[1] Pô-sṳ̂-vòng Sai-lû-sṳ tên-kî cho fòng-ti ke thi-yit ngièn, Song-chú vi-tó sṳ̍t-hien Kì thûng-ko siên-tî Yâ-li-mí só-kóng ke yi-ngièn, chhiu kám-thung Sai-lû-sṳ pân-pu min-lin, yung sṳ siá hâ-lòi, chhòn-to chhiòn ti-koet tak só-chhai kóng:
[2] “Liá he Pô-sṳ̂ fòng-ti Sai-lû-sṳ ke min-lin: Song-chú — thiên-táng ke Song-ti pûn ngài cho chhiòn sṳ-kie ke thúng-chhṳ-chá; Kì oi ngài fu-chit chhai Yù-thai ke Yâ-lu-sat-lâng vi Kì hí yit-chho thien.
[3] Ngien Song-ti lâu ngì liá-têu su̍k Kì ke chṳ́-mìn thùng-chhai. Ngì-têu oi to Yù-thai ke Yâ-lu-sat-lâng hi, chhùng-sîn hí Song-chú — Yî-set-lie̍t Song-ti ke sṳn-thien; Kì he chhai Yâ-lu-sat-lâng ke Song-ti.
[4] Na-he liù-mòng ke chṳ́-mìn chûng, yû sî-yeu pông-chhu chang cho-tet chón-hi ke, kì-têu ke lìn-sa chhiu oi yung kîm-ngiùn, chhòi-vu̍t, thèu-sâng pông-chhu kì-têu, nang-ngoi hàn-oi vi Yâ-lu-sat-lâng Song-ti ke sṳn-thien kâm-sîm hien lî-vu̍t.”
[5] Só-yî, Yù-thai lâu Phien-ngâ-mén ke chhu̍k-chóng, chi-sṳ̂ lâu Li-vi-ngìn, hàn-yû tak-ke pûn Song-ti kám-thung ke ngìn chhiòn-phu chún-phi hó, oi chón-to Yâ-lu-sat-lâng hi chhùng-sîn hí Song-chú ke sṳn-thien.
[6] Kak-piak lìn-sa chhiòn-phu pông-chhu kì-têu, nâ ngiùn-hi, kîm-é, chhòi-vu̍t, thèu-sâng, lâu khì-thâ ta̍t-chhièn ke tûng-sî pûn kì-têu, nang-ngoi hàn vi sṳn-thien hien kok-yong ke lî-vu̍t cho kâm-sîm-chi.
[7] Sai-lû-sṳ fòng-ti ya chiông yî-chhièn Nì-pu-kap-nì-sat-vòng tui Yâ-lu-sat-lâng Song-chú ke sṳn-thien chhióng-lòi piong chhai chhṳ-kâ sṳ̀n-meu chûng ke yung-phín vàn kì-têu.
[8] Pô-sṳ̂ fòng-ti Sai-lû-sṳ phai chhòi-chṳn thai-sṳ̀n Mí-thì-li-tha̍t tiám-son liá-têu yung-phín; Mí-thì-li-tha̍t chhiu khôi yit-fun chhîn-tân pûn Yù-thai sén-chóng Sat-pâ-sat,
[9] su-muk ki chhai hâ-poi: hien-chi yung ke kîm-vón sâm-sṳ̍p chak, hien-chi yung ke ngiùn-vón yit-chhiên chak, khì-thâ chúng-lui ke vón ngi-sṳ̍p kiú-chak, se kîm-vón sâm-sṳ̍p chak, se ngiùn-vón si-pak yit-sṳ̍p chak, khì-thâ yung-phín yit-chhiên khien.
[11] Kîm-vón, ngiùn-vón lâu khì-thâ só-yû yung-phín, chúng-khiung yû ńg-chhiên si-pak khien. Liù-mòng ke ngìn tui Pâ-pí-lùn chón-lòi ke sṳ̀, Sat-pâ-sat chiông liá-têu yung-phín chhiòn-phu tai-to Yâ-lu-sat-lâng.