[1] یَروبعام بوخور یاندیرماق اوچون قوربانگاهین یانیندا دورارکَن، بئر تاری آدامی ربّئن سؤزو ائله یهودادان بِیت ائله گلئب،
[2] ربّئن سؤزو ائله قوربانگاهین ضئدّئنه فریاد ادئب ددی: «قوربانگاه، ای قوربانگاه! رب بله دیئر: ”باخ، داوودون نسلئنده بئر اوغلان اوشاغی دوغولاجاق، اونون آدی یوشئیا اولاجاق. او سنئن اوستونده، بوخور یاندیران پرستئشگاهلارین کاهئنلرئنی قوربان اده‌جک و سنئن اوستونده ائنسان سوموکلری یاندیراجاق.“»
[3] تاری آدامی همئن گون بئر علامت ورئب ددی: «ربّئن ددئیی علامت بودور: ”باخ، بو قوربانگاه آرادان بؤلونه‌جک و اوستونده‌کی کول تؤکوله‌جکدئر.“»
[4] یَروبعام پادشاه تاری آدامینین بِیت ائلده قوربانگاهین ضئدّئنه ددئیی سؤزو اشئدنده، قوربانگاهین اوستوندن اَلئنی اوزادیب ددی: «اونو توتون.» لاکئن تاری آدامینین ضئدّئنه اوزاتدیغی اَلی قورودو و اَلئنی اؤزونه طرف دؤندَره بئلمه‌دی.
[5] قوربانگاه دا آرادان ائکی بؤلوندو و کول قوربانگاهدان تؤکولدو، اِله او علامته موطابئق کی، تاری آدامی ربّئن سؤزو ائله ورمئشدی.
[6] پادشاه تاری آدامینا ددی: «خاهئش ادئرم رب تارینا یالوار و منئم اوچون دوعا ات کی، اَلئم اؤزومه طرف دؤنسون.» تاری آدامی ربّه یالواردی و پادشاهین اَلی اؤزونه طرف دؤنوب اَوّلکی کئمی اولدو.
[7] پادشاه تاری آدامینا ددی: «منئمله بئرلئکده اِوه گل و بئر آز دئنجَل. من ده سنه هدئیّه وره‌‌‌رم.»
[8] آمّا تاری آدامی پادشاها ددی: «سن منه اِوئنئن یاریسینی دا وره‌سن، سنئنله گتمه‌رم، بو یرده چؤرک یِیئب سو دا ائچمه‌رم.
[9] چونکی ربّئن سؤزو ائله منه بله امر گلدی: ”اورادا نه چؤرک یِه، نه ده سو ائچ. گتدئیئن یوللا دا گری قاییتما.“»
[10] بله‌جه تاری آدامی آیری یوللا گتدی و بِیت ائله گلدئیی یوللا گری قاییتمادی.
[11] بِیت ائلده قوجا بئر پیغمبر یاشاییردی. اونون اوغوللاریندان بئری گلئب تاری آدامینین همئن گون بِیت ائلده اتدئیی بوتون ائشلر باره‌ده اونا خبر وردی. اوغوللاری اونون پادشاها ددئیی سؤزلری ده آتالارینا بئلدئردئلر.
[12] آتالاری اونلارا ددی: «او هانسی یوللا گتدی؟» اوغوللاری یهودادان گلن تاری آدامینین هانسی یوللا گتدئیئنی گؤرموشدولر.
[13] آتا، اوغوللارینا ددی: «منئم اوچون اِششه‌یی پالانلایین.» اِششه‌یی اونون اوچون پالانلادیلار و او، اِششه‌یئن اوستونه مئنئب
[14] تاری آدامینین دالینجا گتدی. اونو چؤل پوسته‌سی آغاجینین آلتیندا اوتورموش حالدا تاپدی و اوندان سوروشدو: «آیا یهودادان گلن تاری آدامی سنسن؟» او دا جاواب وردی: «منم.»
[15] او واخت قوجا پیغمبر اونا ددی: «منئمله اِوئمه گل و چؤرک یه.»
[16] او ددی: «سنئنله قاییدا بئلمه‌رم، گده ده بئلمه‌رم، سنئنله بو یرده چؤرک یِیئب سو دا ائچه بئلمه‌رم.
[17] چونکی ربّئن سؤزو ائله منه بله امر ادئلدی: ”اورادا نه چؤرک یِه، نه سو ائچ. گتدئیئن یوللا دا گری قاییتما.“»
[18] قوجا پیغمبر اونا ددی: «من ده سنئن کئمی بئر پیغمبرم. بئر مَلَک ربّئن سؤزو ائله منه ددی: ”اونو اؤزونله اِوئنه گری گتئر کی، چؤرک یِیئب سو ائچسئن.“» لاکئن بونو اونا یالاندان ددی.
[19] تاری آدامی اونونلا قاییتدی و اونون اِوئنده چؤرک یِیئب سو ائچدی.
[20] اونلار سوفره باشیندا اوتورارکَن، اونو یولدان قایتاران پیغمبره ربّئن سؤزو نازئل اولدو.
[21] او، یهودادان گلن تاری آدامینی خئطاب ادئب ددی: «رب بله دیئر: ”ائندی کی، ربّئن امرئنه ناموطئع اولوب تارین ربّئن سنه اتدئیی امرئنه عمل اتمه‌یئبسن،
[22] گری قاییدیب اونون سنه چؤرک یِیئب سو ائچمه ددئیی یرده، چؤرک یِیئب سو ائچئبسن، جسدئن آتالارینین قبئرئنه گئرمیه‌جک.“»
[23] تاری آدامی یِیئب ائچدئکدن سونرا، قوجا پیغمبر اونون اوچون یعنی گری گتئرمئش پیغمبر اوچون اِششه‌یی پالانلادی.
[24] تاری آدامی گتدی، یولدا اونا بئر شئر راست گلدی و اونو اؤلدوردو. اونون جسدی یولا سَرئلمئشدی و اِششَک اونون یانیندا دایانمیشدی، شئر ده جسدئن یانیندا دورموشدو.
[25] آداملار اورادان کچدئلر و یولا سَرئلمئش جسدی، جسدئن یانیندا دا دورموش شئری گؤردولر و گلئب قوجا پیغمبرئن یاشادیغی شهرده ددئلر.
[26] اونو یولدان قایتاران پیغمبر بونو اشئدنده ددی: «او، ربّئن سؤزونه ضئدّ گِدن تاری آدامی‌دیر. رب ده اونا ددئیی سؤزه گؤره، اونو شئره وردی و شئر اونو پارچالاییب اؤلدوردو.»
[27] سونرا اوغوللاری ائله دانیشیب اونلارا ددی: «منئم اوچون اِششه‌یی پالانلایین.» اونلار اِششه‌یی پالانلادیلار.
[28] او گدئب یولا سَرئلمئش جسدی تاپدی. اِششَک و شئر جسدئن یانیندا دورموشدولار. شئر نه جسدی یِمئشدی، نه ده اِششه‌یی پارچالامیشدی.
[29] قوجا پیغمبر تاری آدامینین جسدئنی گؤتوروب، اِششه‌یئن اوستونه قویدو و اؤز شهرئنه گری گتئردی کی، اونون اوچون یاس توتوب باسدیرسین.
[30] اونون جسدئنی اؤزونون قبئرئنه قویدو و یاس توتوب دیئردئلر: «وای، قارداشیم!»
[31] اونو باسدیراندان سونرا قوجا پیغمبر اوغوللاری ائله دانیشیب اونلارا ددی: «اؤلَنده منی تاری آدامینین باسدیریلدیغی قبئرده باسدیرین، سوموکلرئمی اونون سوموکلرئنئن یانینا قویون.
[32] چونکی ربّئن سؤزو کی، بِیت ائلده اولان قوربانگاها و سامئره شهرلرئنده اولان پرستئشگاهلارین بوتون معبدلرئنئن ضئدّئنه دیئلئب، حتمن یرئنه یِتئشه‌جک.»
[33] بو ائشدن سونرا دا یَروبعام اؤز پئس یولوندان دؤنمه‌دی. گئنه ده پرستئشگاهلارا خالقین هر طبقه‌سئندن اولان کاهئنلر قویدو. او، پرستئشگاهلارین کاهئنی اولماق ائسته‌ین هر کسی تقدئس اتدی.
[34] بو ائش یَروبعامین اِو اهلئنه گوناه ساییلدی و یر اوزوندن سئلئنئب آتیلماسینا و محو اولماسینا سبب اولدو.