[1] الشَّرَفْ مَا بِوَافِقْ // لِلْمَطْمُوسْ مِثِلْ الْبَرَدْ فِي الصَّيْف وَ الْمَطَرْ فِي الدَّرَتْ.
[2] اللَّعَنَةْ بَلَا سَبَبْ مَا تَلْحَقْ. هِي تِطِيرْ مِثِلْ أَبُنْ فِسَيْ وَ تُدُورْ مِثِلْ صَقُرْ.
[3] الصَّرِيمَةْ سَوَّوْهَا لِلْجُوَادْ وَ الْعَصَاةْ لِلْحُمَارْ وَ السَّوْط لِضَهَرْ الْمَطْمُوسْ.
[4] مَا تُرُدّ لِلْمَطْمُوسْ حَسَبْ طَمَاسْتَهْ أَشَانْ مَا تَبْقَى مِثْلَهْ.
[5] رُدّ لِلْمَطْمُوسْ حَسَبْ طَمَاسْتَهْ أَشَانْ مَا يُقُولْ عِنْدَهْ حِكْمَةْ.
[6] كَنْ أَنْطَيْت رِسَالْتَكْ لِلْمَطْمُوسْ دَا مِثِلْ قَطَعْت رِجْلَكْ // أَوْ شِرِبْت سَمّ.
[7] الْمَثَلْ فِي خَشُمْ الْمَطْمُوسْ مَا عِنْدَهْ فَايْدَةْ مِثِلْ رِجِلْ الْأَعْرَجْ.
[8] كَنْ تَنْطِي شَرَفْ لِلْمَطْمُوسْ دَا مِثِلْ إِنْتَ رَبَطْ حَجَرْ فِي الْمِقْلَاعْ.
[9] الْمَثَلْ فِي خَشُمْ الْمَطْمُوسْ مِثِلْ فِرِعْ هَنَا كِتِرْ فِي إِيدْ السَّكَّارِي.
[10] الْيِأَجِّرْ الْمَطْمُوسْ أَوْ يِأَجِّرْ الْمَا مَعْرُوفْ // الْمَاشِي فِي الشَّارِعْ، هُو مِثِلْ سِيدْ النُّشَّابْ الْيَجْرَحْ كُلَّ النَّاسْ.
[11] الْمَطْمُوسْ يِقَبِّلْ فِي نِفَاقَهْ مِثِلْ الْكَلِبْ يِقَبِّلْ يَاكُلْ الْقَدَّفَهْ.
[12] أَخَيْر تُخُطّ عَشَمَكْ فِي الْمَطْمُوسْ مِنْ تُخُطّ عَشَمَكْ فِي الْيَحْسِبْ نَفْسَهْ حَكِيمْ.
[13] الْكَسْلَانْ بُقُولْ كَيْ: «فِيَّهْ دُودْ بَرَّا. فِي أَيِّ شَارِعْ، رَايِغْ دُودْ خَطَرِي.»
[14] وَ هُو يِشَّقْلَبْ فِي فُرَاشَهْ مِثِلْ الْبَابْ الْيِنْفَتِحْ // وَ يِنْسَدَّ.
[15] الْكَسْلَانْ يِدِسّ إِيدَهْ فِي الْقَدَحْ وَ كَدَرْ يِجِيبْهَا لِخَشْمَهْ كُلَ قَاسِي لَيَّهْ.
[16] وَ هُو يِشِيفْ نَفْسَهْ حَكِيمْ زِيَادَةْ مِنْ سَبْعَةْ نَاسْ عَاقْلِينْ.
[17] الْيَدْخُلْ فِي مَشَاكِلْ مَا هِنَيْه مِثِلْ كَرَبْ كَلِبْ مِنْ أُدْنَيَّهْ.
[18] النَّادُمْ الْيُغُشَّكْ وَ يُقُولْ: «أَنَا قَاعِدْ نَلْعَبْ مَعَاكْ»، هُو دَا مِثِلْ مُشَوْطِنْ الْيَزُرْقَكْ بِنُشَّابْ مُسَمَّمْ // لِيَكْتُلَكْ.
[20] كَنْ مَا فِي حَطَبْ، النَّارْ تُمُوتْ وَ كَنْ مَا فِي قَوَّالْ، الْكَلَامْ يُمُوتْ.
[21] كَتَرَةْ الْفَحَمْ تِزِيدْ الْجَمُرْ وَ كَتَرَةْ الْحَطَبْ تِزِيدْ النَّارْ وَ الْقَوَّالْ يِزِيدْ الْمَشَاكِلْ.
[22] كَلَامْ الْقَوَّالْ مِثِلْ الْحَلَاوَةْ، تَاكُلَهْ وَ يَنْزِلْ فِي بَطْنَكْ.
[23] الْقَلْب الْأَزْرَقْ كَنْ كَلَامَهْ حَلُو كُلَ هُو مِثِلْ جَرّ الطِّينَةْ الْمَمْسُوحْ // بِفُضَّةْ.
[24] الْيَكْرَهْ النَّاسْ يِلَّبَّدْ وَرَاءْ كَلَامَهْ لَاكِنْ قَلْبَهْ مَلَانْ بِالْغَشّ.
[25] كَنْ كَلَامَهْ عَجَبَاكْ كُلَ، مَا تِصَدِّقَهْ أَشَانْ قَلْبَهْ مَلَانْ بِالْفِكِرْ الْحَرَامْ.
[26] وَ كَنْ يِلَبِّدْ كَرَاهِيّتَهْ // بِغَشّ كُلَ، يَوْم وَاحِدْ يِنْكَشِفْ قِدَّامْ // كُلَّ النَّاسْ.
[27] الْيَنْكُتْ نُقْرَةْ يَقَعْ فَوْقهَا وَ الْحَجَرْ يِقَبِّلْ يَرْحَكْ الْيِدَرْدِقَهْ.
[28] لِسَانْ الْكَدَّابْ يَكْرَهْ الظَّلَمَاهُمْ وَ خَشُمْ الْغَشَّاشْ يِجِيبْ الدَّمَارْ.