[1] Mɔgɔ minw sigilen bɛ hɛrɛ la Sion dugu kɔnɔ ani minw jigi dalen bɛ Samari kulu kan, bɔnɛ bɛ olu ye. Bɔnɛ bɛ Israɛl siya kuntigiw fɔlɔ ye, mɔgɔw bɛ taa olu minw ɲininka.
[2] Aw ka taa Kalne k'a filɛ, ka taa Hamat duguba kɔnɔ. O kɔ, aw ka taa Filisitikaw ka jamana la Gat. Yala o duguw jiidira nin masayaw kan wa? Olu ka duguw ka bon ni aw ta ye wa?
[3] Aw b'a fɛ ka bɔnɛ don mabɔ aw la, nka aw bɛ binkanni kow madon aw la.
[4] U ye u da samaɲin kalakaw kan ka u kɔw lafoni dali fɛnw kan. U bɛ bagankulu la sagaden ni misiden tɔlɔlenw ɲɛnatɔmɔ ka olu dun.
[5] Ɔwɔ, u bɛ dɔnkili kunntanw da nkɔni la, ka fɔlifɛn sifa kuraw dabɔ, i ko Dawuda tun b'a kɛ cogo min na.
[6] U bɛ minni kɛ jifilenw la ka u yɛrɛw mun ni tulu suma dumanɲumanɲuman ye, nka u dusu tɛ kasi Yusufu bili kosɔn.
[7] O de kosɔn u fɔlɔ na minɛ ka taa jɔnya la. Ni o kɛra, ɲagalikan niɲɛnajɛkan tɛna mɛn tun.
[8] Matigi y'a kali a yɛrɛ tɔgɔ la. Matigi, Kɛlɛbolowtigi Ala ko: «Neɲiginna Yakuba ka kuncɛbaya kow la. A ka masaya sow ko man di ne ye. Ne na o dugu ni a kɔnɔ fɛnw bɛɛ don a juguw bolo.
[9] Ni so dɔ mɔgɔ tɔ tora tan ye, olu fana na sa.
[10] Mɔgɔ salen so mɔgɔ ani mɔgɔ min bɛ suw jeni, olu bɛna mɔgɔ salen to ka taa so kɔ fɛ, o na soɲɛ kɔnɔ mɔgɔ ɲininka ko yala dɔ wɛrɛ bɛ a fɛ yen wa? O tigi n'a jaabi ko: ‹Ayi.› O tuma la mɔgɔ salen so mɔgɔ n'a fɔ ko, a k'i makun, ko nin tɛ Matigi tɔgɔ fɔ waati ye.»
[11] Matigi ka ci filɛ nin ye. A na sobaw ci ka so misɛnw kɛ tomon ye.
[12] Yɛlɛnkan sow bɛ se ka boli kabakurunw kan wa? Mɔgɔ bɛ farakolo sɛnɛ ni misidaba ye wa? Nka aw ye tiɲɛ yɛlɛma ka kɛ baga ye, ka tilennenya tɔnɔ yɛlɛma ka kɛ jalaji ye.
[13] Aw bɛ nisɔndiya fɛn fufafu la k'a fɔ ko: «Yala aw m'a dɔn ko an ye nin kɛ an yɛrɛw barika la wa?»
[14] O de kosɔn ne, Matigi, Kɛlɛbolowtigi Ala ko: «Israɛl ka so, ne na siya dɔ lawuli aw kama. Olu na aw tɔorɔ k'a daminɛ Hamat donda la fo ka taa se Araba ko da la worodugu yanfan fɛ.»