[1] صور پادشاهی خئرام آتاسینین یرئنه سولیمانین پادشاه اولماق اوچون مسح ادئلدئیئنی اشئدنده، اؤز آداملارینی اونون یانینا گؤندَ‌ردی، چونکی خئرام داوودلا بوتون عؤمرو بویو دوست اولموشدو.
[2] سولیمان خئراما خبر گؤندَ‌رئب ددی:
[3] «سن بئلئرسن کی، آتام داوود، تاریسی ربّئن آدینا بئر معبد تئکه بئلمه‌دی. چونکی رب دوشمنلرئنی اونون آیاقلاری آلتینا آتانا قدر، اطرافیندا موحارئبه‌لر گدئردی.
[4] آنجاق ائندی تاریم رب منه هر طرفدن اَمئن-آمانلیق ورئب: نه بئر دوشمن وار، نه ده بئر قاراباختلیق.
[5] باخ، من بو نئیّتده‌یم کی، تاریم ربّئن آدینا بئر معبد تئکئم، نجه کی رب آتام داوودا دمئشدی: ”اوغلون منئم آدیما معبد تئکه‌جک کی، اونو سنئن یرئنده تختئنده اوتورداجاغام.“
[6] ائندی امر ات کی، منئم اوچون لوبناندان سئدر آغاجلاری کَسسئنلر. آداملاریم دا سنئن آداملارینلا بئرلئکده اولاجاق و من سنئن آداملارین اوچون نه قدر دئیه‌سن، او قدر زحمت حاقّی وره‌رم. چونکی بئلئرسن کی، بئزده صئدونلولار کئمی آغاج کَسمه‌یی بئلَن آداملار یوخدور.»
[7] خئرام سولیمانین سؤزلرئنی اشئدنده چوخ سِوئندی و ددی: «بو گون رب موبارک اولسون کی، بو بؤیوک خالقی ائداره اتمک اوچون داوودا بله حئکمتلی اوغول ورئب!»
[8] او، سولیمانا خبر گؤندَ‌رئب ددی: «منه گؤندَ‌ردئیئن سؤزو اشئتدئم. من سنئن سئدر و شام آغاجلاری باره‌ده هر ائسته‌یئنی یرئنه یتئره‌جیم:
[9] منئم آداملاریم اونلاری لوبناندان دهنزه اِندئرَرلر و من بو آغاجلاردان سال‌لار دوزَ‌لده‌رم، دهنز یولو ائله تعیئن اده‌جیئن یره آپارارام و اونلاری اورادا آییریب ییغارام، سن ده گؤتورَرسن. آنجاق سن ده منئم ائسته‌یئمی یرئنه یتئرئب ساراییمی ارزاقلا تأمئن ات.»
[10] خئرام سولیمانا بوتون ائسته‌دئیی قدر سئدر و شام آغاجلاری ورئردی.
[11] سولیمان دا هر ائل خئرامین سارایینا ارزاق اوچون ائیئرمی مئن کور بوغدا و ائیئرمی کور خالئص زیتون یاغی ورئردی.
[12] رب وعده وردئیی کئمی سولیمانا حئکمت وردی. خئراملا سولیمان آراسیندا صولح وار ائدی و اونلار بئر-بئری ائله عهد باغلامیشدیلار.
[13] سولیمان پادشاه بوتون ائسرایئلدن فَحله ییغدی. ییغیلمیش فَحله‌لر اوتوز مئن نفر ائدی.
[14] هر آی اونلارین اون مئن نفرئنی نؤوبه ائله لوبنانا گؤندَ‌رئردی؛ بئر آی لوبناندا، ائکی آی اِولرئنده قالیردیلار. اونلارین اوستونده اَدونئرام نظارت ادئردی.
[15] سولیمانین یوک داشییان یتمئش مئن و داغلاردا داش یونان هشتاد مئن آدامی وار ائدی.
[16] بونلاردان ساوایی، سولیمان ائشه نظارت اتمک اوچون اوچ مئن اوچ یوز نفر مأمور قویموشدو. اونلار ائش گؤرن آداملارا نظارت ادئردئلر.
[17] پادشاهین امرئنه گؤره ائشچئلر بؤیوک و دَیَرلی داشلار کَسئب گتئردئلر کی، معبدئن بونؤوره‌سئنی یونولموش داشدان قویسونلار.
[18] سولیمانین و خئرامین اوستالاری گِباللی‌لارلا بئرلئکده معبدی تئکمک اوچون تاختالار و داشلار کَسئب حاضیرلادیلار.