[1] O don yɛrɛ la, masakɛ Asuerus ye Yahutuw tɔɔrɔbaa Haman ka so di masakɛ muso Esiteri ma. O kɛlen, Mardose taara masakɛ yɔrɔ katuguni Esiteri tun y'a jira a la ko u ye balimaw ye.
[2] Masakɛ ye a ka bolonkɔni la nɛgɛ bɔ k'a di Mardose ma, katuguni a tun ye o minɛ ka bɔ Haman bolo la. Esiteri ye Mardose sigi Haman ka so kun na.
[3] Ayiwa, Esiteri kumana masakɛ ɲɛ kɔrɔ ko kura k'i bi a sen kɔrɔ ka a deli niɲɛji ye, ko Agag bɔnsɔn Haman tun ye ko jugu ni dabali minw labɛn Yahutuw kama, ko o kana kɛ.
[4] Masakɛ y'a ka sanu bere sin Esiteri ma. Esiteri wulila k'i jɔ masakɛ ɲɛ kɔrɔ.
[5] A ko: «Ni a diyara i ye, masakɛ, ni ne ye nɛɛma sɔrɔ i fɛ, ni nin ko kɛra i sago ye, ni ne ko ka di i ye, i ka ci di ka Hamedata denkɛ Agag bɔnsɔn Haman ka ko fɔlenw yɛlɛma, o min ye ci di ko u ka Yahutuw bɛɛ halaki ka bɔ masakɛ ka mara yɔrɔw bɛɛ la. Ne bɛ i deli ko sɛbɛn dɔ wɛrɛw ka ci ko o ko fɔlenw kana kɛ,
[6] k'a masɔrɔ ne bɛ se ka bɔnɛ setɔ ye ne ka mɔgɔw ma ka o muɲu cogo di? Ne bɛ se ka kɛ ne ka mɔgɔw halakili seere ye cogo di?»
[7] O tuma la masakɛ Asuerus y'a fɔ masakɛ muso Esiteri ni Yahutu bɔnsɔn Mardose ye ko: «Ne ye Haman ka so di Esiteri ma ka ban. U ye Haman yɛrɛ dulon jirijan na katuguni a wulila Yahutuw kama.
[8] Ayiwa sisan sɛbɛnni fɛn o fɛn ka di aw ye, aw ka o sɛbɛn masakɛ tɔgɔ la Yahutuw kosɔn ka masakɛ ka bolonkɔni la nɛgɛ taamashyɛn kɛ o la katuguni ci minw sɛbɛnna masakɛ tɔgɔ la, ni masakɛ ka taamashyɛn bɛ o la, o tɛ se ka yɛlɛma.»
[9] O yɔrɔ nin bɛɛ san kalo sabanan tile mugan ni sabanan don, Sivan kalo kɔni, masakɛ ka sɛbɛnnikɛlaw bɛɛ welela. U ye sɛbɛnni kɛ ka kɛɲɛ ni Mardose ka kuma fɔlenw ye. U ye sɛbɛn kɛ ka ci Yahutuw ni jamana kuntigiw ni faamaw ni jamana kɛmɛ ni mugan ni wolonwula kuntigiw ma, olu minw tun bɛ Inde jamana la fo ka taa se Etiopi jamana ma. Jamana bɛɛ kelen-kelen ta sɛbɛnna u ka sɛbɛnni la. Siyaw bɛɛ kelen-kelen taw sɛbɛnna ka kɛɲɛ ni u ka kanw ye. Yahutuw ta sɛbɛnna u ka kan na ka kɛɲɛ ni u ka sɛbɛnni cogo ye.
[10] Mardose ye sɛbɛnni kɛ Asuerus tɔgɔ la ka masakɛ ka taamashyɛn kɛ o sɛbɛnw na ka u ci ciden tɛlimaw bolo masakɛ ka yɛlɛnkan so ni faliba tɛlimaw kan.
[11] Masakɛ y'a fɔ o sɛbɛnw la ko Yahutuw bɛ dugu o dugu la, u ka u lajɛ yɔrɔ kelen na yen ka u yɛrɛw lafasa ka u niw kisi. Siya o siya ni jamana o jamana bɛ bi Yahutuw ni u ka denmisɛnw ni u musow kan ni kɛlɛkɛ minanw ye, ko Yahutuw ka olu halaki ka u faga ka u ban ka u ka nafolo cɛ.
[12] U bɛɛ k'o kɛ don kelen na masakɛ Asuerus ka mara la san kalo tan ni filanan tile tan ni sabanan don, Adar kalo la.
[13] O sɛbɛn bɔɲɔgɔnko sɛbɛnna ka ci siyaw bɛɛ ma walisa a ka kɛ sariya sigilen ye jamanaw bɛɛ kelen-kelen na, ko Yahutuw labɛnnen ka to ka u mɔnɛbɔ u juguw la o don na.
[14] O sɛbɛn jɛnsɛnbaaw yɛlɛla sow kan ka tɛliya ka taa ka kɛɲɛ ni masakɛ ka ci ye. O ci sera masadugu Suse fana kɔnɔ.
[15] Mardose bɔra masakɛ yɔrɔ la ni masaya fini bulamanw ni jɛmanw ye a kan na ani sanu masafugula ni dulɔkiba jɛman ni lomaasa fini. Pɛrɛnkan niɲagalikanba tun bɛ masadugu Suse kɔnɔ.
[16] Yahutuw ye nɔɔrɔ niɲagali ni nisɔndiya ani bonyali sɔrɔ.
[17] Masakɛ ka ci sera mara yɔrɔ minw ni dugu minw na, olu Yahutuw bɛɛ ɲagalilen tun don. U ye dumuniba kɛ ka u ɲɛnajɛ o don na. Mɔgɔ caman wɛrɛw farala Yahutuw kan katuguni siranba ye u minɛ.