[1] Matigi ko: «Moab bɔnsɔn ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, sabu u ye Edɔmkaw ka masakɛ kolo kɔrɔw jeni ka u kɛ bugurijɛ ye.
[2] Ne na tasuma tugu Moab bɔnsɔn ka jamana la, o tasuma na Kerijɔt masaya sow jeni. Moab na halaki kɛlɛ mankan ni burukan cɛma.
[3] Ne na u ka kiritigɛla ni u ka kuntigiw halaki ka olu ban u cɛma.» Matigi ko ten.
[4] Matigi ko: «Juda bɔnsɔn ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, sabu u banna Matigi ka sariya la. U ma sɔn k'a ka ko latigɛlenw sira taama. U bɛnbaw tugura bato fɛn nkalonma minw nɔ fɛ, olu ye u lafili.
[5] Ne na tasuma tugu Juda bɔnsɔn ka duguw la. O tasuma na Jerusalɛm dugu masaya sow jeni.»
[6] Matigi ko: «Israɛl bɔnsɔn ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, k'a masɔrɔ u ye mɔgɔ tilennen feere wari la ka faantan falen sabara la.
[7] U bɛ mɔgɔ tɔorɔlenw cɔngɔ u sen kɔrɔ buguri la. U tɛ sɔn ka tiɲɛ di mɔgɔ barikantanw ma. Fa ni a denkɛ bɛ don muso kelen fɛ ka ne tɔgɔ senuma nɔgɔ.
[8] U ye fini minw minɛ juru kun kɔrɔ, u bɛ si olu kan saraka bɔlanw bɛɛ kelen-kelen kɛrɛ fɛ. U bɛ mɔgɔɲangilenw ka diwɛn min u ka bato fɛnw ka sow kɔnɔ.
[9] O bɛɛ n'a ta ne de ye Amɔr siya halaki ka bɔ u ɲɛ, olu minw tun ka jan i ko sedere sun, u barika tun ka bon i ko sensun. Ne ye u sanfɛ denw tiɲɛn, ka u diliw tiɲɛn dugu rɔ.
[10] Ne ye aw labɔ Misira jamana kɔnɔ, ka aw ɲɛ minɛ ka kungokolon cɛ tigɛ san binaani kɔnɔ, ka Amɔr siya ka jamana di aw ma ka kɛ aw ta ye.
[11] Ne ye aw denkɛ dɔw kɛ kiraw ye ka aw denkɛ dɔw kɛ nazireɛnw ye. Israɛl bɔnsɔn, yala o ma kɛ wa?» Matigi ko ten.
[12] «Nka aw y'a to o nazireɛnw ka diwɛn min, k'a fɔ kiraw ye ko u kana kiraya kɛ.
[13] Wotoro falen kansiriw la, o bɛ fɛn cɔngɔ cogo min na, ne na aw cɔngɔ ten.
[14] Mɔgɔ sen duman tɛna se ka boli, cɛ barikama barika tɛna foyiɲɛ. Kɛlɛkɛ cɛ ja gɛlɛn tɛna se ka a ni kisi.
[15] Kala bonna tɛgɛ duman tɛna se ka jɔ. Mɔgɔ sen duman tɛna se ka dan kɛ. Sotigi tɛna se ka boli ka dan kɛ ni a ka so ye.
[16] O don na, mɔgɔ ja gɛlɛn farilankolon na boli.» Matigi ko ten.