[1] Dubbiin kanatti aanee jiru kan ilma Daawit mootii Yerusaalem isa lallabichaa ti.
[2] Lallabichi, “Wanti hundinuu kan waa'ee hin baafnee dha, waa'ee hin baasu! Dhuguma waa'ee hin baasu!” jedhe.
[3] Namni hojii isaa isa aduu jalatti itti dadhabu hundumaaf, bu'aa maalii argata”
[4] Dhaloonni tokko in darba, dhaloonni biraas in dhufa; lafti garuu yeroo hundumaaf dhaabatee in hafa;
[5] biiftuun in baati, in lixxi, iddoo dhufteettis in ariifatti, deebitees in baati;
[6] qilleensi gara mirgaatti in qilleensa'a, gara bitaattis in naanna'a; naanna'ees gara dur dhufetti in deebi'a.
[7] Lagoonni hundinuus gara galaanaatti in yaa'u, galaanichi garuu hin guutu; lagoonni sunis gara dhufanitti in deebi'u, achiis deebi'anii in yaa'u.
[8] Wanti hundinuu hamma namni isa dubbachuu dadhabutti, nama dadhabsiisa; iji argu hin quufu; gurris dhaga'uudhaan hin guutu;
[9] wanti dur ta'ee ture ammas ta'uuf jira; wanti dur godhamee ture, ammas godhamuuf jira; wanta aduu jala jiru keessaa wanti haaraan tokko illee hin jiru.
[10] Wanti namni, “Ilaa! Wanta haaraa kana” jechuu danda'u jiraa” Wanti kun baroota warra bara keenya dura turan keessa kan ta'ee dha;
[11] wanti darbe hin yaadatamu, warri si'achi dhufanis wanta ta'uuf jiru hin yaadatan.
[12] Ani lallabichi Yerusaalemitti mootii Israa'elin ture;
[13] ani wanta waaqa jalatti hojjetame hundumaa ogummaadhaan qoree ilaaluudhaaf itti nan yaade; ilmaan namootaa akka itti dhama'aniif Waaqayyo hojii rakkisaa kana kenneef.
[14] Ani wanta aduu jalatti hojjetame hundumaa argeera, kunoo, wanti hundinuu waa'ee hin baasu, akka nama qilleensa ari'uu tis.
[15] Wanti micciiramaan qajeeluu hin danda'u, wanti hin jirres lakkaa'amuu hin danda'u.
[16] Ani,“Kunoo, ani warra ana dura Yerusaalem irratti mootii turan hundumaa caalaa, nama guddaa ta'eera, ogummaas baay'ifadheera” jedhee garaa kootti nan yaade.
[17] Ogummaa, maraatummaa, gowwummaas gargar baasee beekuudhaaf itti nan yaade, kunis immoo akka nama qilleensa ari'uu akka ta'e nan hubadhe;
[18] ogummaa baay'ee keessa aarii guddaatu jira, kan beekumsa dabalatus mataa dhukkubbii dabalata.