[1] O kow kɛlen kɔ, masakɛ Asuerus dusu madara tuma min na, a hakili jiginna Vasti ka ko kɛlenw na a la ani a tun ye min latigɛ o ta fan fɛ.
[2] O tuma la, masakɛ ka so kɔnɔ baarakɛlaw y'a fɔ a ye ko: «An ka npogotigi dɔw ɲini masakɛ ye minw cɛ ka ɲi.
[3] Masakɛ ka kuntigi dɔw sigi a ka masaya mara yɔrɔw bɛɛ la, olu ka npogotigi cɛɲumanw bɛɛ lajɛ yɔrɔ kelen na masadugu Suse kɔnɔ masaya so kɔnɔ. Masakɛ na Hegai kɛ olu kɔlɔsibaa ye. O na u ka saniyali fɛnw di u ma.
[4] Ni npogotigi min ko diyara masakɛ ye, o na kɛ masakɛ muso ye Vasti nɔ na.» Masakɛ sɔnna o miirili ma, a ye o kɛ.
[5] O y'a sɔrɔ Yahutu dɔ tun bɛ masadugu Suse kɔnɔ, o tɔgɔ ko Mardose. Ale fa tun ye Jair ye. Jair fa tun ye Simei ye. Simei fa tun ye Kis ye ka bɔ Benjamɛn bɔnsɔn na.
[6] Babilonɛ masakɛ Nebukadnezar ye mɔgɔ minw cɛ ka taa jɔnya la ka bɔ Jerusalɛm, Juda ka masakɛ Jekonia fɛ, Mardose tun ye olu la kelen ye.
[7] Ale tun ye Hadasa lamɔbaa ye, o tɔgɔ ko Esiteri. O npogotigi tun ye Mardose balimakɛ den ye. A fa ni a ba salen tun don. O npogotigi cɛ tun ka ɲi kosɛbɛ. Esiteri fa ni ba salen kɔ, Mardose y'a kɛ a yɛrɛ denmuso ye.
[8] Ayiwa, masakɛ ka ci ni a ka ko latigɛlen kibaru mɛnnen kɔ, u ye npogotigi caman lajɛɲɔgɔn fɛ masadugu Suse kɔnɔ ka u kalifa Hegai ma. U taara ni Esiteri fana ye masakɛ ka so kɔnɔ ka a kalifa musow kɔlɔsibaa Hegai ma.
[9] O npogotigi ko diyara Hegai ye. Esiteri ye hɛrɛ sɔrɔ a fɛ. A y'i tɛliya ka Esiteri saniyali fɛnw di a ma joona, koli safunew ni a mago fɛnw. A ye npogotigiɲɛntɔmɔlen wolonwula di Esiteri ma ka bɔ masakɛ ka so kɔnɔ, ka sigi yɔrɔw bɛɛ laɲuman di a ma.
[10] Esiteri ma a siya ni a faso jira mɔgɔ si la katuguni Mardose tun y'a fɔ a ye ko a kana foyi fɔ.
[11] Nka Mardose tun bɛ i yaala musow ka masaya dukɛnɛ donda la don o don k'a filɛ yala ni Esiteri bɛ cogo min na ani a bɛ minɛ cogo min na.
[12] Npogotigi bɛɛ y'a daminɛ ka u yɛrɛ labɛn kalo tan ni fila kɔnɔ ka kɛɲɛ ni muso ka labɛnni cogo ye, katuguni o waati tun latigɛra u labɛnni kama. U tun bɛ kalo wɔɔrɔ kɛ ka u mun ni latikɔlɔn ni mirɛ tulu suma duman ye. O kɔ, u tun bɛ kalo wɔɔrɔ wɛrɛ kɛ ka u mun ni aromate wala suma diyalan wɛrɛw ye ka kɛɲɛ ni muso ka saniyali ye.
[13] O kɛlen kɔ, npogotigi tun bɛ don masakɛ ka bon kɔnɔ nin cogo la. Fɛn o fɛn ko tun b'a la ka bɔ musow ka so kɔnɔ ka taa n'a ye masakɛ ka so kɔnɔ, o tun bɛ di a ma.
[14] A tun bɛ don yen wula fɛ ka bɔ yen sɔgɔma da fɛ ka taa don muso ka bon filanan kɔnɔ. Masakɛ ye Sasgaz bila ka kɛ u kɔlɔsibaa ye. O npogotigi tun tɛ kɔsegin masakɛ ka so tun fɔ ni o nege bɛ masakɛ la wala ni a tɔgɔ welela.
[15] Ayiwa Mardose tun ye a fa balima Abihail denmuso Esiteri min ta ka kɛ a yɛrɛ denmuso ye, masakɛ ka bon kɔnɔ donni sera o ma tuma min na, a ma fɛn si deli. Masakɛ ka so kɔnɔ koɲɛnabɔla Hegai, musow kɔlɔsibaa, o ye min ko fɔ, Esiteri ye o dɔrɔn ta. Esiteri ko diyara a yebaaw bɛɛ ye.
[16] Ayiwa u taara ni Esiteri ye masakɛ Asuerus ɲɛ kɔrɔ a ka masaya san kalo tannan la, o ye Tebɛt kalo ye. O kɛra a ka masaya san wolonwulanan la.
[17] Esiteri ko diyara masakɛ ye ka tɛmɛn muso tɔw bɛɛ kan. A ye ko ɲuman kɛ Esiteri ye ka tɛmɛn npogotigi tɔw bɛɛ kan. A ye masafugula don Esiteri kun na k'a sigi ka kɛ masakɛ muso ye Vasti nɔ na.
[18] O tuma la masakɛ ye dumuniba dila a ka faamaw ni a ka baaradenw bɛɛ ye Esiteri bonyali kosɔn. A ye lafiya di a ka jamanaw ma ka nili fɛnw ci ka kɛɲɛ ni a se ko ye.
[19] Npogotigiw lajɛra a siɲɛ filanan la tuma min na, o tuma la Mardose sigilen tun bɛ masakɛ ka donda la.
[20] Mardose tun ye laadili di Esiteri ma ko a kana a ka gwa wala a ka mɔgɔw ko fɔ masakɛ ye. Esiteri tun bɛ Mardose kan minɛ k'a to a ka so kɔnɔ cogo min na, a tora ka o kɛ.
[21] Ayiwa, o tuma la ka Mardose sigilen to masakɛ ka donda la, masakɛ ka dakɔlɔsibaa cɛ fila, Bigitan ni Terɛs murutira masakɛ Asuerus ma k'a faga cogo ɲini.
[22] Mardose ye u ka miirili dɔn. A ye masakɛ muso Esiteri lasɔmi. Esiteri taara Mardose ka ci fɔ masakɛ ye.
[23] U ye sɛgɛsɛgɛli kɛ o ko la k'a dɔn ko tiɲɛ don. O tuma la u ye o cɛ fila dulon jiri la. O ko sɛbɛnna Tilew Kibaru Kitabu kɔnɔ masakɛ ɲɛ kɔrɔ.