[1] Ayiwa Israɛl bɔnsɔn Yahutu minw sigilen tun bɛ Juda jamana la ani Jerusalɛm, kira Agize ni Ido denkɛ kira Zakari y'a daminɛ ka kiraya kɛ olu ɲɛ na Israɛl ka Ala tɔgɔ la.
[2] O tuma la Sealtiɛl denkɛ Zorobabɛl ni Jozadak denkɛ Josue wulila ka Ala ka so jɔli daminɛ Jerusalɛm. Ala ka kiraw tun bɛ u fɛ ka u dɛmɛ.
[3] O tuma la jamana kuntigi Tatenai min tun bɛ ba kɔ fɛ, o ni Setar-Bozenai ni u jɛɲɔgɔnw taara Yahutuw sɛgɛrɛ k'a fɔ u ye ko: «Jɔn y'a fɔ aw ye ko aw ka nin so jɔ ka nin kogow lawuli?»
[4] U ko fana: «Minw bɛ nin so jɔ, olu tɔgɔw ko di?»
[5] Nka Ala ɲɛ tora Yahutu cɛkɔrɔbaw la ka u dɛmɛ. U ma u bali u ka baara la tun sani ka sɛbɛn dɔ ci Darius ma, o ka u jaabi o ko la.
[6] Ufrate ba kɔ fɛ jamana kuntigi Tatenai ni Setar-Bozenai ni u baarakɛɲɔgɔnw ani Afarsakkaw ye sɛbɛn ci masakɛ Darius ma.
[7] U ye sɛbɛn ci masakɛ ma o ko la ko: «Masakɛ Darius, hɛrɛ ka kɛ i ye.
[8] «An b'a fɛ masakɛ k'a dɔn ko an tun taara Juda bɔnsɔn ka jamana kɔnɔ, Alaba ka so kɔnɔ. Yahutuw b'a la ka so jɔ ni kaba dɛsɛnenw ye, jiriw sigira kogo kan ka ban. Baara kɔni b'a la ka taa ɲɛ kosɛbɛ u bolo.
[9] O tuma la an ye u ka kuntigiw ɲininka ko jɔni y'a fɔ ko u ka nin so jɔ k'a kogow lawuli?
[10] An ye u ɲininka u tɔgɔw la fana walisa an ka olu fɔ i ye. An ye u kuntigiw tɔgɔw sɛbɛn.
[11] «O mɔgɔw ye an jaabi ko u ye sankolo ni dugukolo kan Ala ka baaradenw ye. Batoso min tun jɔra ka kɔrɔ, u b'a la ka o jɔ ko kura. A bɛ san caman bɔ, Israɛl bɔnsɔn ka masakɛba dɔ ye o so jɔ k'a laban.
[12] Nka u bɛnbaw ye sankolola Ala dusu dimin, o Ala ye u don Babilonɛ masakɛ Nebukadnezar bolo. Kaldekaw ye nin so tiɲɛn ka a mɔgɔw cɛ ka taa jɔnya la Babilonɛ.
[13] O tuma la Babilonɛ masakɛ Sirus ka masaya san fɔlɔ la, masakɛ Sirus y'a fɔ ko u ka Ala ka so jɔ ko kura.
[14] Masakɛ Nebukadnezar ye sanu minan ni warijɛ minan minw ta ka bɔ Alabatosoba kɔnɔ Jerusalɛm ka taa u bila Babilonɛ batoli kɛ so kɔnɔ, masakɛ Sirus ye olu ta ka bɔ batoli kɛ so kɔnɔ ka olu don Sezbazar bolo, a tun ye o min sigi ka kɛ jamana kuntigi ye.
[15] A y'a fɔ o ye ko a ka o minanw ta ka taa n'u ye Ala ka so kɔnɔ Jerusalɛm, ko Ala ka so ka jɔ a jɔ yɔrɔ kɔrɔ la ko kura.
[16] O de kosɔn Sezbazar nana yan ka Ala ka so jusigilan dila Jerusalɛm. Kabini o waati la fo ka na se sisan ma, u bɛ o so jɔli baara la, a ma ban fɔlɔ.
[17] «Ayiwa sisan, ni a diyara masakɛ ye, ni a ka ɲi i ɲɛ na, an ka masakɛ ka nafolo mara yɔrɔ lajɛ Babilonɛ walisa k'a filɛ ni tiɲɛ don ko masakɛ Sirus ye ci di ko Ala ka so ka jɔ Jerusalɛm. O kɔ, masakɛ na a ka miirili lase an ma o ko la.»