[1] اَخاب ائلیانین اتدئیی بوتون ائشلری و اونون نجه بوتون پیغمبرلری قیلینجلا اؤلدوردویونو ائزِبِله دانیشدی.
[2] ائزِبِل ائلیانین یانینا قاصئد گؤندَ‌رئب ددی: «صاباح بو واختاجاق اگر من سنی اونلارین گونونه سالماسام، قوی آللاهلار منه بله و بوندان بَتَرئنی اتسئنلر.»
[3] ائلیا قورخدو و قالخیب جا‌نینی قورتارماق اوچون یهودایا عایید اولان بئرشئبایا گلدی. نؤکرئنی اورادا قویوب
[4] اؤزو چؤلده بئر گونلوک یول گتدی. و گلئب بئر سوپورگه بوتاسینین آلتیندا اوتوردو و جانینا اؤلوم آرزو ادئب ددی: «بَسدئر، یارب، ائندی منئم جانیمی آل، چونکی من آتالاریمدان یاخشی دیئلم.»
[5] او، سوپورگه بوتاسینین آلتیندا اوزانیب یوخویا گتدی. باخ، بو زامان بئر مَلَک اونا توخونوب ددی: «قالخ یمک یِه!»
[6] ائلیا باخیب گؤردو کی، باشینین کناریندا ائستی داش اوستونده پئشَن بئر کؤکه و بئر بارداق سو وار. او یِیئب ائچدی و گئنه یوخویا گتدی.
[7] ربّئن مَله‌یی گئنه گلدی و اونا توخونوب ددی: «قالخ یمک یِه، چونکی یول سنئن اوچون چوخ اوزوندور.»
[8] او قالخدی و یِیئب ائچدی. یِمه‌یئن گوجو ائله قیرخ گون-قیرخ گجه تارینین داغی خورِبه قدر گتدی.
[9] ائلیا اوراداکی ماغارایا گئردی و گجه‌نی اورادا قالدی. باخ، ربّئن سؤزو نازئل اولوب ددی: «ائلیا، بورادا نه ادئرسن؟»
[10] ائلیا ددی: «من قوشونلارین تاریسی رب اوچون چوخ قیرت گؤرستدئم. چونکی ائسرایئل اؤولادلاری سنئن عهدئنی ترک ادئبلر، قوربانگاهلارینی داغیدیبلار، و پیغمبرلرئنی قیلینجلا اؤلدوروبلر. تَکجه من قالمیشام، و اونلار منی ده آختاریرلار کی، جانیمی آلسینلار.»
[11] او ددی: «چیخ، داغدا ربّئن حوضوروندا دور.» و باخ، رب اورادان کچئردی. داغلاری یاران و ربّئن قاباغیندا قایالاری پارچالایان بؤیوک و گوجلو بئر کولَک اسئردی، آنجاق رب کولَکده دیئلدی. کولَکدن سونرا زلزله اولدو، آمّا رب زلزله‌ده دیئلدی.
[12] زلزله‌دن سونرا اود دوشدو، آمّا رب اوددا دیئلدی. اوددان سونرا خفئف بئر سَس گلدی.
[13] ائلیا بونو اشئدنده، اوزونو جوبّه‌سی ائله اؤرتدو و چیخیب ماغارانین آغزیندا دایاندی. بئر سَس اونا ددی: «ائلیا، بورادا نه ادئرسن؟»
[14] ائلیا ددی: «من قوشونلارین تاریسی رب اوچون چوخ قیرت گؤرستدئم. چونکی ائسرایئل اؤولادلاری سنئن عهدئنی ترک ادئبلر، قوربانگاهلارینی داغیدیبلار، و پیغمبرلرئنی قیلینجلا اؤلدوروبلر. تَکجه من قالمیشام، منی ده آختاریرلار کی، جانیمی آلسینلار.»
[15] رب اونا ددی: «قالخ، یولونلا دَمَشق صحراسینا قاییت. اورایا چاتاندا خَزااِلی اَرام اوستونده پادشاه اولماق اوچون مسح ات،
[16] نئمشی اوغلو یِیهونو دا گرک ائسرایئل اوستونده پادشاه اولماق اوچون مسح اده‌سن، آبِل-مِخولادان اولان شافاط اوغلو اِلئشَعی ده اؤز یرئنه پیغمبر اولماق اوچون مسح ات.
[17] خَزااِلئن قیلینجیندان قورتارانی یِیهو اؤلدوره‌جک، یِیهونون قیلینجیندان قورتارانی اِلئشَع اؤلدوره‌جک.
[18] آنجاق من ائسرایئلده یدّی مئن آدامی قورویوب ساخلامیشام، بوتون اونلاری کی، بَعَلئن قاباغیندا دئزه دوشمه‌یئبلر و اونون آغزینی اؤپمه‌یئبلر.»
[19] ائلیا اورانی ترک اتدی و شافاط اوغلو اِلئشَعی تاپدی. او، یر شوخوملاییردی، قاباغیندا اون ائکی جوت اؤکوز وار ائدی و اؤزو اون‌ائکئنجی جوت اؤکوزو سوروردو. ائلیا اِلئشَعئن یانیندان کچنده جوبّه‌سئنی اونون اوستونه آتدی.
[20] اِلئشَع اؤکوزلری قویوب ائلیانین دالینجا قاچدی و ددی: «قوی گدئب آتا-آنامی اؤپوم، سونرا سنئن دالینجا گله‌رم.» ائلیا اونا ددی: «گری قاییت، مگر من سنه نه اتدئم؟»
[21] اِلئشَع اونون آردیندان گری قاییتدی. اؤز بئر جوت اؤکوزونو گؤتوروب اونلاری قوربان کَسدی. اؤکوزلری کوتانین تختلری ائله پئشئرئب اَتلرئنی خالقا وردی و اونلار یدئلر. سونرا قالخیب ائلیانین دالینجا گتدی و اونا خئدمت اتدی.