[1] O donw na, ni ne ye Juda bɔnsɔn ni Jerusalɛmkaw labɔ jɔnya la waati min na,
[2] ne na siyaw bɛɛ lajɛ yɔrɔ kelen na ka taa ni u ye Josafat jɛkɛnɛ la. Ne na u wele ka kiri tigɛ u kan yen, ne ka mɔgɔw ni ne ka ciyɛn Israɛl jɛnsɛnni kosɔn, katuguni u ye olu jɛnsɛn siyaw cɛma ka ne ka jamana tilatila u cɛ.
[3] O siyaw ye kala da ne ka mɔgɔw kan. U ye kamalen falen jatɔmuso la ka npogotigi falen diwɛn na, walisa u ka minni kɛ.
[4] Aw minw sigilen bɛ Tir ni Sidɔn ani aw minw bɛ Filisitikaw ka mara la, aw b'a fɛ ka mun kɛ ne la? Ni aw ko aw bɛ aw mɔnɛbɔ ni ko dɔ ye, ne na aw sara aw taama cogo jugu kosɔn joona.
[5] K'a masɔrɔ aw ye ne ka warijɛw ni ne ka sanuw ni ne ka nisɔndiya fɛn ɲuman sɔngɔ gɛlɛnw cɛ ka taa olu bila aw ka batosow kɔnɔ.
[6] Aw ye Juda bɔnsɔn ni Jerusalɛmkaw feere Javan bɔnsɔn ma ka u yɔrɔ janya u ka jamana la.
[7] Aw ye u feere jamana minw na, ne na u labɔ olu la ka u lasegin ka na yan ka aw sara aw ka kɛwale juguw kosɔn.
[8] Ne na aw denkɛw ni aw denmusow feere Juda bɔnsɔn ma, olu na u feere Seba bɔnsɔn ma, olu minw ka jamana yɔrɔ ka jan, sabu Matigi ye o fɔ.
[9] Aw ka welewele da siyaw cɛma ko: «Aw ka aw labɛn kɛlɛ kama. A' ye cɛ barikamaw lawuli. Kɛlɛkɛ cɛw bɛɛ ka taama daminɛ ka gɛrɛ yan na.
[10] A' ye aw ka dabaw dila ka u kɛ npanw ye, ka aw ka wɔlɔsɔw kɛ tamaw ye. Mɔgɔ bɛɛ la barikantan k'a fɔ ko: ‹Ne barika ka bon.›
[11] Lamini siyaw bɛɛ, a' ye tɛliya ka na ka aw lajɛ yɔrɔ kelen na.» Matigi, i ka i ka kɛlɛkɛ cɛw bila ka na.
[12] Siyaw ka wuli ka taa Josafat jɛkɛnɛ la, sabu ne Matigi na sigi yen ka kiri tigɛ aw lamini siyaw bɛɛ kan.
[13] Aw ka wɔlɔsɔ ta sabu suman tigɛ tuma sera. A' ye na forokili kɛ, sabu rezɛn ji bɔ yɔrɔ fara, k'a masɔrɔ o mɔgɔw ka tilenbaliya bonyara, i ko diwɛn mara yɔrɔ bɛ fa fo ka bɔn cogo min na.
[14] Jamaba, jamaba dama dɔnbali jigintɔ filɛ, ka taa kiri tigɛ jɛkɛnɛ la, k'a masɔrɔ Matigi ka don surunyara, jɛkɛnɛ la kiri kɔni.
[15] Tile ni kalo na dibi, dolow tɛna yeelen bɔ.
[16] Matigi na konbokan bɔ Sion kɔnɔ, a bɛ a kan bɔ Jerusalɛm dugu kɔnɔ. Sankolow ni dugukolo bɛ yɛrɛyɛrɛ, nka Matigi ye a ka mɔgɔw dogo yɔrɔ ni Israɛl bɔnsɔn ka kɛlɛ kunbɛn so de ye.
[17] O tuma la aw n'a dɔn ko ne ye Matigi, aw ka Ala de ye. Ne sigilen bɛ ne ka kulu Senuma Sion kan. Jerusalɛm dugu na kɛ yɔrɔ senuma ye, siya wɛrɛ si tɛna se ka don a kɔnɔ tun.
[18] O don na diwɛn kura na toni ka bɔ kuluw la. Nɔnɔ na woyo ka bɔ tintinw kan. Juda bɔnsɔn ka jamana kɔw bɛɛ na fa ji la. Ji boyi dɔ na woyo ka bɔ Matigi batosoba kɔnɔ, ka Sitim jɛkɛnɛ sɔn.
[19] Misira na kɛ jamana lankolon jintan ye. Edɔm na kɛ kungokolon jintan ye u ka fariya kow kosɔn Juda bɔnsɔn na, katuguni u ye mɔgɔ jalakibali faga olu yɛrɛ ka jamana kɔnɔ.
[20] Nka Juda bɔnsɔn lakanalen na sigi badaa. Mɔgɔ na sigi Jerusalɛm kɔnɔ tuma bɛɛ.
[21] Ne tun ma u ka mɔgɔ fagalen minw joli hakɛ bɔ, ne na olu hakɛ bɔ. Ne, Matigi, ne na sigi Sion dugu kɔnɔ.