[1] O ko tɛmɛnnenw fɔra Mardose ye tuma min na, a y'a ka finiw fara ka cafu fini don a la ka bugurijɛ bɔn a yɛrɛ kan ka yaala dugu kɔnɔ yɔrɔw bɛɛ la. A dusu kasilen kulola kosɛbɛ.
[2] A taara se fo masakɛ ka dondaɲɛ fɛ katuguni a tun tɛ se ka don masakɛ yɔrɔ la ni kasili finiw ye.
[3] Masakɛ ka ci fɔlen ni a ka sɛbɛn sera a ka mara yɔrɔ o yɔrɔ la, o ye Yahutuw tɔɔrɔ kosɛbɛ. U y'a daminɛ ka sun don ka kasi kaɲɛji bɔ. U la caman y'u da cafu bɔrɛw kan ani bugurijɛ la.
[4] Ko minw kɛra, Esiteri ka baarakɛ musow ani a ka baarakɛ cɛw y'o fɔ a ye. O ye masakɛ muso hakiliɲaami kosɛbɛ. A ye finiw ci Mardose ma ko a ka cafu fini bɔ a la ka o finiw don a la, nka a ma sɔn o ma.
[5] O tuma la Esiteri ye masakɛ ka baarakɛ cɛ kelen wele min tun bɛ baara kɛ a kɔrɔ, o tɔgɔ ko Hatak. A ye o ci ka taa Mardose sɛgɛrɛ k'a ɲininka o sababu la.
[6] O tuma la Hatak taara Mardose sɛgɛrɛ dugu fɛrɛ kɛnɛ la, o tun bɛ masakɛ ka donda kuntilenna la.
[7] Ko minw kɛra ani Haman ye wari min latigɛ ka o bila masaya so nafolo mara yɔrɔw la walisa ka Yahutuw bɛɛ faga, Mardose ye olu bɛɛ fɔ a ye.
[8] Ci min welewele dara Yahutuw halakili ko la masadugu Suse kɔnɔ, Mardose ye o kuma sɛbɛnnen di Hatak ma ko Hatak ka taa o jira Esiteri la ka a ko lakali a ye k'a jɛya ko Esiteri ka taa masakɛ ɲɛ kɔrɔ ka a yɛrɛ makasi a la Yahutuw ka hɛrɛ kosɔn.
[9] O tuma la Hatak taara Mardose ka kumaw bɛɛ lakali Esiteri ye.
[10] Nka Esiteri ye ci di Hatak ma ka ta'a fɔ Mardose ye ko:
[11] «Masakɛ ka baaradenw bɛɛ ani a ka mara la mɔgɔw bɛɛ y'a dɔn ko ni cɛ dɔ wala muso dɔ bɛ don masakɛ yɔrɔ la a ka dukɛnɛ la ni a ma wele, sariya dɔ bɛ yen ko o tigi ka faga. O sariya bɛ mɔgɔw bɛɛ kan. Ni masakɛ ye a ka sanu bere yankan o tigi kun na, o dɔrɔn bɛ se ka a kisi. A filɛ, a tile bisaba ye bi ye, ne ma wele ka taa masakɛ ka yɔrɔ la.»
[12] O taara Esiteri ka kuma fɔ Mardose ye tuma min na,
[13] Mardose ye Esiteri jaabi ko: «I kana miiri ko i kelenpe na kisi ka bɔ Yahutuw cɛma k'a masɔrɔ i bɛ masakɛ ka so kɔnɔ.
[14] Ni i bɛ i makun bi, Yahutuw na dɛmɛni sɔrɔ cogo wɛrɛ la ka u kisi, nka e ni i fa ka so na halaki. Jɔni b'a dɔn ni e kɛra masakɛ muso ye nin waati kama?»
[15] Ayiwa Esiteri ye Mardose jaabi ko:
[16] «Yahutu minw bɛ masadugu Suse kɔnɔ, i ka taa olu bɛɛ lajɛ yɔrɔ kelen na ka sun don ne ye. Aw kana dumuni kɛ, aw kana minni kɛ tile saba ni su saba kɔnɔ. Ne yɛrɛ kɔni, ne ni ne ka baaradenw fana na sun don. O kɔ, ne na taa masakɛ yɔrɔ, hali ni o bɛ a ka sariya tiɲɛn. Ni ne ka kan ka faga, ne na faga.»
[17] O tuma la Mardose taara ka Esiteri ka kuma fɔlenw bɛɛ kɛ.