[1] O tile sabanan don, Esiteri ye a ka masaya fini don a la ka taa masakɛ ka du kɔnɔ. Masakɛ sigilen tun bɛ a ka masasigilan kan a ka masaya so kɔnɔ k'a ɲɛ sin masaya so donda ma.
[2] Masakɛ ye Esiteri jɔlen ye du kɔnɔ tuma min na, a ye ko ɲuman kɛ Esiteri ye. A y'a bolo bere sanuma yankan Esiteri kun na. Esiteri y'i madon ka maga a sanu bere nun na.
[3] Masakɛ y'a fɔ a ye ko: «I bɛ mun fɛ, masakɛ muso Esiteri? I bɛ mun ɲini? Hali ni i ye masaya tilancɛ ɲini, ne na o di i ma.»
[4] Esiteri y'a jaabi ko: «Ni a diyara i ye, masakɛ, ne ye dumuniba dila ko e ni Haman ka dumuni kɛ ne fɛ bi.»
[5] Masakɛ ye ci bila ko Haman ka na joona walisa Esiteri ka kuma fɔlen ka kɛ. Ayiwa Esiteri ye dumuniba min dila, masakɛ ni Haman taara o dumuni la.
[6] Ka u to diwɛn min la, masakɛ y'a fɔ Esiteri ye ko: «E mana fɛn min deli, o na kɛ i ye. Mun nege bɛ i la? Hali ni a kɛra masaya tilancɛ ye, o na di i ma.»
[7] Esiteri y'a jaabi ko: «Ne bɛ fɛn min ɲini, fɛn min nege bɛ ne la, o filɛ nin ye.
[8] Ni ne ko diyara i ye, masakɛ, ni i bɛ sɔn ka ne ka fɛn delilen di ne ma ka ne sago dafa, ne na dumuniba labɛn sini, e ni Haman ka na dumuni kɛ ko kura. O tuma la ne na masakɛ jaabi ka kɛɲɛ ni i ka ci fɔlen ye.»
[9] Haman nisɔndiyalen ni a dusukunɲagalilen bɔra yen o don na. Nka a ye Mardose sigilen ye masakɛ ka donda la tuma min na, a ma sɔn ka wuli a ɲɛ kɔrɔ, a ma sɔn ka i lamaga yɛrɛ, a diminna Mardose kɔrɔ kosɛbɛ haali.
[10] O bɛɛ n'a ta Haman ye a yɛrɛ minɛ ka taa a ka so ka a teriw ni a muso Zerɛs wele.
[11] O kɔ, Haman kumana olu fɛ a ka fɛntigiyaba ani a den caman ko la. Masakɛ ye ale kɔrɔta ka tɛmɛn a ka kuntigiw ni a ka masaya so kɔnɔ baaradenw bɛɛ kan cogo min na, a ye o bɛɛ lakali u ye.
[12] A y'a fɔ fana ko: «Ka fara o bɛɛ kan, masakɛ muso Esiteri ma mɔgɔ si wele o dumuniba la masakɛ fɛ ne kelen kɔ. Ne ni masakɛ fana welela sini tun.
[13] Nka o si tɛ ne wasa ni ne bɛ Yahutu Mardose sigilen ye masakɛ ka so da la.»
[14] O tuma la a muso Zerɛs ani a teriw bɛɛ y'a jaabi ko: «Jirijan dɔ ka dila min bɛ nɔnkɔnɲɛ biduuru bɔ. Sini sɔgɔma i k'a ɲini masakɛ fɛ ko Mardose ka dulon o jiri la. O kɔ, i nisɔndiyalen na taa masakɛ fɛ dumuniba la.» O kuma diyara Haman ye. A ko jirijan ka turu.