[1] Israɛl mɔgɔw, Matigi ye aw minw labɔ Misira, a bɛ min fɔ aw kama, aw ka o lamɛn.
[2] Matigi ko: «Ne ye aw ɲɛnatɔmɔ ka bɔ dugukolo kan siyaw bɛɛ cɛma. O de kosɔn ne na aw tɔorɔ aw ka tilenbaliyaw bɛɛ kosɔn.»
[3] Mɔgɔ fila bɛnbali bɛ se ka taamaɲɔgɔn fɛ wa?
[4] Yala waraba bɛ konbokan bɔ kungo kɔnɔ ni a ma fɛn minɛ wa? Waraba kamalen konbokan bɛ mɛn k'a to a fanfan na ni a ma fɛn minɛ wa?
[5] Kɔnɔ bɛ minɛ jan na duguma ni jan ma da a ɲɛ wa? Juru bɛ se ka kɔrɔta ni a ma fɛn dɔ minɛ wa?
[6] Kɛlɛ buru bɛ fyɛ dugu kɔnɔ ni mɔgɔw ma siran wa? Bɔnɛ bɛ bi dugu dɔ kan ni Matigi sago tɛ wa?
[7] O cogo la Matigi Ala tɛ ko si kɛ ni a ma a ka baaraden kiraw lasɔmi.
[8] Ni waraba konbokan bɔra, o tɛ jɔn lasiran? Ni Matigi Ala kumana, jɔn tɛ kiraya kɛ?
[9] Aw ka a welewele da Asdɔd masaya sow ani Misira jamana masaya sow kɔnɔ ko: «A' ye ɲɔgɔn lajɛ Samari kuluw kan. A' ye na nin ko bɛnbali ni nin fariya ko kɛlenw filɛ.»
[10] Matigi ko: «Israɛl bɔnsɔn tɛ tilennenya kɛ cogo dɔn. U bɛ u ka sow fa ni u ka tilenbaliya fɛn sɔrɔlenw ye.»
[11] O de kosɔn Matigi Ala ko: «Juguw filɛ. U bɛ jamana kooli. Israɛl, u bɛ i fanga tiɲɛn, i ka masaya sow na tiɲɛn.»
[12] Matigi y'a fɔ ko: «Saga gɛnna bɛ saga sen fila wala a tulo fara bɔ waraba da la cogo min na, Israɛl bɔnsɔn minw sigilen bɛ Samari kalaka seleke kan ani Damasi tapiɲumanɲumanw kan, olu na kisi ten.»
[13] Matigi ko: «A' ye lamɛnni kɛ ka nin kuma fɔ Yakuba ka so ye ko, Matigi Ala, Kɛlɛbolow Matigi ko:
[14] ‹Ne na Israɛl bɔnsɔn tɔorɔ u ka ko jugu kɛlen kosɔn don min na, ne na Bɛtɛl saraka bɔlanw fana tiɲɛn. Saraka bɔlan biɲɛkolow bɛɛ na tigɛ ka bi duguma.
[15] Ne na fonɛnɛ masaya sow ni tilema masaya sow bɛɛ ci. Masaya so minw jɔra ni samaɲin ye, olu na bi. Soɲumanw bɛɛ na bi.›» Matigi ko ten.