[1] Ayiwa san kalo tan ni filanan, min ye Adar kalo ye, o tile tan ni sabanan don, Yahutuw juguw jigi tun b'a kan ko u na se sɔrɔ Yahutuw kan, masakɛ tun ye ci di ko Yahutuw bɛɛ ka halaki don min na, o yɛlɛmana katuguni Yahutuw ye se sɔrɔ u juguw kan.
[2] Yahutuw ye ɲɔgɔn lajɛ u yɛrɛ ka dugubaw la masakɛ Asuerus ka mara yɔrɔw bɛɛ la ka u kɛlɛbaaw bɛɛ gosi. Mɔgɔ si ma se sɔrɔ u kan sabu mɔgɔw bɛɛ siranna u ɲɛ.
[3] Jamana kuntigiw ni baarakɛlaw ni maraw kuntigiw ani masakɛ kɔrɔ sigibaaw ye Yahutuw dɛmɛ k'a masɔrɔ u bɛɛ siranna Mardoseɲɛ.
[4] Mardose fanga bonyara masaya la. A tɔgɔ bɔra jamana yɔrɔw bɛɛ la. A tun bɛ barika sɔrɔ ka taa ɲɛ.
[5] Yahutuw ye u juguw bɛɛ gosi ni npan ye ka u faga ka u halaki ka u sago kɛ u koniyabaaw la.
[6] Yahutuw ye mɔgɔ kɛmɛ duuru faga masadugu Suse kɔnɔ.
[7] U ye Parsandata ni Dalifon ni Aspata
[8] ni Porata ni Adalia ni Aridata
[9] ni Parmasta ni Arisai ni Aridai ani Vajezata faga.
[10] O mɔgɔ tan tun ye Yahutuw tɔɔrɔbaa Haman denkɛw ye. Haman fa tun ye Hamedata ye. Nka u ma nafolo si cɛ.
[11] Mɔgɔ minw fagara masadugu Suse kɔnɔ, olu dama fɔra masakɛ ye o don na.
[12] Masakɛ y'a fɔ Esiteri ye ko: «Yahutuw ye mɔgɔ kɛmɛ duuru faga masadugu Suse kɔnɔ ani Haman denkɛ cɛ tan. U dun ye mun kɛ masakɛ ka mara tɔw la? I bɛ mun deli tun? O na kɛ i ye. Fɛn wɛrɛ nege bɛ i la tun wa? O na kɛ i ye ka i wasa.»
[13] Esiteri y'a jaabi ko: «Ni a diyara i ye, masakɛ, Yahutu minw bɛ masadugu Suse kɔnɔ, i ka sɔn ko olu ka bi taɲɔgɔn kɛ sini tun, u ka Haman denkɛ tan suw dulon jiri la.»
[14] Esiteri ye min deli, masakɛ sɔnna o ma. O ci fɔra masadugu Suse kɔnɔ fan bɛɛ la. U ye Haman denkɛ tan dulon jiri la.
[15] Yahutu minw tun bɛ masadugu Suse kɔnɔ, olu ye ɲɔgɔn lajɛ ko kura Adar kalo tile tan ni naaninan don. U ye mɔgɔ kɛmɛ saba faga masadugu Suse kɔnɔ nka u ma fɛn si cɛ.
[16] Yahutu tɔ minw tun bɛ masakɛ ka mara la, olu ye ɲɔgɔn lajɛ walisa ka u ni kisi ka u juguw kɛlɛ. Olu ye u juguw mɔgɔ waa biwolonwula ni duuru faga nka u ma fɛn si cɛ.
[17] O kɛra Adar kalo tile tan ni sabanan don. A tile tan ni naaninan don, u ye u lafiya ka nisɔndiya dumuniba kɛ.
[18] Yahutu minw tun bɛ masadugu Suse kɔnɔ, olu ye ɲɔgɔn lajɛ o kalo kelen tile tan ni sabanan ni a tile tan ni naaninan don. Olu ye u lafiya a tile tan ni duurunan don ka dumuniba kɛ ka ɲagali.
[19] O de kosɔn Yahutu minw sigilen bɛ kungo kɔnɔ dugu misɛnw kɔnɔ, olu bɛ Adar kalo tile tan ni naaninan bila k'a kɛ nisɔndiya seli ye ka dumuniba kɛ ka dumuni fɛnw ciɲɔgɔn ma.
[20] Yahutu minw tun bɛ masakɛ Asuerus ka mara la, minw yɔrɔ ka jan ani minw yɔrɔ ka surun, Mardose ye sɛbɛn kɛ ka ci olu bɛɛ ma
[21] k'a fɔ u ye k'a gɛlɛya ko u ka Adar kalo tile tan ni naaninan ni a tile tan ni duurunan bila ka kɛ seli don ye san o san,
[22] katuguni Yahutuw ye se sɔrɔ u juguw kan ka lafiya sɔrɔ. U ka tɔɔrɔ min tun latigɛra o kalo la, o yɛlɛmana ka kɛɲagali ye o don na. U kasi ko kɛraɲagali ye. O kosɔn a ye ci di ko u ka o don bila ka kɛ dumuniba niɲagaliba don ye ka dumuni fɛnw ciɲɔgɔn ma ka nili fɛnw tilatila faantanw cɛ.
[23] U ko u na to ka o kow kɛ ka kɛɲɛ ni Mardose ka ko sɛbɛnnen ye.
[24] K'a masɔrɔ Agag bɔnsɔn Hamedata denkɛ Haman, min tun ye Yahutuw tɔɔrɔbaa ye, o tun ye jɛ siri Yahutuw kama ka pur da, o kɔrɔ ka kala da, ko u ka Yahutuw bɛɛ halaki ka u ban.
[25] Nka Esiteri taara masakɛ ɲɛ kɔrɔ tuma min na, Haman tun ye jɛ min siri Yahutuw kama, o ko bira a yɛrɛ kan. U ye a ni a denkɛw dulon jiri la.
[26] O de kosɔn u bɛ o don wele ko Purim, pur tɔgɔ la, ka kɛɲɛ ni Mardose ka sɛbɛn cilen ye ani u yɛrɛ ka ko yelenw kosɔn ani min kɛra u la,
[27] Yahutuw ye o kɛ sariya ye ka o sariya sigi u yɛrɛw ni u bɔnsɔnw ye ani mɔgɔ minw nɔrɔla Yahutuw la, ko nin seli ye wajibi ye u bɛɛ kan san o san o tile fila kɔnɔ ka kɛɲɛ ni o sariya sɛbɛnnen ye a waati latigɛlen na.
[28] Ko u bɔnsɔn nataw bɛɛ hakili ka to o seli donw na, gwaw kɔnɔ ani maraw bɛɛ la ani duguw bɛɛ kɔnɔ walisa o donw ka kɛ Purim seli donw ye, ko Yahutuw ni u bɔnsɔnw kana ɲinɛ o kɔ u bɔnsɔn nataw bɛɛ la.
[29] Abihail denmuso, masakɛ muso Esiteri ani Yahutu Mardose ye sɛbɛn filanan ci ka o Purim sɛbɛn ko jɛya.
[30] O kɔ, u ye o sɛbɛn ci Yahutuw bɛɛ ma Asuerus ka mara yɔrɔ kɛmɛ ni mugan ni wolonwula bɛɛ la. O sɛbɛn kɔnɔ kuma tun ye hɛrɛ kuma ye.
[31] A ye Purim seli ko fɔ u ye k'a jɛya ko u k'a kɛ a waati fɔlen na i ko Yahutu Mardose ani masakɛ muso Esiteri y'a fɔ cogo min na. O ko latigɛra u yɛrɛw ni u bɔnsɔnw ye i ko sun donni ko ni kasili ko latigɛra u ye cogo min na.
[32] Ayiwa Esiteri ka ci fɔlen ye Purim seli ko sabati. O bɛɛ sɛbɛnna kitabu kɔnɔ.