[1] O tuma la masakɛ Darius ye ci di ko u ka tilew kibaru sɛbɛnnen ɲini nafolo mara yɔrɔ la Babilonɛ.
[2] U y'a ye Medi jamana duguba dɔ la, o tɔgɔ ko Akimeta. Kitabu melekelen dɔ tun bɛ yen, a sɛbɛnnen bɛ o kɔnɔ ko:
[3] «Masakɛ Sirus ka masaya san fɔlɔ la, masakɛ Sirus ye ci fɔ Ala ka so ko la Jerusalɛm, ko o so ka kan ka jɔ ko kura ka sarakaw lase o so kɔnɔ. A jusigilanw ka kɛ barikamaw ye. O Alabatosoba jɔ kundama ka kɛ nɔnkɔn ɲɛ biwɔɔrɔ ye, a janya ka kɛ nɔnkɔn ɲɛ biwɔɔrɔ ye.
[4] Kabakurun dɛsɛnen sira saba ka kɛ a la ani jiri cilenw sira kelen. Masakɛ ka so na o jɔli wari bɔ.
[5] Ka fara o kan, Nebukadnezar tun ye sanu minan ani warijɛ minan minw ta ka bɔ Ala ka so yɔrɔ senuma kɔnɔ Jerusalɛm ka taa ni u ye Babilonɛ, olu ka kɔsegin ka taa bila Alabatosoba kɔnɔ u nɔ na Jerusalɛm. U k'u bila Ala ka so kɔnɔ.
[6] «Ayiwa sisan, aw Ufrate ba kɔ fɛ jamana kuntigiw Tatenai ni Setar-Bozenai ani aw baarakɛɲɔgɔnw Afarsakkaw, aw ka mabɔ o yɔrɔ la.
[7] A y'a to nin baara ka kɛ ka Ala ka so jɔ. Yahutuw ka kuntigiw ani u ka cɛkɔrɔbaw ka so jɔ a yɔrɔ kɔrɔ la.
[8] Ne bɛ nin ci minw fɔ aw ye o Yahutu cɛkɔrɔbaw minɛ cogo ko la Ala ka so jɔli ko la, o filɛ nin ye. U magoɲɛ wari na bɔ masakɛ ka nisɔngɔ minɛlenw la o ba kɔ fɛ jamanaw la walisa o baara kana jɔ.
[9] U mago bɛ fɛn o fɛn na ka kɛ saraka jenitaw ye sankolola Ala ye, o ka di u ma don o don ka kɛɲɛ ni Jerusalɛm sarakalasebaaw ka kuma fɔlen ye, nturabɔlanw ni sagajigiw ni sagadenw ani alikama kisɛ ni kɔgɔ ni diwɛn ani tulu fana.
[10] O ka di u ma, a kana dɛsɛ walisa u ka saraka suma dumanw lase sankolola Ala ma ka Ala deli masakɛ ni a denkɛw ye walisa u ka si sɔrɔ.
[11] Ne ko fana ni mɔgɔ o mɔgɔ ye nin kuma yɛlɛma, jiri dɔ ka bɔ o mɔgɔ ka so la ka o nun bɔ ka o turu ka o mɔgɔ yɛrɛ dulon o la. A ka so ka kɛ sununkun ye.
[12] Ni masakɛ o masakɛ ani siya o siya bɛ u bolo mɔɔnɔbɔ ka nin kuma yɛlɛma ko u bɛ Ala ka so tiɲɛn Jerusalɛm, Ala min ye a tɔgɔ sigi yen, o ka olu bɛɛ halaki. Ne, Darius bɛ o fɔ, a ka kɛ joona.»
[13] O tuma la Ufrate ba kɔ fɛ jamana kuntigiw Tatenai ni Setar-Bozenai ni u jɛɲɔgɔnw ye masakɛ Darius ka ci fɔlen kɛ joona.
[14] Yahutu cɛkɔrɔbaw ka so jɔ baara ɲɛna kira Agize ni Ido denkɛ Zakari ka kiraya barika la. U ye so jɔ k'a ban ka kɛɲɛ ni Israɛl ka Ala ka ci fɔlen ani Sirus ni Darius ani Perse jamana masakɛ Artakserkses ka ci ye.
[15] So jɔli baara banna Adar kalo tile sabanan don masakɛ Darius ka masaya san wɔɔrɔnan la.
[16] Israɛl bɔnsɔn ni sarakalasebaaw ni Levitew ani minw tun bɛ jɔnya la, olu bɛɛ ye o so di Ala ma ni ɲagali ye.
[17] U ye sarakaw lase ka o so di Ala ma. U ye ntura kɛmɛ kɛ saraka ye o so seli ko la ani sagajigi kɛmɛ fila ani sagaden kɛmɛ naani. U ye bakɔrɔ tan ni fila kɛ Israɛl bɔnsɔn bɛɛ ka jurumu yafa saraka ye ka kɛɲɛ ni Israɛl denw tɔgɔw ye.
[18] U ye sarakalasebaaw sigi ka kɛɲɛ ni u kuluw ye ka Levitew sigi ka kɛɲɛ ni u ka baara kɛ waatiw ye walisa u ka Ala bato Jerusalɛm ka kɛɲɛ ni Musa ka sariya sɛbɛnnen ye.
[19] O kɔ, jɔnyadenw ye Tɛmɛnkan seli kɛ san kalo fɔlɔ tile tan ni naaninan don,
[20] k'a masɔrɔ sarakalasebaaw ni Levitew bɛɛ tun saniyara ka jɛya. U ye sarakaw faga jɔnyadenw ni u balima sarakalasebaaw ni u yɛrɛw kosɔn.
[21] Israɛl bɔnsɔn minw nana ka bɔ jɔnya la ani mɔgɔ minw ye u yɛrɛw saniya ka u mabɔ siya wɛrɛw ka nɔgɔlenya kow la ko u bɛ Matigi, Israɛl bɔnsɔn ka Ala ɲini ni u dusukun bɛɛ ye, olu bɛɛ ye Tɛmɛnkan seli dumuni kɛ ɲɔgɔn fɛ.
[22] U ye buuru fununbali seli kɛ ni ɲagali ye tile wolonwula kɔnɔ, k'a masɔrɔ Matigi ye u dusukun fa ɲagali la ani ka Asiri masakɛ dusukun yɛlɛma u fan fɛ fo a ye u dɛmɛ Matigi, Israɛl bɔnsɔn ka Ala ka so jɔli waati la.