[1] San kalo wolonwulanan selen, Israɛl bɔnsɔn bɛɛ tun bɛ u ka duguw kɔnɔ. Jama ye ɲɔgɔn lajɛ Jerusalɛm.
[2] O tuma la Jozadak denkɛ Josue ni a balima sarakalasebaaw ani Sealtiɛl denkɛ Zorobabɛl ni o balimaw wulila ka Israɛl bɔnsɔn ka Ala ka saraka bɔlan jɔ ka saraka jenitaw lase o kan i ko a sɛbɛnnen bɛ Ala ka cɛ Musa ka sariya la cogo min na.
[3] U ye saraka bɔlan jɔ o jusigilan kɔrɔ kan hali k'a sɔrɔ u tun bɛ siran o jamana kɔnɔ mɔgɔw ɲɛ. U ye saraka jenitaw lase o kan Matigi ye sɔgɔma ni wula fɛ.
[4] O kɔ, u ye Gwakɔrɔsigi seli kɛ i ko a sɛbɛnnen bɛ cogo min na. O kɔ, u ye saraka jenitaw lase don o don ka kɛɲɛ ni don o don ta cogo fɔlen ye.
[5] O kɔ, u ye don o don saraka jenitaw lase ani kalo kura saraka jenitaw ani Matigi ka seli senuma sarakaw ani mɔgɔ minw bɛɛ nana ni diyaɲe nili fɛnw ye ka u di Matigi ma.
[6] K'a daminɛ san kalo wolonwulanan tile fɔlɔ la, u ye saraka jenitaw laseli daminɛ Matigi ye k'a sɔrɔ Matigi ka so ju ma sigi fɔlɔ.
[7] U ye wari di masɔnw ni mininsiyew ma ka balo ni minni fɛn ani tulu di Sidɔnkaw ni Tirkaw ma walisa olu ka na ni sedere jiriw ye kɔgɔji kan Jafo dankan na ka bɔ Liban ka kɛɲɛ ni Perse masakɛ Sirus ka kuma fɔlen ye u ye.
[8] U selen Ala ka so ma Jerusalɛm o san filanan kalo filanan la, Sealtiɛl denkɛ Zorobabɛl ni Jozadak denkɛ Josue ani u balima tɔw sarakalasebaaw ni Levitew ani minw bɛɛ bɔra jɔnya la ka na Jerusalɛm. Olu ye baara daminɛ ka Levitew sigi k'a daminɛ san mugan mɔgɔw la ka taa se u ɲɛ mɔgɔw ma walisa olu ka kɛ Matigi ka so jɔli baara ɲɛnabɔbaaw ye.
[9] Josue ni a denkɛw ni a balimaw, Kadmiɛl ni a denkɛw, Juda bɔnsɔn kɔni, ani Henadad denkɛw ni olu denkɛw ni u balimaw Levitew ye u labɛn ka kɛ Matigi ka so kɔnɔ baarakɛlaw kuntigiw ye.
[10] So jɔlaw ye Matigi batosoba jusigilan jɔ tuma min na, u ye sarakalasebaaw jɔ yen ni buru fyɛtaw ye u bolo. U ka sarakalasebaa finiw tun bɛ u kan na. Asaf bɔnsɔn Levitew fana jɔlen tun bɛ yen. Nsiranɛgɛ tɛgɛrɛw tun bɛ u bolo walisa u ka Matigi tanu ka kɛɲɛ ni Israɛl ka masakɛ Dawuda ka ci fɔlenw ye.
[11] U ye ɲɔgɔn dalaminɛ dɔnkili la ka Matigi tanu ka barika da a ye, u ko: «Katuguni a ka ɲi, a ka makari bɛ to Israɛl bɔnsɔn ye badaa.» Jama bɛɛ ye pɛrɛnkanba bɔ ni ɲagali ye ka Matigi tanu k'a masɔrɔ u ye Matigi ka so jusigilan jɔ.
[12] Nka sarakalasebaaw ni Levitew ani kuntigi caman, cɛkɔrɔbaw kɔni, minw tun ye Alabatosoba fɔlɔ ye, olu kasira ni kanba ye o jusigilan jɔ tuma la. U la caman fana ye ɲagalikanba bɔ ka ɲagali.
[13] Ɲagalikanw ni kasikanw tun ka bon cogo min na, mɔgɔw ma se ka olu faranfasi ka bɔ ɲɔgɔn na k'a masɔrɔ o mankan tun bɛ mɛn yɔrɔ jan.