[1] Masakɛ Artakserkses ka masaya waati la, mɔgɔ minw bɔra Babilonɛ ka taa ne fɛ Jerusalɛm, olu bɛnbaw bɔnsɔnw kuntigiw ni u burujuw filɛ ninw ye:
[2] Fineɛs bɔnsɔnw na, Gersɔn. Itamar bɔnsɔnw na, Daniɛl. Dawuda bɔnsɔnw na, Hatus.
[3] Pareos bɔnsɔnw na, Sekania denkɛ Zakari. Cɛ kɛmɛ ni biduuru taara o fɛ, u buruju ko sɛbɛnnen tun don.
[4] Pakat-Moab bɔnsɔnw na, Zerakija denkɛ Eljoenai. Cɛ kɛmɛ fila taara o fɛ.
[5] Sekania bɔnsɔnw na, Jakaziɛl denkɛ. Cɛ kɛmɛ saba taara o fɛ.
[6] Adɛn bɔnsɔnw na, Jonatan denkɛ Ebɛd. Cɛ biduuru taara o fɛ.
[7] Elam bɔnsɔnw na, Atali denkɛ Esayi. Cɛ biwolonwula taara o fɛ.
[8] Sefatia bɔnsɔnw na, Mikaɛl denkɛ Zebadia. Cɛ bisegin taara o fɛ.
[9] Joab bɔnsɔnw na, Jehiɛl denkɛ Abdiasi. Cɛ kɛmɛ fila ni tan ni segin taara o fɛ.
[10] Selomit bɔnsɔnw na, Josifia denkɛ. Cɛ kɛmɛ ni biwɔɔrɔ taara o fɛ.
[11] Bebai bɔnsɔnw na, Bebai denkɛ Zakari. Cɛ mugan ni segin taara o fɛ.
[12] Azgad bɔnsɔnw na, Hakatan denkɛ Jokanan. Cɛ kɛmɛ ni tan taara o fɛ.
[13] Adonikam bɔnsɔn kosana taw, olu tɔgɔ filɛ ninw ye, Elifelɛt ni Jeiɛl ani Semaɛja. Cɛ biwɔɔrɔ taara olu fɛ.
[14] Bigvai bɔnsɔnw na, Utai ni Zabud. Cɛ biwolonwula taara olu fɛ.
[15] Ba min ji bɛ woyo ka taa Ahava, ne ye u lajɛ o da la. An ye buguw turu ka tile saba kɛ yen. Ne ye mɔgɔw ni sarakalasebaaw filɛ, ne ma Levi bɔnsɔn si ye u la.
[16] O tuma la ne ye mɔgɔw bila ka taa Eliezɛr ni Ariɛl ani Semaɛja ni Elnatan ni Jarib ni Elnatan ni Natan ni Zakari ani Mesulam wele, olu tun ye kuntigiw ye. Ne ye Jojarib ni Elnatan fana wele, olu tun ye karamɔgɔw ye.
[17] Ne ye u ci ka taa kuntigi Ido sɛgɛrɛ Kasifia, k'a fɔ u ye ko u k'a fɔ Ido ni a balimaw Netiniɛnw ye Kasifia, ko u ka na ni baarakɛlaw ye Ala ka so baara kama.
[18] Ka kɛɲɛ ni an ka Ala ka marali ye, u nana ni Serebia ye, cɛ hakilitigi don. Makili bɔnsɔnw na kelen tun don, a bɔra Israɛl denkɛ Levi la. U nana ni a ni a denkɛw ni a balima cɛ tan ni segin ye,
[19] ani Hasabia ni Mɛrari bɔnsɔnw na Esayi, ani a balimaw ni u denkɛw cɛ mugan.
[20] Dawuda ni faamaw tun ye Netiniɛn minw di ko u ka baara kɛ Levitew ye, olu la cɛ kɛmɛ fila ni mugan nana, u bɛɛ kelen-kelen tɔgɔw fɔra.
[21] O tuma la ne ye sun don ko welewele da Ahava ba da la, ko an ka an yɛrɛw majigin an ka Ala ɲɛ kɔrɔ walisa a ka an mara ka taa hɛrɛ la, an yɛrɛw ni an denw ani an bolo fɛnw bɛɛ.
[22] Ne ma kɛlɛden kulu ni sotigiw si deli masakɛ fɛ, walisa u ka an tanga an juguw ma sira la. Ne maloyara a ma katuguni an tun y'a fɔ a ye ko an ka Ala bɛ a ɲinibaaw bɛɛ mara ka ko ɲuman kɛ u ye, nka minw b'a bila, a fanga ni a ka dimiya bɛ se olu bɛɛ ma.
[23] Ayiwa, an ye sun don ka an ka Ala deli o ko la. A ye an kan lamɛn.
[24] Ne ye kuntigi tan ni fila ɲɛnatɔmɔ sarakalasebaaw cɛma, olu tun ye Serebia ni Hasabia ani u balimaw la cɛ tan ye.
[25] Ne ye warijɛ ni sanu ani minan dilenw pese. Masakɛ ni a baarakɛɲɔgɔnw ani a ka kuntigiw ani Israɛl bɔnsɔn minw tun bɛ yen, olu bɛɛ ye u di ko u ka bila Ala ka so kɔnɔ.
[26] Ne ye u pese, u giriya kɛra warijɛ talan kɛmɛ wɔɔrɔ ni biduuru ye, warijɛ minanw kɛra warijɛ talan kɛmɛ ye, sanu minanw kɛra talan kɛme ye,
[27] ani sanu jifilen mugan, olu kɛra darik waa kelen ye ani nsiranɛgɛ daga ɲuman fila, olu tun bɛ manamana. U sɔngɔ bɛ sanu sɔngɔ bɔ.
[28] Ne y'a fɔ mɔgɔw ye ko: «Aw yɛrɛw ye aw bila Matigi ye, nin minanw fana bilara a ye ka u saniya. Nin warijɛw ni nin sanuw kɛra diyaɲe nili fɛnw ye Matigi, aw bɛnbaw ka Ala ye.
[29] Aw ka aw janto nin minanw na ka u mara ko ɲuman fo aw ka taa u pese sarakalasebaa kuntigiw ni Levitew ani Israɛl bɔnsɔn na gwa kuntigiw ɲɛ kɔrɔ Jerusalɛm, Matigi ka so bonw kɔnɔ.»
[30] O warijɛ ni sanu ani minanw giriya hakɛ dɔnnen kɔ, u dira sarakalasebaaw ni Levitew ma, olu ka taa n'u ye Jerusalɛm ka u bila an ka Ala ka so kɔnɔ.
[31] O kɔ, an bɔra Ahava ba da la san kalo fɔlɔ tile tan ni filanan don ko an bɛ taa Jerusalɛm. An ka Ala bolo tora an fɛ ka an tanga an juguw ni binkannikɛlaw ma an ka taama waati bɛɛ la.
[32] O kɔ, an sera Jerusalɛm ka an lafiya tile saba kɔnɔ.
[33] A tile naaninan don, an ye warijɛ ni sanu ni o minanw pese Ala ka so kɔnɔ ka u don Uri denkɛ sarakalasebaa Meremɔt bolo. Ale ni Fineɛs denkɛ Eleazar ani Levitew Josue denkɛ Jozabad ni Binui denkɛ Noadia tun bɛ ɲɔgɔn fɛ yen.
[34] U ye u bɛɛ dan ka u pese ka u giriya hakɛ sɛbɛn o waati yɛrɛ la.
[35] Jɔnyaden minw nana ka bɔ jɔnya jamana la, olu ye saraka jenitaw bɔ Israɛl bɔnsɔnw ka Ala ye, Israɛl bɔnsɔnw siyaw bɛɛ kosɔn. O kɛra ntura tan ni fila ye ani sagajigi bikɔnɔntɔn ni wɔɔrɔ ani sagaden biwolonwula ni wolonwula ani bakɔrɔ tan ni fila ka kɛ jurumu yafa sarakaw ye, olu bɛɛ jenina Matigi ɲɛ kɔrɔ.
[36] U ye masakɛ ka ci fɔlen lase o ba kɔ fɛ kuntigiw ni a gɔfɛrɛnɛrɛw ma. Olu sɔnna ka mɔgɔw ni Ala ka so dɛmɛ.