[1] Amos min tun ye Tekoa dugu saga gɛnnaw la kelen ye, o ka kuma don. Nin kow jirala a la Israɛl bɔnsɔn ko la Juda bɔnsɔn ka masakɛ Oziasi ani Israɛl bɔnsɔn ka masakɛ Jeroboam tilew la, o ye Joas denkɛ ye. O kɛra san fila sani dugukolo yɛrɛyɛrɛ ka kɛ.
[2] Amos ko: «Matigi bɛ konbokan bɔ Sion, a b'a kan bɔ Jerusalɛm kɔnɔ. Saga gɛnnaw ka bin nugu bɛ kasi, Karmɛl kulu sanfɛla bɛ ja.»
[3] Matigi ko: «Damasi ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to. U ye Galad gosi ni nɛgɛ berew ye.
[4] Ne na Hazaɛl ka so jeni ni tasuma ye, o tasuma na Ben-Hadad ka masaya sow jeni.
[5] Ne na Damasi dugu donda la konw balabalaw karikari, ne na Bikat-Avɛnkaw halaki ka u ban ani e, Bɛt-Edɛn fana, masaya bere bɛ o min bolo. Sirikaw na taa jɔnya la Kir jamana kɔnɔ.» Matigi ko ten.
[6] Matigi ko: «Gazakaw ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, k'a masɔrɔ u ye mɔgɔ caman minɛ ka olu don Edɔmkaw bolo.
[7] Ne na tasuma tugu Gaza lamini kogow la, tasuma na masaya sow jeni.
[8] Ne na Asdɔdkaw halaki ka u ban ani Askalɔn fana, masaya bere bɛ o min bolo. Ne na ne bolo yɛlɛma Ekirɔn kama ka Filisitika tɔ tolenw halaki ka u ban.» Matigi ko ten.
[9] Matigi ko: «Tir ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to. U ye mɔgɔ caman minɛ ka olu don jɔnya la Edɔm jamana la. U ma sɔn ka miiri balimaya layidu ko la.
[10] Ne na tasuma tugu Tir lamini kogow la, o tasuma na masaya sow jeni.»
[11] Matigi ko: «Edɔmkaw ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, k'a masɔrɔ Edɔmkaw tugura u balimaw nɔ fɛ ni npan ye, u ma hinɛ u la fewu. U ka dimiya ma mada fo u ye fagali kɛ tuma bɛɛ.
[12] Ne na tasuma tugu Teman la, o tasuma na Bozra masaya sow jeni.»
[13] Matigi ko: «Amɔn bɔnsɔn ka ko jugu kɛ ko saba wala a naani kosɔn, ne y'a latigɛ ko ne tɛna u sarabali to, k'a masɔrɔ u ye Galad muso kɔnɔmaw kɔnɔw fara, walisa u ka dɔ fara u ka dugukolo kan.
[14] Ne na tasuma tugu Raba lamini kogow la, o tasuma na masaya sow jeni kulokan cɛma kɛlɛ don na ani fiɲɛ cɛma sanjiba don na.
[15] U ka masakɛ ni a ka kuntigiw na minɛɲɔgɔn fɛ ka taa jɔnya la.» Matigi ko ten.