[1] O kow bɛɛ kɛlen kɔ, kuntigiw gɛrɛla ne la k'a fɔ ne ye ko: «Israɛl mɔgɔw ni sarakalasebaaw ani Levitew ma sɔn ka fara nin jamana mɔgɔw la. U bɛ Kanankaw ni Hɛti bɔnsɔnw ni Ferɛz siya ni Jebuskaw ni Amɔn bɔnsɔnw ni Moab bɔnsɔnw ni Misirakaw ani Amɔr siya ka ko haramulenw kɛ.
[2] U ye olu denmusow furu ka kɛ u ni u denkɛw musow ye. O cogo la siya senuma ye u yɛrɛw ɲaami o jamana siyaw la. Kuntigiw ani ɲɛ mɔgɔw fɔlɔ ye o jurumu de kɛ.»
[3] Ne ye o mɛn tuma min na, ne dusu kasilen ye ne ka dulɔki ni ne ka forokiya fara ka ne kunsigi ni ne bonbonsi tufa ka u bɔ ka ne sigi.
[4] O tuma la mɔgɔ minw yɛrɛyɛrɛla Israɛl ka Ala ka kuma ɲɛ jɔnya mɔgɔw ka sariya tiɲɛnni kosɔn, olu bɛɛ ye ɲɔgɔn lajɛ ne fɛ. Ne dusu kasilen sigilen tora fo wula da fɛ saraka bɔ tuma la.
[5] Wula da fɛ saraka bɔ tuma la, ne wulila ka bɔ ne ɲɛnasisi yɔrɔ la ni ne ka dulɔki ni ne ka forokiya faralen ye. Ne ye n'ɲɔngiri ka ne bolo kɔrɔta Matigi ne ka Ala fan fɛ.
[6] Ne ko: «Ne ka Ala, ne maloyara, ne kunnasirila, ne tɛ se ka ne ɲɛ sin i ma, ne ka Ala. An ka tilenbaliya kow cayara fo ka an tunun. An ka hakɛw bonyara fo ka se sankolo ma.
[7] Kabini an bɛnbaw tilew la fo ka na se bi ma, an jalakilen don. An ka tilenbaliya kow kosɔn, an ni an ka masakɛw ni an ka sarakalasebaaw donna nin jamana masakɛw bolo ka an faga ni npan ye ka an cɛ ka taa jɔnya la ka an bolo fɛnw bɔsi an na, an maloyalen don i ko a kɛra cogo min na bi.
[8] Nka sisan Matigi an ka Ala, i makarila an na ka an dɔw labɔ jɔnya la ka dogo yɔrɔ di an ma i ka yɔrɔ senuma la. An ka Ala, i tun b'a fɛ ka i ka kɛnɛyeelen bɔ an ɲɛw ye ka ɲɛnamaya dɔɔnin di an ma an ka jɔnya la.
[9] An kɛra jɔnw ye, nka an ka Ala, i ma an bila ka an to yen an ka jɔnya la. I y'a to Perse masakɛw ka makari an na ka ɲɛnamaya di an ma, walisa an ka i ka so jɔ ka a tiɲɛn yɔrɔw dila. I ye dogo yɔrɔ di an ma Juda jamana la ani Jerusalɛm.
[10] «Ayiwa sisan, an ka Ala, an na mun fɔ nin bɛɛ tɛmɛnnen kɔ? K'a masɔrɔ an banna i ka ci fɔlenw ma,
[11] i ye olu minw fɔ i ka baaraden kiraw ye ka lase an ma ko an bɛ na don jamana min kɔnɔ k'a kɛ an ta ye, o jamana nɔgɔlen don o jamana mɔgɔw fɛ ni u ka ko haramulenw ni u ka nɔgɔlenya kow ye. U ye jamana yɔrɔ bɛɛ fa ni u ka nɔgɔlenya kow ye.
[12] I y'a fɔ fana ko, an kana an denmusow furu u denkɛw ma, an kana u denmusow furu an denkɛw ye. Ko an kana sɔn ka u dɛmɛ walisa u ka fɛnw ka caya. Ni an ma o kɛ, an barika na bonya ka o jamana dumuni ɲuman dun ka ciyɛn sɔrɔ an denw ye badaa.
[13] An ka Ala, an ka tilenbaliya kow ni an ka jurumuw kosɔn nin bɔnɛ kow bɛɛ sera an ma, nka hali o, i ma an sara ka kɛɲɛ ni an ka jurumuw ye. I ye an dɔw to yen.
[14] An bɛ se ka i ka ci fɔlenw tiɲɛn ko kura ka furu kɛ o siya haramulenw fɛ cogo di? Siga t'a la, i ka dimiyaba na wuli an kama ka an bɛɛ halaki ka an ban. An si ɲɛnama tɛna to.
[15] Matigi, Israɛl bɔnsɔn ka Ala, i tilennen don k'a masɔrɔ an la mɔgɔ dama dɔw kisira i ko an ɲɛ b'a la cogo min na bi. A filɛ, an bɛ i ɲɛ kɔrɔ. An jalakilen don, o de kosɔn mɔgɔ si tɛ se ka jɔ i ɲɛ kɔrɔ.»