[1] Ne ye Matigi jɔlen ye saraka bɔlan kɔrɔ. A ko: «I ka samasenw sanfɛla gosi walisa so dakun ka yɛrɛyɛrɛ. I ka u kari ka jigin mɔgɔw bɛɛ kun na. Ni u tɔ minw tora, ne na olu faga ni npan ye. Hali u la kelen tɛna boli, u si tɛna kisi.
[2] Hali ni u donna suw cɛma, ne na u sama ka bɔ yen ni ne bolo ye. Hali ni u yɛlɛnna sankolo la, ne na u lajigin.
[3] Hali ni u ye u dogo Karmɛl kulu san fɛ, ne na taa u ɲini ka u sama ka bɔ yen, Hali ni u ye u dogo ne la kɔgɔji jukɔrɔ, ne na sa bila ka u cin yen.
[4] Hali ni u taara jɔnya la u juguw bolo, ne na npan bila ka u faga yen. Tiɲɛ la, ne na neɲɛ sin u ma bɔnɛ kama. Ne tɛna neɲɛ sin u ma u ka hɛrɛ kama.»
[5] Min bɛ maga dugukolo la ni a bɛ yeele i ko tulu, o ye Kɛlɛbolow Matigi Ala de ye. Dugukolo kan fɛnw bɛɛ bɛ kasikan bɔ. Jamana bɛɛ bɛ wuli i ko Nil baji, ka mada i ko Misira baji.
[6] Matigi bɛ a sigi so jɔ sankolo san fɛ, ka sankolo ju sigi dugukolo kan. A bɛ kɔgɔji wele, ka o bɔn dugukolo kan. Ale tɔgɔ ko Matigi.
[7] Matigi ko: «Israɛl ka so, aw bɛ neɲɛ na i ko Etiopi denw. Ne ma aw, Israɛl bɔnsɔn labɔ Misira jamana kɔnɔ i ko ne ye Filisitikaw labɔ Kafitɔr, ka Sirikaw labɔ Kir cogo min na wa?
[8] Siga t'a la, Matigi Ala ɲɛ jɔlen na to o masaya jalakilen na ka a halaki, k'a ban ka bɔ dugukolo kan. O bɛɛ n'a ta ne t'a fɛ ka Yakuba ka so halaki.» Matigi ko ten.
[9] «Ne na ci di ko Israɛl bɔnsɔn ka yuguyugu siyaw cɛma i koɲɔ fyɛla bɛɲɔ yuguyugu lɛfɛ la cogo min na. Hali a kisɛ kelen tɛna bi duguma.
[10] Ɔwɔ, ne ka mɔgɔ minw b'a fɔ ko: ‹Bɔnɛ tɛna gɛrɛ an na, a tɛna se an ma,› ne na olu faga ni npan ye u ka jurumuw kosɔn.»
[11] Matigi ko: «O don na, ne na Dawuda ka finiso bilen jɔ ko kura ka a tiɲɛn yɔrɔw dila k'a jɔ i ko a tun bɛ cogo min na ka kɔrɔ,
[12] walisa u ka Edɔmkaw tɔ tolen tigiya sɔrɔ, ani ne tɔgɔ dara siya minw bɛɛ kan. Ne na o kɛ ka dafa.»
[13] Matigi ko: «A filɛ, donw bɛ na, dannikɛla na kun sumantigɛla la. Rezɛn forokibaa na kun dannikɛla la. Diwɛn kɛnɛ na woyo kuluw kan, a na woyo ka bɔ tintinw bɛɛ kan.
[14] Ne na ne ka mɔgɔw Israɛl lasegin ka bɔ jɔnya la. U na u ka dugu cilenw jɔ ko kura ka u sigi yen. U na rezɛn sunw turu ko kura ka rezɛn ji min. U na nakɔw sɛnɛ ka jiridenw dun.
[15] Ne na u turu u ka jamana la ko kura. Ne na jamana min di u ma, u tɛna gɛn ka bɔ yen tun abada.» Matigi, i ka Ala ko ten.