[1] Chhin-tô ngièn heu, tông Â-tha̍t-siet-sî cho Pô-sṳ̂ fòng-ti ke sṳ̀, Yî-sṳ̂-lâ tui Pâ-pí-lùn chón-lòi. Yî-sṳ̂-lâ ke chú-siên he thai-chi-sṳ̂ Â-lùn; kì ke chhu̍k-phú ki chhai hâ-poi: Yî-sṳ̂-lâ he Sî-lòi-ngâ ke lai-é, Sî-lòi-ngâ he Â-sat-li-ngâ ke lai-é, Â-sat-li-ngâ he Hî-le̍t-kâ ke lai-é,
[2] Hî-le̍t-kâ he Sâ-liùng ke lai-é, Sâ-liùng he Sat-tuk ke lai-é, Sat-tuk he Â-hî-thut ke lai-é,
[3] Â-hî-thut he Â-mâ-li-ngâ ke lai-é, Â-mâ-li-ngâ he Â-sat-li-ngâ ke lai-é, Â-sat-li-ngâ he Mí-lâ-yok ke lai-é,
[4] Mí-lâ-yok he Sî-lâ-hî-ngâ ke lai-é, Sî-lâ-hî-ngâ he Vû-sî ke lai-é, Vû-sî he Pu-kî ke lai-é,
[5] Pu-kî he Â-pí-sû ke lai-é, Â-pí-sû he Fî-nì-ha̍p ke lai-é, Fî-nì-ha̍p he Yî-li-â-sat ke lai-é, Yî-li-â-sat he Â-lùn ke lai-é.
[6] Yî-sṳ̂-lâ he chhin-yû ho̍k-mun ke kîn-ho̍k chôn-kâ, chîn-thûng Song-chú — Yî-set-lie̍t Song-ti pûn Mô-sî ke fap-li̍t. Yîn-vi Song-chú — kì ke Song-ti su-fuk pûn kì, Yî-sṳ̂-lâ yêu-khiù fòng-ti ke tak khien-sṳ, fòng-ti chhiòn-phu chún kì.
[7] Â-tha̍t-siet-sî chhai-vi ke thi-chhit ngièn, Yî-sṳ̂-lâ lâu yit-khiùn Yî-set-lie̍t-ngìn tui Pâ-pí-lùn hí-sṳ̂n chón Yâ-lu-sat-lâng. Liá-khiùn ngìn pâu-hàm chi-sṳ̂, Li-vi-ngìn, sṳn-thien kô-sú, sṳn-thien sú-ví lâu kûng-ngìn.
[8] Kì-têu lì-khôi Pâ-pí-lùn he châng-ngie̍t chhû-yit; yîn-vi Song-ti sṳ̂-ên pông-chhu, kì-têu chhai ńg-ngie̍t chhû-yit chhiu to Yâ-lu-sat-lâng.
[10] Yî-sṳ̂-lâ yit-sên chôn-sîm ngiên-kiu pin chûn-hàng Song-chú ke kau-sṳ, yu chiông só-yû fap-li̍t thiàu-li kau-thô Yî-set-lie̍t ngìn-mìn.
[11] Yî-sṳ̂-lâ he chi-sṳ̂ lâu kîn-ho̍k chôn-kâ, chîn-thûng Song-chú su-pûn Yî-set-lie̍t ke kie-min lâu fap-li̍t. Â-tha̍t-siet-sî fòng-ti chiông yî-ha ke sin-é sung-pûn Yî-sṳ̂-lâ.
[12] “Ngài — Â-tha̍t-siet-sî, chung-vòng ke vòng, siá sin-é pûn chîn-thûng thiên-táng Song-ti fap-li̍t ke kîn-ho̍k chôn-kâ Yî-sṳ̂-lâ chi-sṳ̂:
[13] “Ngài min-lin ti-koet nui Yî-set-lie̍t ke ngìn-mìn, chi-sṳ̂ lâu Li-vi-ngìn, ngien-yi ke ngìn chhiòn-phu cho-tet lâu ngì khiung-ha chón Yâ-lu-sat-lâng hi.
[14] Ngài, lièn thùng ngài chhit-ke chhâm-mèu, phai ngì hi thiàu-chhà Yâ-lu-sat-lâng lâu Yù-thai ke chhìn-hìn, khon ngìn-mìn yû chûn-sú Song-ti kâu-pûn ngì ke Fap-li̍t-sû mò.
[15] Ngì oi tai ngài lâu ngài ke chhâm-mèu kâm-sîm hien ke kîm-ngiùn, chi-vu̍t pûn ke-vi he̍t chhai Yâ-lu-sat-lâng sṳn-thien ke Yî-set-lie̍t Song-ti.
[16] Ngì ya oi tai-tén ngì chhai Pâ-pí-lùn-sén chṳ̂n-sû só-yû ke kîm-ngiùn, pin Yî-set-lie̍t-ngìn lâu ke-têu chi-sṳ̂ kâm-sîm hien-pûn Yâ-lu-sat-lâng Song-ti sṳn-thien ke lî-vu̍t.
[17] “Ngì oi liù-sîm yung liá-têu chhièn mâi ngiù-kú, mièn-yòng-kú, se mièn-yòng, ńg-kuk lâu chiú, hien chhai Yâ-lu-sat-lâng — ngì-têu Song-ti sṳn-thien ke chi-thàn táng.
[18] Chhûn-tó ke kîm-ngiùn, ngì cho-tet cheu ngì-têu Song-ti ke chṳ́-yi, yung chhai ngì lâu thùng-pâu ngin-vì thó-tong ke só-chhai.
[19] Ngì oi chiông só-yû kâu-pûn ngì ke-têu chhai sṳn-thien sṳ-fung ke yung-phín hien-pûn Yâ-lu-sat-lâng ke Song-ti.
[20] Nang-ngoi, Song-ti sṳn-thien só sî-yeu ke khì-thâ tûng-sî, ngì chhiòn-phu cho-tet tui koet-khu chhí-yung.
[21] “Ngài — Â-tha̍t-siet-sî fòng-ti min-lin só-yû chhai Hò-sî-sén ke chhòi-chṳn kôn-yèn, oi kiak-kiak kiûng-kip liá-ke chîn-thûng thiên-táng Song-ti fap-li̍t ke chôn-kâ — Yî-sṳ̂-lâ chi-sṳ̂ só yêu-khiù ke tak-yong tûng-sî;
[22] mo̍k chhêu-ko: ngiùn-è sâm-chhiên si-pak kûng-kîn, ma̍k-é yit-van kûng-kîn, chiú lióng-chhiên kûng-sṳ̂n, kám-lám-yù lióng-chhiên kûng-sṳ̂n; yàm chhiu mò han-chṳ.
[23] Ngì-têu oi kiún-sṳ́m, thiên-táng Song-ti vi Kì sṳn-thien só min-lin ke tak-yong tûng-sî, ngì-têu chhiòn-phu oi kiûng-kip; án-ngiòng, Kì chang m̀-voi hiong ngài lâu sṳ̀n-chiap ngài vòng-vi ke ngìn fat-khién.
[24] Ngì-têu cho-m̀-tet hiong chi-sṳ̂, Li-vi-ngìn, kô-sú, sú-ví, kûng-ngìn, ya-he só-yû lâu liá sṳn-thien yû-koân ke ngìn tá-soi.
[25] “Yî-sṳ̂-lâ, ngì oi yung Song-ti pûn ngì ke chṳ-fi, chṳ́-phai hàng-chṳn kôn-yèn lâu sṳ́m-phan-kôn hi chhṳ-lî chhiòn Hò-sî-sén ke ngìn-mìn, chhiu-he ke-têu chûn-sú ngì Song-ti fap-li̍t ke ngìn-mìn. Ngì yit-thin oi chiông ke fap-li̍t kâu mò mìn-pha̍k ke ngìn.
[26] Na-he yû-ngìn m̀ fu̍k-chhiùng ngì Song-ti ke fap-li̍t ya-he liá ti-koet ke fap-li̍t, kì yit-thin oi ngiàm-sṳ̀ su-tó ngiàm-ngiàm ke chhú-fa̍t: chhú sí-hìn, chhûng-kiûn, mu̍t-sû chhòi-sán, ya-he chhô-kâm.”
[27] Yî-sṳ̂-lâ kóng: “Ngien Song-chú — ngài-têu chú-siên ke Song-ti tet-tó chan-mî! Kì sṳ́ fòng-ti kâm-ngien yung liá fông-fap lòi kâ-thiâm Yâ-lu-sat-lâng Song-chú sṳn-thien ke chûn-yùng.
[28] Song-ti ke ên-tién sṳ́ ngài tet-tó fòng-ti, kì ke-têu chhâm-mèu, lâu kì yit-chhiet yû khièn-sṳ kôn-yèn ke pông-chhu. Song-chú — ngài ke Song-ti pûn ngài yúng-hi, sṳ́ ngài ham chhin-tô Yî-set-lie̍t chûng-chhu̍k ke liâng-chhiu, ngien-yi lâu ngài khiung-ha chón-hi.”