[1] Ayiwa Juda bɔnsɔn ni Benjamɛn bɔnsɔn juguw y'a mɛn ko jɔnyadenw b'a fɛ ka yɔrɔ senuma jɔ Matigi, Israɛl bɔnsɔn ka Ala ye minkɛ,
[2] u taara Zorobabɛl ni u la gwatigiw sɛgɛrɛ k'a fɔ olu ye ko: «An b'a fɛ ka aw dɛmɛ Alabatosoba jɔli la, k'a masɔrɔ an fana bɛ aw ka Ala ɲini i ko aw b'a kɛ cogo min na. Asiri jamana masakɛ Esar-Hadon min nana ni an ye yan, kabini o tilew la, an bɛ saraka faga a ye.»
[3] Nka Zorobabɛl ni Josue ani Israɛl bɔnsɔn na kuntigi tɔw y'u jaabi ko: «Aw tɛ se ka an dɛmɛ an ka Ala ka so jɔli la. An dama b'a fɛ ka o so jɔ Matigi, Israɛl ka Ala ye i ko Perse masakɛ Sirus y'a fɔ an ye cogo min na.»
[4] O tuma la jamana mɔgɔw ye Juda bɔnsɔn bali ka u lasiran o so jɔli ko la.
[5] U ye mɔgɔ dɔw sara ka so jɔli baara dabila Perse masakɛ Sirus ka waati bɛɛ la fo ka taa se Perse masakɛ Darius ka waati ma.
[6] Asuerus ka masaya daminɛ waati la, u ye sɛbɛn dɔ kɛ ka Juda bɔnsɔn ni Jerusalɛmkaw don bolo la.
[7] O kɔ, Artakserkses ka waati la, Bislan ni Mitredat ni Tabeɛl ani u jɛɲɔgɔnw ye sɛbɛn dɔ kɛ k'a di Perse masakɛ Artakserkses ma. O sɛbɛn kɛra ni Sirikan sɛbɛndenw ye Sirikaw ka kan na.
[8] Jamana kuntigi Rehum ni sɛbɛnnikɛla Simsai ye o sɛbɛn kɛ k'a ci masakɛ Artakserkses ma Jerusalɛm kama.
[9] O sɛbɛnni kɛra mɔgɔ minw fɛ, olu filɛ: jamana kuntigi Rehum ni sɛbɛnnikɛla Simsai ni u jɛɲɔgɔn tɔw, Denkaw ni Arfarsatakkaw ni Tarpɛlkaw ni Afarasikaw ni Erɛkkaw ni Babilonɛkaw ni Susekaw ni Dehakaw ni Elamkaw
[10] ani siya tɔw, cɛ tɔgɔba fangatigi Osnapar nana ni olu minw ye ka u bila Samari dugu la ani o ba kɔ fɛ yɔrɔ dɔw la.
[11] U ye sɛbɛn min kɛ k'a ci Artakserkses ma, o kɔnɔ kuma filɛ nin ye: «I ka baaraden minw bɛɛ sigilen bɛ o ba kɔ fɛ, olu bɛ i fo.
[12] «Masakɛ k'a dɔn ko Yahutu minw bɔra i fɛ ka na, olu sera an ma Jerusalɛm. U bɛ o dugu jugu murutilen kan k'a jɔ. U bɛ a lamini kogow jɔ ko kura ka a jusigilan labɛn.
[13] Ayiwa, masakɛ k'a dɔn ko ni nin dugu jɔra ko kura, ni a kogo wulila, u tɛna faama wari wala nisɔngɔ wala duwaɲe wari sara masakɛ ye tun. A laban na kɛ masakɛ bɔnɛli ko ye.
[14] Ayiwa an bɛ kɔgɔ min dumu, o bɛ bɔ masakɛ ka so kɔnɔ, a tɛ bɛn an ka masakɛ dɔgɔyali ko si ye. O de y'a to an ye mɔgɔw bila ka taa o ko fɔ masakɛ ye.
[15] I ka i bɛnbaw ka hakili jigin kitabu lajɛ, i n'a sɔrɔ ko nin dugu ye dugu murutilen de ye, ko u tun bɛ masakɛw ni jamanaw ka kow tiɲɛn. Kabini waati jan tɛmɛnnenw na, u tun bɛ muruti. O de kosɔn nin dugu cira.
[16] An b'a fɔ masakɛ ye, ko ni o dugu jɔra ka a lamini kogow jɔ ko kura, o tuma la i tɛna se ka nin ba kɔ jamana mara tun.»
[17] Jamana kuntigi Rehum ni sɛbɛnnikɛla Simsai ni u jɛɲɔgɔn minw sigilen tun bɛ Samari ani yɔrɔ wɛrɛw la ba fan dɔ fɛ, masakɛ ye jaabili ci olu ma ko: «Aw ni se.
[18] Aw ye sɛbɛn min ci ne ma, o bɛɛ kalanna ne ɲɛ na k'a jɛya.
[19] Ka fara o kan, ne ye ci min di, o sɛgɛsɛgɛli kɛra. A sɔrɔla ko kabini tuma jan nin dugu wulila masakɛw kama, nin dugu bɛ murutili ni kɛlɛ lawuli tuma bɛɛ.
[20] Masakɛ barikamaw sɔrɔla Jerusalɛm minw ye o ba kɔ fɛ jamanaw mara, faama wari ni nisɔngɔ ni duwaɲe wari dira olu ma.
[21] Ayiwa, aw ka ci fɔ sisan ko o cɛw ka o baara dabila, ko o dugu kana jɔ tun fo ne ka o ko fɔ.
[22] A' ye aw yɛrɛw kɔlɔsi o mɔgɔw ta fan fɛ, aw kana salaya walisa bɔnɛ ni tiɲɛnni kana se masakɛw ma.»
[23] Kabini masakɛ Artakserkses ka sɛbɛn kalanna Rehum ni sɛbɛnnikɛla Simsai ni u jɛɲɔgɔnw ɲɛ na, u taara Yahutuw sɛgɛrɛ Jerusalɛm ka o ko fɔ u ye ni diyagoya ni fariya ye ka u ka baara dabila.
[24] O tuma la Ala ka so jɔli dabilara Jerusalɛm. A baara jɔra fo ka taa se Perse masakɛ Darius ka masaya san filanan ma.