[1] او واخت یَروبعامین اوغلو اَبئیا ناخوشلادی.
[2] یَروبعام آروادینا ددی: «قالخ اؤز قئیافه‌نی اله دَیئش کی، سنئن یَروبعامین آروادی اولدوغونو بئلمه‌سئنلر. شئلوها گت. باخ، پیغمبر اَخئیا اورادادیر. او منئم باره‌مده دمئشدی کی، بو خالقین پادشاهی اولاجاغام.
[3] اَلئنه اون کؤمبه چؤرک، کولچه‌لر و بئر کوپه بال گؤتوروب اونون یانینا گت. اوغلانا نه اولاجاغینی او سنه بئلدئره‌جک.»
[4] یَروبعامین آروادی بله ده اتدی؛ قالخیب شئلوها گتدی و اَخئیانین اِوئنه گلدی. اَخئیا آرتیق گؤره بئلمئردی، قوجالدیغی اوچون گؤزلری ضعئفله‌مئشدی.
[5] رب اخئیایا دمئشدی: «باخ، یَروبعامین آروادی گلئر کی، سندن اوغلو باره‌ده سوروشسون، چونکی اوغلو ناخوشدور. او گلنده آیری بئر قئیافه‌ده اولاجاق. سن اونا فئلان و بهمان دئیَرسن.»
[6] آرواد قاپیدان گئرَنده، اَخئیا اونون آیاق سَسلرئنی اشئدئب ددی: «یَروبعامین آروادی، ائچه‌ری گل! نه اوچون قئیافه‌نی دَیئشئبسن؟ من گؤندَ‌رئلمئشم کی، سنه آغیر بئر خبر ورئم.
[7] گت، یَروبعاما دِه کی، ائسرایئلئن تاریسی رب بله دیئر: ”من سنی خالقین ائچئندن اوجالدیب، خالقیم ائسرایئلئن اوستونده حؤکمران اتدئم.
[8] پادشاهلیغی داوودون اِوئندن چکئب آلدیم و سنه وردئم. آمّا سن قولوم داوود کئمی اولماییبسان. او، امرلرئمه عمل ادئب بوتون اوره‌یی ائله منه پِیرَو اولدو و آنجاق گؤزومده دوز اولانی اتدی.
[9] سن ده اؤزوندن قاباق اولانلارین هامیسیندان چوخ پئسلئک ادئبسن. منی قضبلَندئرمَک اوچون گدئب اؤزونه آیری آللاهلار، تؤکمه بوتلر دوزَ‌لدئبسن و منی آرخانا آتیبسان.
[10] بونون اوچون من یَروبعامین نسلی اوستونه بلا گتئرئرم. ائسرایئلده یَروبعامین نسلئندن بوتون اِرکَک جئنسئنی، ائستر قول اولسون، ائستر آزاد، کَسئب آتاجاغام و اونلاری پِیئن یاندیریلان کئمی یاندیریب محو اده‌جیم، اله کی، هامیسی یانیب قورتارسین.
[11] یَروبعامدان شهرده اؤلَنلری ائتلر، چؤلده اؤلَنلری ده گؤیلرئن قوشلاری یئیه‌جک، چونکی رب بله دیئب.“
[12] ائندی سن قالخ و اِوئنه گت. شهره آیاقلارینی باسدیغین واخت اوغلان اؤله‌جک.
[13] بوتون ائسرایئللی‌لر اونون اوچون یاس توتوب اونو باسدیراجاقلار. یَروبعام نسلئندن فقط او، قبئره گده‌جک، چونکی یَروبعامین نسلئندن ائسرایئلئن تاریسی رب اوچون، فقط اوندا یاخشی بئر شی تاپیلدی.
[14] بوندان علاوه، رب اؤزو اوچون ائسرایئل اوستونده بئر پادشاه قویاجاق، او دا یَروبعامین نسلئنی بو گون، حتّا ائندئدن بله کَسئب آتاجاق.
[15] رب ائسرایئلی سودا یِللَنَن بئر قامیش کئمی ووراجاق و ائسرایئللی‌لری آتالارینا وردئیی بو یاخشی تورپاقدان چکئب چیخارداجاق، اونلاری فَرات چایینین او طرفئنه سَپَلَیه‌جک، چونکی اؤزلرئنه ائلاهه اَشِرا بوتلری دوزَ‌لدئب ربّی قضبلَندئرئبلر.
[16] یَروبعامین اتدئیی گوناهلارینا گؤره کی، اونلارلا ائسرایئلی گوناها باتیردی، رب ائسرایئلدن اوز دؤندَره‌جک.»
[17] یَروبعامین آروادی قالخیب گتدی و تئرصایا گلدی. اِوئن آستاناسینا آیاق باسدیغی واخت اوغلان اؤلدو.
[18] بوتون ائسرایئللی‌لر اونو باسدیریب اونون اوچون یاس توتدولار. بله‌جه ربّئن سؤزو کی، اؤز قولو اَخئیا پیغمبرئن واسئطه‌سی‌ائله دمئشدی، یرئنه یِتئشدی.
[19] یَروبعامین قالان ائشلری، نجه دؤیوشدویو و نجه پادشاهلیق اتدئیی باره‌ده، باخ، ائسرایئل پادشاهلارینین سالنامه‌لر کئتابیندا یازیلیبدیر.
[20] یَروبعامین پادشاهلیغی ائیئرمی ائکی ائل سوردو. او، اؤلوب آتالاری ائله یاتدی و یرئنه اوغلو ناداب پادشاه اولدو.
[21] سولیمان اوغلو رِحوبعام یهودادا سلطنت ادئردی. رِحوبعام، پادشاه اولان واخت، قیرخ بئر یاشیندا ائدی. او اورشلئمده اون یدّی ائل پادشاهلیق اتدی. رب ائسرایئلئن بوتون قبئله‌لرئندن بو شهری سچمئشدی کی، اؤز آدینی اونا قویسون. اونون آناسینین آدی عَمّونلو نَعَمه ائدی.
[22] یهودالی‌لار ربّئن گؤزونده شرارت اتدئلر و آتالارینین اتدئیی بوتون گوناهلاردان داها چوخ گوناه اتمکله ربّئن قِیرتئنی قیزدیردیلار.
[23] اونلار دا هر اوجا تپه اوستونده و بول یارپاقلی هر آغاج آلتیندا اؤزلری اوچون پرستئشگاهلار، موقدّس سوتونلار و ائلاهه اَشِرا بوتلری دوزَلتدئلر.
[24] اؤلکه‌ده یالان دئنلره گؤره کئشی فاحئشه‌لر ده وار ائدی. خالق او مئلّتلرئن بوتون ائیرنج ائشلرئنه گؤره رفتار اتدی کی، رب اونلاری ائسرایئل اؤولادلارینین قاباغیندان قووموشدو.
[25] رِحوبعامین پادشاهلیغینین بشئنجی ائلئنده مئصئر پادشاهی شئشَق اورشلئمه هوجوم اتدی.
[26] او، ربّئن معبدئنئن و پادشاه سارایینین خزئنه‌لرئنی گؤتوردو. هر شیی آلدی، حتّا سولیمانین دوزَلتدئیی بوتون قیزیل قالخانلاری دا گؤتوردو.
[27] رِحوبعام پادشاه اونلارین یرئنه بورونج قالخانلار دوزَلتدی و بونلاری پادشاه سارایینین قاپیسینی قورویان کشئکچی ریئسلرئنئن اَلئنه وردی.
[28] هر دفه پادشاه ربّئن معبدئنه گلنده، کشئکچئلر اونلاری داشی‌ییردیلار و سونرا کشئکچئلرئن اوتاغینا گری گتئرئردئلر.
[29] رِحوبعامین قالان ائشلری و اونون اتدئیی هر شی باره‌ده مگر یهودا پادشاهلارینین سالنامه‌لر کئتابیندا یازیلماییبدیر؟
[30] رِحوبعاملا یَروبعام آراسیندا همئشه موحارئبه گدئردی.
[31] رِحوبعام اؤلوب آتالاری ائله یاتدی و داوودون شهرئنده، آتالارینین یانیندا باسدیریلدی. آناسی عَمّونلو نَعَمه ائدی. اونون یرئنه اوغلو اَبئیا پادشاه اولدو.