[1] To thi chhit-ngie̍t, Yî-set-lie̍t-ngìn chhai chhṳ-kâ ke kâ-hiông chhiòn-phu ôn-tún hâ-lòi; ke-sṳ̀ kì-têu thùng-sîm yit-yi chhi-si̍p chhai Yâ-lu-sat-lâng.
[2] Yok-sat-tha̍t ke lai-é Yâ-sû-â lâu kì ke-têu chi-sṳ̂ thùng-sṳ, pin Sat-lâ-thiet ke lai-é Só-lò-pâ-pak lâu kì ke-têu chhîn-chhit, chhùng-sîn hí Yî-set-lie̍t Song-ti ke chi-thàn, cheu sṳ̀n-ngìn Mô-sî Fap-li̍t-sû ke chṳ́-sṳ, chhai thàn-táng hien sêu-fa-chi.
[3] Yîn-vi chón-lòi ke ngìn kiâng ke thi-fông ke ngìn, kì-têu chhiu chhai chi-thàn ngièn-lòi ke thi-kî táng chhùng-sîn hí chi-thàn; yèn-heu, kì-têu khôi-sṳ́ chhai thàn-táng tak chêu-sṳ̀n am-pû hiong Song-chú hien sêu-fa-chi.
[4] Kì-têu cheu kûi-thin sú Tap Liàu-è Chiet, tak-ngit cheu su-ngiak cheu kûi-li fung-hien yin-kôi hien ke sêu-fa-chi;
[5] nang-ngoi, kì-têu yu cheu sòng-li hien sêu-fa-chi, pin chhai chhû-yit lâu só-yû kin-pai Song-chú ke chiet-khì hien-chi, hàn-yû hiong Song-chú hien kâm-sîm-chi.
[6] Sûi-yèn ngìn-mìn hàn-màng khôi-sṳ́ chhùng-hí sṳn-thien, chúng-he tui thi chhit-ngie̍t chhû-yit, kì-têu yí-kîn khôi-sṳ́ hiong Song-chú hien sêu-fa-chi lé.
[7] Mìn-chung chhut kûng-chhièn pûn tá-sa̍k sṳ̂-fu, muk-siong, yu nâ sṳ̍t-vu̍t, yím-liau, kám-lám-yù lâu Thai-ngì-sàng pin Sî-tun-sàng ke ngìn von Lì-pâ-nun ke hiông-pak-su. Liá-têu su-liau oi kîn-ko thai-hói yun-to Yok-pha. Liá-sṳ tet-tó Pô-sṳ̂ fòng-ti Sai-lû-sṳ ke hí-khó.
[8] Mìn-chung chón-lòi Yâ-lu-sat-lâng yî-heu, thi-ngi ngièn ke thi-ngi ngie̍t, kì-têu chhai Song-ti sṳn-thien ke ló thi-fông khôi-sṳ́ thung-kûng. Sat-lâ-thiet ke lai-é Só-lò-pâ-pak, Yok-sat-tha̍t ke lai-é Yâ-sû-â, lâu khì-thâ ke thùng-pâu, chhiu-he chi-sṳ̂, Li-vi-ngìn lâu só-yû tui liù-mòng chón-lòi Yâ-lu-sat-lâng ke ngìn, chhiòn-phu chhâm-kâ liá kûng-chok. Só-yû ngi-sṳ̍p se yî-song ke Li-vi-ngìn chhiòn-phu su-phai lòi kam-tuk chhùng-kien Song-chú sṳn-thien ke kûng-chhàng.
[9] Li-vi-ngìn Yâ-sû-â lâu kì ke chṳ́-sûn, chhîn-su̍k, pin Kap-me̍t lâu kì ke chṳ́-sûn (Hò-tha̍t-vî-ngâ chûng-chhu̍k), chhiòn-phu lièn-ha̍p hí-lòi kam-tuk chhùng-kien Song-ti sṳn-thien ke kûng-chhàng. Li-vi-ngìn Hî-nâ-tha̍t ke chṳ́-sûn, chhîn-su̍k ya lòi then-sú kam-tuk.
[10] Song-chú ke sṳn-thien khôi-sṳ́ tá thi-kî ke sṳ̀, chi-sṳ̂ chhiòn-phu chok lî-fu̍k, khî chhai tak-sà ke vi-só, sú nâ la̍p-pá; Li-vi-ngìn Â-sat ke chṳ́-sûn nâ chhê-é khî chhai ke-vi. Kì-têu cheu Yî-set-lie̍t-vòng Thai-ví chhòn hâ-lòi ke lî-ngì chan-mî Song-chú.
[11] Kì-têu pí-chhṳ́ tui-chhong, kám-chhia chan-mî Song-chú kóng: Song-chú he chṳ-san; Kì tui Yî-set-lie̍t ke chhṳ̀-oi yún-yén chhòng-chhùn. Tak-ke ngìn chhiòn-phu thai-sâng hêm, chan-mî Song-chú, yîn-vi sṳn-thien tá thi-kî ke kûng-chhàng yí-kîn khôi-sṳ́ lé.
[12] Tông-tô ngièn-ló ke chi-sṳ̂, Li-vi-ngìn lâu chhu̍k-chóng sṳt khon-ko yî-chhièn ke sṳn-thien, liá-ha chhîn-muk khon-tó liá sṳn-thien tá thi-kî, ngiûn m̀-he̍t khôi-sâng thai-kieu; khì-thâ chhai-chhòng ke ngìn chhin-tô fôn-hí to thai-sâng sê.
[13] Mò ngìn fûn tet-chhut thai-sâng sê ke sâng ya-he thai-kieu ke sâng, yîn-vi sâng-yîm sṳ̍p-fûn thai, chhin-yén ke só-chhai ya thâng tet-tó.