[1] Matigi Ala ye fɛn min jira ne la, o filɛ nin ye. A ye ntɔnw lawuli. Masakɛ ka bin kannen kɔ, bin min nugura, ntɔnw ye o dun.
[2] Ntɔnw tilalen kɔ jamana kɔnɔ bin na, ne y'a fɔ ko: «Matigi Ala, ne bɛ i deli, i ka yafali kɛ. Yakuba na se ka balo cogo di k'a masɔrɔ a barika ka dɔgɔ?»
[3] Ayiwa Matigi nimisara k'a fɔ ko: «O tɛna kɛ tun.»
[4] Matigi Ala ye min jira ne la ko kura, o filɛ nin ye. Matigi Ala ye a ka tasumaba jigin ka a ka kiri tigɛ. O halakili tasumaba tun bɛ yɔrɔ dunbaw ji ja ka u ban. A tun bɛ Israɛl bɔnsɔn ka dugukolo bɛɛ jeni.
[5] O tuma la ne y'a fɔ ko: «Matigi Ala, ne bɛ i deli, i kana o kɛ. Yakuba na se ka balo cogo di k'a masɔrɔ a barika ka dɔgɔ?»
[6] Matigi nimisara o la. Matigi Ala ko: «O fana tɛna kɛ tun.»
[7] O tɛmɛnnen kɔ, a ye min jira ne la, o filɛ nin ye. Matigi jɔlen tun bɛ kogo kan. Kogo latilen juru tun bɛ a bolo.
[8] Matigi y'a fɔ ne ye ko: «Amos, i ɲɛ bɛ mun na?» Ne y'a jaabi ko: «Kogo latilen juru.» Matigi ko: «Ne na juru da ne ka mɔgɔw Israɛl bɔnsɔn kan. Ne tɛna yafa u ma fewu.
[9] Isaka ka batoli kɛ yɔrɔw na tiɲɛn. Israɛl bɔnsɔn ka yɔrɔ senumaw na tiɲɛn. Ne na wuli Jeroboam ka so kama ni npan ye.»
[10] O tuma la sarakalasebaa Amaziya min tun bɛ Bɛtɛl, o y'a fɔ Israɛl bɔnsɔn ka masakɛ Jeroboam ye ko: «Amos b'a fɛ ka i ka fanga tiɲɛn Israɛl bɔnsɔn cɛma. Jamana tɛna se ka a ka kuma bɛɛ muɲu,
[11] k'a masɔrɔ Amos ko: ‹Jeroboam na faga npan fɛ, Israɛl bɔnsɔn na minɛ ka bɔ u ka jamana kɔnɔ ka taa jɔnya la.›»
[12] Sarakalasebaa Amaziya y'a fɔ Amos ye ko: «Taa ka bɔ yan, filɛlikɛla. I ka boli ka taa Juda bɔnsɔn ka jamana kɔnɔ. I na dumuni kɛ ka kiraya kɛ yen.
[13] Nka i kana to ka kiraya kɛ Bɛtɛl, sabu masakɛ ka yɔrɔ senuma don, masaya so don.»
[14] Amos ye Amaziya jaabi ko: «Ne tɛ kira ye, ne tɛ kiraden ye. Ne ye saga gɛnna dama de ye. Ne bɛ balo kungo kɔnɔ torodenw na.
[15] Nka Matigi ye ne ta ka ne to sagaw nɔ fɛ, ko ne ka taa kiraya kɛ a ka mɔgɔw Israɛl bɔnsɔn ko la.
[16] I ka Matigi ka kuma lamɛn. I y'a fɔ ne ye ko ne kana kiraya kɛ Israɛl ko la.
[17] O de kosɔn Matigi b'a fɔ i ye ko: ‹I muso na jatɔya kɛ dugu kɔnɔ. I denkɛw ni i denmusow na faga npan fɛ. I ka sɛnɛ kɛ forow na tilatila ni juru ye. I yɛrɛ na faga jamana wɛrɛ la. Israɛl bɔnsɔn na minɛ ka taa jɔnya la yɔrɔ jan, ka mabɔ u ka jamana la.›»