[1] O kow kɔ, masakɛ Asuerus ye Agag bɔnsɔn Hamedata denkɛ Haman kɔrɔta k'a bonya ka tɛmɛn a kɔrɔsigi faamaw bɛɛ kan.
[2] Masakɛ ka baaraden minw tun bɛ u jɔ masaya so da la, olu bɛɛ y'u biri Haman kɔrɔ k'a masɔrɔ o tun ye masakɛ ka ci fɔlen ye o ko la. Nka Mardose ma sɔn ka i biri a kɔrɔ k'a bonya.
[3] Masakɛ ka baaraden minw jɔlen tun bɛ masaya so donda la, olu y'a fɔ Mardose ye ko: «Mun kosɔn i bɛ masakɛ kan bila?»
[4] U kumana a fɛ don o don nka a ma u lamɛn. O kɔ, u ye o ko fɔ Haman ye walisa u k'a filɛ yala ni Mardose bɛ to a kan kan. A tun y'a fɔ u ye ko a ye Yahutu ye.
[5] Haman y'a ye ko Mardose ma sɔn ka i biri a kɔrɔ k'a bonya minkɛ, a diminna kosɛbɛ.
[6] Ka Mardose kelenpe minɛ, Haman y'a jate ko o tɛ a mɔnɛbɔ katuguni Mardose siya tun fɔra a ye. Yahutu minw tun bɛ masakɛ Asuerus ka mara la, Haman tun b'a fɛ ka olu bɛɛ faga ka u ban katuguni Mardose tun ye o siya mɔgɔ dɔ ye.
[7] San kalo fɔlɔ la, Nisan kalo kɔni, masakɛ Asuerus ka masaya san tan ni filanan la, u ye pur da, o kɔrɔ, u ye kala da Hamanɲɛ kɔrɔ ka don dɔ ni kalo dɔɲɛnatɔmɔ walisa u ka Yahutuw bɛɛ faga o don na. Kala ye san kalo tan ni filanan jira. O ye Adar kalo ye.
[8] O tuma la Haman y'a fɔ masakɛ Asuerus ye ko: «Siya dɔ jɛnsɛnnen bɛ i ka masaya mara yɔrɔ bɛɛ la. O ni siya tɔw tɛ kelen ye. Olu ka sariyaw ni siya tɔw ta tɛ kelen ye, u tɛ masakɛ ka sariya jate. Ka o mɔgɔw to hɛrɛ la, masakɛ ka nafa si tɛ o la.
[9] Ni a diyara masakɛ ye, an k'a sɛbɛn ko u bɛɛ ka faga. Ne na warijɛ talan waa tan suma ka o di masakɛ ka nafolo koɲɛnabɔlaw ma k'a bila masakɛ ka nafolo mara yɔrɔw la.»
[10] O tuma la masakɛ ye a bolonkɔni la nɛgɛ bɔ ka o di Yahutuw jugu Haman ma, Agag bɔnsɔn Hamedata denkɛ don.
[11] O kɔ, masakɛ y'a fɔ Haman ye ko: «Ne bɛ o warijɛ ni o mɔgɔw to i bolo, min ka di i ye, i ka o kɛ u la.»
[12] San kalo fɔlɔ tile tan ni sabanan don u ye masakɛ ka sɛbɛnnikɛlaw wele. U ye sɛbɛn kɛ ka kɛɲɛ ni Haman ka ci fɔlen ye ka olu ci masakɛ ka jamana kuntigiw ni maraw bɛɛ ani mɔgɔw kuntigiw bɛɛ ma yɔrɔw bɛɛ la. Jamana bɛɛ kelen-kelen ta sɛbɛnna ka kɛɲɛ ni u ka sɛbɛnni kɛ cogo ye. Siyaw bɛɛ kelen-kelen ta sɛbɛnna ka kɛɲɛ ni u ka kanw ye. Bolonɔ kɛra a la masakɛ Asuerus tɔgɔ la, taamashyɛn kɛra a la ni masakɛ ka bolonkɔni la nɛgɛ ye.
[13] O sɛbɛnw dira ciden tɛlimaw ma ka ci masakɛ ka jamanaw bɛɛ kelen-kelen ma, ko u ka Yahutuw bɛɛ faga ka u ban ka u si tunun tile kelen na, denmisɛn fara mɔgɔ kɔrɔ kan, musow ni deɲɛniw bɛɛ. O ka kɛ san kalo tan ni filanan tile tan ni sabanan don na. O ye Adar kalo ye. A ko, u ka nafolo ka cɛ fana.
[14] O sɛbɛn cira ka taa maraw bɛɛ la ka o ko welewele da mɔgɔw bɛɛ ye walisa ka kɛ sariya ye ko u ka u labɛn o don kama.
[15] Cidenw tɛliyara ka taa ni o sɛbɛnw ye yɔrɔw bɛɛ la ka kɛɲɛ ni masakɛ ka ci ye. O ci fana fɔra masadugu Suse kɔnɔ, k'a sɔrɔ masakɛ ni Haman sigilen tun bɛ minni la. O kɛra mankanba ye masadugu Suse kɔnɔ.