngìn thiàu-chhà siên-vòng ke ki-liu̍k. Án-ngiòng, ngì chhiu voi fat-hien liá-sàng yit-chhṳ̍t he phoi-ngia̍k ke, chhṳ-kú yî-lòi sún-hoi lie̍t-vòng lâu tak-sén ke kôn-chóng. Liá-sàng ke ngìn-mìn chhiòn-phu he tông-nàn kón ke. Yîn-vi án-ngiòng, liá-sàng sṳt pûn-ngìn chhak-thet.
[16] Ngài-têu oi fòng-ti tî, na-he liá-sàng chhùng-kien hí-lòi, sàng-chhiòng cháng-hó, fòng-ti chhiu mò fap-thu chai kón Hò-sî-sén lé.”
[17] Fòng-ti ke fì-sin he án-ngiòng: “Li-fèn sén-chóng, Sṳ̂n-soi sén pi-sû, he̍t chhai Sat-mâ-li-â lâu Hò-sî-sén thi-khî ke kôn-yèn phìn-ôn:
[18] “Ngì-têu sung sông-lòi ke chhong-é yí-kîn yû-ngìn fân-yi̍t, thu̍k pûn ngài thâng lé.
[19] Ngài ha-lin thiàu-chhà, khok-sṳ̍t fat-hien Yâ-lu-sat-lâng chhṳ-kú yî-lòi chhiu-he phoi-ngia̍k vòng-khièn ke; ke-sàng chhûng-mân chho-fán lâu phau-thung ke sṳ.
[20] Yâ-lu-sat-lâng sṳt yû thai-nèn ke kiûn-vòng thúng-chhṳ ko ke-sàng lâu kûi-chak Hò-sî-sén, pin chṳ̂n-sû kok-chúng soi.
[21] Só-yî, ngì-têu oi siên-pu min-lin, chú-tóng ke-sàng ke chhùng-kien, chhṳ̍t-to ngài pân-pu min-lin vì-chṳ́.
[22] Ngì-têu oi kiún-sṳ́m chhú-lî liá-sṳ, cho-m̀-tet yèn-chhàn, miên-tet ngài su kien-chhûng ke sún-sṳt.”
[23] Li-fèn, Sṳ̂n-soi lâu kì-têu ke khiung-tóng yit thâng-tó Â-tha̍t-siet-sî fòng-ti ke fì-sin, chhiu ngiàm-sṳ̀ to Yâ-lu-sat-lâng, yung vú-li̍t pet Yù-thai-ngìn thìn-kûng.
[24] Chhai Yâ-lu-sat-lâng chhùng-kien Song-ti sṳn-thien ke kûng-chhàng su-pet thìn-kûng, mò fap-thu ki-siu̍k chin-hàng, chhṳ̍t-to Pô-sṳ̂ fòng-ti Thai-liù-sṳ thúng-chhṳ ke thi-ngi ngièn.