[1] O ko tɛmɛnnenw kɔ, Perse masakɛ Artakserkses ka masaya waati la, Seraja denkɛ Esdrasi sera yen. Seraja fa tun ye Azaria ye. Azaria fa tun ye Hilkija ye.
[2] Hilkija fa tun ye Salum ye. Salum fa tun ye Zadɔk ye. Zadɔk fa tun ye Akitub ye.
[3] Akitub fa tun ye Amaria ye. Amaria fa tun ye Azaria ye. Azaria fa tun ye Merajɔt ye.
[4] Merajɔt fa tun ye Zerakija ye. Zerakija fa tun ye Uzi ye. Uzi fa tun ye Buki ye.
[5] Buki fa tun ye Abisua ye. Abisua fa tun ye Fineɛs ye. Fineɛs fa tun ye Eleazar ye. Eleazar fa tun ye sarakalasebaa kuntigi Aron ye.
[6] O Esdrasi nana ka bɔ Babilonɛ. Matigi, Israɛl bɔnsɔn ka Ala ye sariya kitabu min di Musa ma, ale tun ye o sɛbɛnnikɛla ye. A tun bɛ o kɔrɔ dɔn kosɛbɛ. A ye fɛn o fɛn ɲini, masakɛ ye o bɛɛ di a ma katuguni Matigi a ka Ala tun bɛ a fɛ.
[7] Israɛl bɔnsɔn ni sarakalasebaaw ni Levitew ni dɔnkili dalaw ani dakɔlɔsibaaw ni Netiniɛnw fana nana Jerusalɛm, masakɛ Artakserkses ka masaya san wolonwulanan la.
[8] Esdrasi sera Jerusalɛm masakɛ ka masaya san wolonwulanan kalo duurunan la.
[9] Ayiwa san kalo fɔlɔ tile fɔlɔ la a bɔra Babilonɛ. San kalo duurunan tile fɔlɔ la, a sera Jerusalɛm k'a masɔrɔ a ka Ala tora a fɛ k'a mara,
[10] katuguni Esdrasi tun y'a dusukun bɛɛ don Matigi ka sariya kitabu kalanni la k'a siraw taama ka Israɛl bɔnsɔnw kalan sariya kitabu ni a ci fɔlenw la.
[11] Sarakalasebaa sɛbɛnnikɛla Esdrasi min kalannen tun bɛ Matigi ka ci fɔlenw ni a ka ko fɔlenw la Israɛl bɔnsɔn ta fan fɛ, masakɛ Artakserkses ye sɛbɛn min di o ma, o sɛbɛn kɔnɔ kuma filɛ nin ye:
[12] «Masakɛw ka masakɛ Artakserkses bɛ nin sɛbɛn di sarakalasebaa sɛbɛnnikɛla Esdrasi ma, o min bɛ sankolola Ala ka sariya dɔn kosɛbɛ.
[13] «Israɛl bɔnsɔnw ni sarakalasebaaw ni Levite minw bɛ ne ka mara la, ni u b'a fɛ ka taa, ne ye ci di olu bɛɛ ma ko u ka taa i fɛ Jerusalɛm.
[14] Ne, masakɛ ni ne laadibaa wolonwula ye i ci ka taa Juda bɔnsɔn ni Jerusalɛm mafilɛ k'a filɛ yala ni u bɛ i ka Ala ka sariya taama, o min donna i bolo.
[15] Ne ni ne baarakɛɲɔgɔnw ye warijɛ ni sanu min di ni diyaɲe ye Israɛl bɔnsɔn ka Ala ma, o min sigilen bɛ Jerusalɛm, i ka taa ni olu fana ye i bolo.
[16] I bɛ warijɛ ni sanu minw sɔrɔ Babilonɛ mara yɔrɔw bɛɛ la ani mɔgɔw ni sarakalasebaaw bɛ diyaɲe nili fɛn minw di u ka Ala ka so kosɔn Jerusalɛm, aw ka taa ni olu fana ye.
[17] «O de kosɔn i ka i jija ka nturaw ni sagajigiw ani sagadenw ani mugu sarakaw ni saraka bɔntaw san ni o wari ye ka taa ni u ye ka olu kɛ sarakaw ye Matigi aw ka Ala ye saraka bɔlan kan Jerusalɛm.
[18] O warijɛ ni sanu tɔ minw bɛ to, fɛn min ka ɲi e ni i balimaw ɲɛ na, i ka olu san ni u ye ka kɛɲɛ ni aw ka Ala sago ye.
[19] Minan minw dira i ma i ka Ala ka so kɔnɔ baaraw kama, i ka olu bila i ka Ala ɲɛ kɔrɔ Jerusalɛm.
[20] Ni i mago bɛ magoɲɛ fɛn wɛrɛw la i ka Ala ka so kosɔn, i ka o wari bɔ masakɛ ka nafolo mara yɔrɔw la.
[21] «Ka fara o kan, ne masakɛ Artakserkses, nafolo marabaa minw bɛ o ba kɔ fɛ, ne bɛ ci di olu bɛɛ ma ko sarakalasebaa sariya sɛbɛnnikɛla Esdrasi min kalanna sankolola Ala ka sariya la, ko ni o ye fɛn o fɛn ɲini, u ka o beɛ di a ma,
[22] fo ka taa se warijɛ talan kɛmɛ ma ani alikama kisɛ kor ɲɛ kɛmɛ ni diwɛn bat ɲɛ kɛmɛ ani tulu bat ɲɛ kɛmɛ ani a magoɲɛ kɔgɔ fana.
[23] Sankolola Ala ye ci minw bɛɛ fɔ a ka so ko la, o ka kɛ sisan walisa a ka dimiyaba kana se masaya ni masakɛ ni a denkɛw ma.
[24] Sarakalasebaaw ni Levitew ani dɔnkili dalaw ni dakɔlɔsibaaw ni Netiniɛnw ani Ala ka so kɔnɔ baarakɛlaw ta fan fɛ, an b'a fɔ aw ye ko a dagalen tɛ ka nisɔngɔ wala faama wari wala wusuru si bila olu kan.
[25] «E yɛrɛ ta fan fɛ Esdrasi, i yɛrɛ ka kuntigiw ni kiritigɛlaw sigi minw bɛɛ bɛ Ala ka sariya dɔn, i ka olu sigi ka kɛɲɛ ni i ka Ala ka hakilitigiya dilen ye i ma. Olu ka tilennenya kow kɛ mɔgɔw ye o ba kɔ fɛ. Mɔgɔ minw tɛ o sariya dɔn, i ka olu kalan o sariya kow la.
[26] Ni mɔgɔ min ma i ka Ala ka sariyaw ni masakɛ ka sariyaw sira taama, aw ka kiri tigɛ o tigi kan. O ka ɲangi ka bila kaso la wala a ka faga wala a ka bila jɔnya la.»
[27] Esdrasi ko: «Matigi, an bɛnbaw ka Ala ka tanu, o min ye dusukun ɲuman di masakɛ ma ka Matigi ka so bonya nin cogo la Jerusalɛm.
[28] A ye ne ko diya masakɛ ni a baarakɛɲɔgɔnw ani a ka jalatigi barikamaw ye. O de kosɔn ne ye ja gɛlɛya sɔrɔ k'a masɔrɔ Matigi ne ka Ala bɛ ne mara. Ne ye Israɛl bɔnsɔn kuntigiw lajɛ ka taa ni olu ye ne fɛ.»