[1] Matigi ko: «Aw Samari musow, aw minw tɔlɔlen bɛ i ko Basan misimusow, ne bɛ min fɔ, aw ka o lamɛn. Aw bɛɲɛnibaatɔw tɔorɔ ka faantanw cɔngɔ aw sen kɔrɔ, k'a fɔ cɛw ye ko u ka na ni minni fɛnw ye walisa aw ka minni kɛ.»
[2] Matigi Ala ye i kali a yɛrɛ tɔgɔ senuma la ko: «Donw bɛ na, u na aw minɛ aw nunna nɛgɛ ma ka taa ni aw ye, ka aw denw minɛ jɛgɛ minɛ dɔlenw na ka taa ni olu ye.
[3] Aw bɛɛ kelen-kelen na bɔ kogo sɔgɔ daw fɛ ka taa aw ɲɛ kuntilenna fɛ. Aw na gɛn ka taa Hermɔn kulu fan fɛ.» Matigi ko ten.
[4] Matigi Ala ko: «A' ye taa Bɛtɛl ka jurumu kɛ ko kura. Aw ka taa Gilgal ka dɔ fara aw ka jurumuw kan. Aw bɛɛ ka taa ni aw ka saraka fagataw ye sɔgɔma o sɔgɔma, ka taa ni aw ka jakaw ye tile saba o tile saba.
[5] Aw ka funun fɛn kɛ aw ka barika dali sarakaw la, ka u lase ka aw ka nili fɛnw welewele da, ka u kibaru jɛnsɛn, k'a masɔrɔ o ye aw, Israɛl bɔnsɔn diyaɲekow de ye.»
[6] Matigi ko: «Ne kɔni ye dumuni fɛn ban aw ka duguw bɛɛ kɔnɔ. Dumuni fɛn dɛsɛra aw ka jamana yɔrɔw bɛɛ la. O bɛɛ n'a ta aw ma sɔn ka kɔsegin ne ma.
[7] Ne fana ye sanji tigɛ aw la kalo saba kɔnɔ sani suman tigɛ ka se. Ne ye sanji lana dugu dɔ la, ne ma sɔn ka sanji lana dugu dɔ la. Foro dɔ ye sanji sɔrɔ, foro dɔ ma sanji sɔrɔ. Sɛnɛkɛ sumanw jara.
[8] Dugu fila wala dugu saba yɛrɛ mɔgɔw taara dugu wɛrɛ la ka ji min, nka u ma ji minta sɔrɔ ka u wasa. O bɛɛ n'a ta aw ma sɔn ka kɔsegin ne ma.» Matigi ko ten.
[9] «Ne ye ja niɲɔ diro bila aw la. Aw ka nakɔ caman ni aw ka rezɛn nakɔw ni aw ka toro sunw ni aw ka olive sunw tiɲɛnna ntɔnw fɛ. O bɛɛ n'a ta aw ma sɔn ka kɔsegin na ma.
[10] Ne ye fiɲɛbana ci aw cɛma i ko a kɛra Misira jamana la cogo min na ka kɔrɔ. Ne ye aw ka kamalenw faga ni npan ye. Aw juguw ye aw ka sow minɛ ka taa. Ne ye aw ka kɛlɛ daga la mɔgɔ salenw kasa don aw nunw la. O bɛɛ n'a ta aw ma sɔn ka kɔsegin ne ma.» Matigi ko ten.
[11] «Ne ye halakili kɛ aw cɛma i ko ne ye Sodɔmɛ ni Gomɔrɛ halaki cogo min na, ka aw kɛ i ko dɔgɔ kunkurun min samana ka bɔ tasuma la. O bɛɛ n'a ta aw ma sɔn ka kɔsegin ne ma.» Matigi ko ten.
[12] «O de kosɔn Israɛl, ne na o tɔorɔɲɔgɔn kɛ i la. Israɛl, ne na o kɛ i la. O de kosɔn i ka i labɛn ka i ka Ala kunbɛn.»
[13] Ale de ye kuluw da ka fiɲɛ da. Ale de bɛ a yɛrɛ ka miiriliw jira Hadamadenw la. Ale de bɛ dugu jɛ, a bɛ su ko ka taama dugukolo kan kulu janw san fɛ. Ale tɔgɔ ko Matigi, Kɛlɛbolowtigi Ala.