[1] O don su fɛ, masakɛ ma se ka sunɔgɔ. A ko u ka na ni Tilew Kibaru Kitabu ye. U ye o kalan masakɛ ɲɛ na.
[2] U y'a sɛbɛnnen sɔrɔ o kɔnɔ ko masakɛ ka so dakɔlɔsibaa fila, Bigitan ni Terɛs tun ye jɛ siri masakɛ Asuerus kama ko u b'a faga, ko Mardose ye olu ko fɔ.
[3] O tuma la masakɛ ye ɲininkali kɛ ko: «bonya jumɛn ni baraji jumɛn dira Mardose ma nin kosɔn?» Masakɛ ka baaradenw y'a jaabi ko: «Foyi ma kɛ a ye.»
[4] Masakɛ ko: «Jɔn bɛ du kɔnɔ yen?» O y'a sɔrɔ Haman tun nana masaya du donda la ko a bɛ a ɲini masakɛ fɛ ko Mardose ka minɛ ka o dulon a ka jiri labɛnnen na.
[5] Masakɛ fɛ cɛw y'a jaabi ko: «Haman bɛ du kɔnɔ.» Masakɛ ko: «A ka don.»
[6] O tuma la Haman donna. Masakɛ y'a fɔ a ye ko: «Masakɛ b'a fɛ ka cɛ min bonya, mun ka kan ka kɛ o ye?» Haman y'a fɔ a yɛrɛ kɔnɔ ko: «Masakɛ b'a fɛ ka jɔn wɛrɛ bonya ne kɔ?»
[7] Haman ye masakɛ jaabi ko: «Masakɛ b'a fɛ ka cɛ min bonya,
[8] masakɛ ka masaya fini, ani masakɛ bɛ yɛlɛn so min kan ni masafugula bɛ don o kun na, u ka na ni olu ye.
[9] O fini ni so ka kalifa masakɛ ka faamaw bɛɛ la kuntigi bolo. Masakɛ b'a fɛ ka cɛ min bonya, o tigi ka o fini don a la. U ka boliboli ni o tigi ye so kan dugu bɔlɔnw la ka pɛrɛn a ɲɛ fɛ ko: ‹Masakɛ b'a fɛ ka cɛ min bonya, o bɛ kɛ tan.›»
[10] Masakɛ y'a fɔ Haman ye ko: «I tɛliya ka o fini ni o so minɛ i ko i y'a fɔ cogo min na. Yahutu Mardose min sigilen bɛ masakɛ ka so da la, i ka o kɛ ten. Foyi kana i ka fɔlen jɛ.»
[11] Ayiwa Haman ye masaya fini ani so minɛ ka fini don Mardose la ka boliboli ni a ye so kan dugu bɔlɔnw la ka pɛrɛn a ɲɛ fɛ ko: «Masakɛ b'a fɛ ka cɛ min bonya, o bɛ kɛ tan.»
[12] O kɔ, Mardose kɔseginna ka taa masakɛ ka donda la, nka Haman maloyalen y'i tɛliya ka taa a ka so. A ɲɛnasisilen ye a kun datugu.
[13] Ko minw kɛra Haman na, a ye olu bɛɛ lakali a muso Zerɛs ni a teriw ye. A laadibaaw ani a muso Zerɛs y'a jaabi ko: «I bili daminɛna Mardose min ɲɛ kɔrɔ, o ye Yahutu ye, i tɛna se ka se sɔrɔ a kan nka i na bi a ɲɛ kɔrɔ ka ta'a fɛ, siga t'a la.»
[14] Ka u to o kuma la a fɛ, masakɛ ka baaradenw nana ka taa ni Haman ye tɛliya la Esiteri ka dumuniba dilalen dun yɔrɔ la.