[1] Matigi Ala ye yeli fɛn min jira Abdiasi la, o filɛ nin ye, Matigi ye kuma minw fɔ a ye Edɔm ko la, o don. Ciden cira ka taa siyaw cɛma. An y'a fɔkan mɛn ka bɔ Matigi da la, ko: «A' ye wuli. An ka taa Edɔm kama ka u kɛlɛ.»
[2] Matigi y'a fɔ Edɔm ko la, ko: «A filɛ, ne na i dɔgɔya siyaw cɛma. I mangoyara kosɛbɛ.
[3] E min sigilen bɛ san fɛ faraw cɛma, mɔgɔ tɛ se yɔrɔ min na, i b'a fɔ ko: ‹Jɔn bɛ se ka ne lajigin duguma?› I dusukun ka yɛrɛ bonya ye i lafili.
[4] Hali ni i ye i ɲaa da bɔn ɲaa da yɔrɔ la san fɛ, hali ni i taara a da fo dolow cɛma, ne na i lajigin ka bɔ yen joona.
[5] «Soɲalikɛlaw wala su fɛ cɛlikɛlaw donna i ka so wa? I tiɲɛnna dɛ. Hali ni u nana, u bɛ u mago ɲɛtaw dama ta. Ni rezɛn mɔ karilaw taara i ka so, u tɛna nɔorɔ dɔw to a sun na wa?
[6] Nka e Esau, i ka fɛnw bɛɛ minɛna, i ka nafolo mara yɔrɔ dogolenw yera.
[7] I tɔɲɔgɔnw bɛɛ ye i gɛn fo ka se i dancɛ ma. U ye i lafili ka i janfa, minw tun ye i teriw ye ani minw tun bɛ dumuni kɛ i fɛ, olu ye jan da i ɲɛ, nka i ma o dɔn.»
[8] Matigi ko: «O don na, ne na Edɔm hakilitigiw ban, ka mɔgɔ hakilimanw bɛɛ halaki ka bɔ Esau kulu kan.
[9] Teman, i ka kɛlɛkɛ cɛw ja na tigɛ, k'a masɔrɔ Esau ka kulu la mɔgɔw bɛɛ na halaki kɛlɛ la.
[10] «I ka fariya ko kɛlenw kosɔn i balimakɛ Yakuba la, i na maloya ka i kun suuli, i na halaki ka ban kudayi.
[11] I taara daga sigi i balimakɛ da la don min na, fo dunanw donna a ka kɛlɛ daga la, ka kala da Jerusalɛm kan tuma min na, e fana tun ye u jugu dɔ ye.
[12] E kɔni, i kana ɲagali i balimakɛ ka bɔnɛ kosɔn a tɔorɔ don na. I kana ɲagali Juda bɔnsɔn ka bɔnɛ kosɔn u halaki don na. I kana i da yɛlɛ ka u neni u ka tɔorɔ don na.
[13] I kana don ne ka mɔgɔw ka duguw kɔnɔ u halaki don na. I kana ɲagali u halakili kosɔn u tiɲɛn don na. I kana i ɲɛ jɔ u ka nafolow la u ka bɔnɛ don na.
[14] I kana i jɔ sira kunbɛn yɔrɔ la ka u ka mɔgɔ bolitɔw faga. I kana u ka mɔgɔ ɲɛnama tɔ tolenw don bolo la u degun don na.
[15] «K'a masɔrɔ Matigi ka donba surunyara siyaw bɛɛ kama. I ye min kɛ, o ɲɔgɔn na kɛ i yɛrɛ la. I ka ko kɛlenw juru na sara i yɛrɛ la.
[16] Tiɲɛ la, aw fara minni fɛnw na ka aw ɲɛnamini cogo min na ne ka kulu senuma kan, siyaw bɛɛ na fa ten. U na to ka minni kɛ ka u ɲɛnamini. O kɔ, u na jɛnsɛn ka kɛ i ko u tun tɛ yen fewu.
[17] «Nka mɔgɔ ɲɛnama dɔw na to ne ka kulu senuma Sion kan. Yen na kɛ Matigi ka yɔrɔ senuma, ani Yakuba ka so sigi yɔrɔ ani a ka jamana ye.
[18] Yakuba ka so na kɛ i ko tasuma, Yusufu ka so na kɛ i ko tasuma mana, nka Esau ka so na kɛ i ko bin jalen, u n'a jeni k'a ban. Esau ka so kɔnɔ mɔgɔ si tɛna to, sabu, ne Matigi ko ten.
[19] «Israɛl bɔnsɔn minw bɛ worodugu yanfan fɛ, olu na sigi Esau kulu kan. Minw bɛ sigi jɛkɛnɛ la, Filisiti jamana na kɛ olu ciyɛn ye. U na sigi Efrayim dugukolo ni Samari lamini dugukolo kan. Benjamɛn bɔnsɔn na sigi Galad, o jamana na kɛ u ta ye.
[20] Israɛl bɔnsɔn kɛlɛkɛ cɛ minw cɛra ka taa jɔnya la, olu na sigi Kanan jamana kɔnɔ fo ka taa se Sarepta. Mɔgɔ minw minɛna ka bɔ Jerusalɛm, ni olu sigilen bɛ Sefarad, olu na sigi i worodugu yanfan duguw kɔnɔ ka olu kɛ u ta ye.
[21] Se sɔrɔbaaw na yɛlɛn Sion kulu kan, ka Esau ka kulu kotigiya kɛ. Masaya na kɛ Matigi ta ye.»