[1] Israɛl ka so, ne bɛ nin maɲumatɔkan fɔ aw ko la, aw ka o lamɛn:
[2] Npogotigi Israɛl bira, a tɛna se ka wuli tun. A bira duguma, mɔgɔ si tɛ yen k'a lawuli.
[3] K'a masɔrɔ Matigi Ala ko: «Kɛlɛkɛ cɛ waa kelen bɔra dugu min kɔnɔ, cɛ kɛmɛ dɔrɔn na kɔsegin dugu kɔnɔ. Cɛ kɛmɛ bɔra dugu min kɔnɔ, o la cɛ tan dama na kɔsegin Israɛl ka so kɔnɔ.»
[4] Matigi b'a fɔ Israɛl ka so ye ko: «Aw ka ne ɲini, aw naɲɛnamaya.
[5] Aw kana taa batoli kɛ Bɛtɛl, aw kana taa Gilgal. Aw kana taa Beɛr-Seba, k'a masɔrɔ Gilgal na minɛ, Bɛtɛl na kɛ tomon ye.»
[6] Aw ka Matigi ɲini, aw naɲɛnamaya. N'o tɛ, halakilikɛ tasumaba na wuli Yakuba ka so la, mɔgɔ si tɛna sɔrɔ Bɛtɛl ka o tasuma faga.
[7] U bɛ tiɲɛ yɛlɛma k'a kɛ jalaji ye. U bɛ tilennenya cɔngɔ u sen kɔrɔ.
[8] Matigi ye ɲuguɲugu dolow ni cɛ saba dolow da. A bɛ su ko ka dugu jɛ, ka tile kɛ su ye, ka su kɛ tile ye. A bɛ kɔgɔji wele ka o bon dugukolo kan. Ale tɔgɔ ko Matigi.
[9] Ale de bɛ halakili cun mɔgɔ barikamaw kan, o halakili bɛ se dugu barikamaw ma.
[10] Mɔgɔ min bɛ u kɔrɔfɔ ka u jalaki u ka tilenbaliya kow la, u bɛ o koniya. Mɔgɔ min bɛ kuma ni jɛlenya ye, o ko man di u ye fewu.
[11] Aw bɛ faantanw tɔorɔ ka u karaba kaɲɔ minɛ u la. O de kosɔn aw ye masaya so minw jɔ ni kabakurun dɛsɛlenw ye, aw tɛna sigi olu kɔnɔ fewu. Aw ye rezɛn nakɔɲuman minw bi, aw tɛna olu diwɛn min.
[12] K'a masɔrɔ ne bɛ aw ka tilenbaliya dama tɛmɛnnenw ni aw ka jurumuw dɔn. Aw bɛ mɔgɔ tilennenw tɔorɔ ka surɔ fɛn minɛ ka faantanw ka jo yɛlɛma kiri tigɛ yɔrɔ la.
[13] O de kosɔn mɔgɔ hakiliman tɛ kuma o waati la, sabu o ye waati jugu de ye.
[14] Aw ka ko ɲuman ɲini ka ko jugu dabila walisa aw ɲɛnama ka to, walisa Matigi, Kɛlɛbolowtigi Ala ka kɛ aw fɛ sɛbɛ la, i ko aw b'a fɔ cogo min na.
[15] Aw ka ko jugu koniya ka ko ɲuman kanu. Tilennenya ka sigi aw ka jamalajɛ yɔrɔw la. A dɔrɔ Matigi, Kɛlɛbolowtigi Ala na hinɛ Yusufu ka mɔgɔ tɔ tolenw na.
[16] O de kosɔn Matigi Ala, Kɛlɛbolow Matigi ko: «Kasikan bɛ bɔ fɛrɛkɛnɛ ani dugu bɔlɔnw bɛɛ la ko: ‹Waai, waai.› U na sɛnɛkɛlaw wele su kasi kama, mɔgɔ minw bɛ se su kasi la kosɛbɛ, u na olu wele ka maɲumatɔkan fɔ.
[17] Ni ne tɛmɛnna aw cɛma tuma min na, kasikanba na bɔ rezɛn nakɔw bɛɛ kɔnɔ.» Matigi ko ten.
[18] Mɔgɔ minw b'a fɛ ka Matigi ka don ye, bɔnɛ bɛ olu ye. Matigi ka don ko bɛ aw la mun kosɔn? O don na kɛ dibiba don ye. Kɛnɛ tɛna bɔ o don na.
[19] Aw na kɛ i ko mɔgɔ min bɛ boli warabaɲɛ, ursi wara b'a kunbɛn. A bɛ don a ka so kɔnɔ k'a bolo sɛmɛ kogo la, sa bɛ a cin.
[20] Ɔwɔ, Matigi ka don na kɛ dibiba don ye. Kɛnɛ tɛna bɔ o don na. A na kɛ dibifin don ye. Kɛnɛ si tɛna bɔ.
[21] Ne bɛ aw ka seli donw koniya ka u lagosi. Aw ka jamalajɛ senuma si ko man di ne ye.
[22] Ni aw bɛ saraka jenitaw ni mugu sarakaw bɔ ne ye, olu ko tɛna diya ne ye. Aw ka saraka bagan tɔlɔlen si sogo tɛna diya ne ye.
[23] A' ye aw ka dɔnkiliw mankan mabɔ ne la. Ne t'a fɛ ka aw ka nkɔniw kan lamɛn.
[24] Nka aw ka sɔn tiɲɛ ka woyo i ko baji woyo, tilennenya ka woyo i ko ji woyoba.
[25] «Israɛl ka so, aw ye san binaani min kɛ kungokolon kɔnɔ, aw ye saraka fagataw ni mugu sarakaw bɔ ne ye o waati kɔnɔ wa?
[26] Aw bɛ min kɛ bi ka aw ka masakɛ boli Sikut ani ka aw ka dolo boli Kijun ta, o minw ye aw bolo baara nɔw ye, aw tun bɛ o kɛ o waati la wa? Aw b'a dɔn ko o ma kɛ.
[27] O de kosɔn ne na aw bila ka taa jɔnya la fo Damasi kɔ fɛ. Ne tɔgɔ ko Kɛlɛbolowtigi Ala.» Matigi ko ten.