[1] يَا وِلَيْدِي، أَسْمَعْ كَلَامِي وَ أَحْفَضْ وَصِيّتِي.
[2] خُطّ بَالَكْ لِحِكْمَتِي وَ أَفْتَحْ قَلْبَكْ وَ أَفْهَمْ كَلَامِي.
[3] أَيْوَى، دَوِّرْ الْمَعْرَفَةْ وَ الْفِهِمْ كُلَ، أَطُلْبَهْ.
[4] حِبّ الْحِكْمَةْ مِثِلْ تِحِبّ الْفُضَّةْ وَ مِثِلْ الدَّهَبْ الْمَدْفُونْ، فَتِّشْهَا.
[5] وَ بَيْدَا، تَفْهَمْ مَعَنَى الْخَوْف // مِنْ اللّٰهْ وَ خَلَاصْ، إِنْتَ تَعَرِفْ الرَّبّ // بِعِرْفَةْ صَحِيحَةْ.
[6] أَشَانْ اللّٰهْ يَنْطِي الْحِكْمَةْ وَ هُو بَسْ يَنْطِي الْفِهِمْ // وَ الْمَعْرَفَةْ.
[7] اللّٰهْ يَحْفَضْ الْحِكْمَةْ لِلْعَدِيلِينْ وَ هُو مِثِلْ دَرَقَةْ يَحْمِي التَّمَامِينْ.
[8] هُو يَحْمِي طَرِيقْ الْعَادِلِينْ وَ يَحْفَضْ دَرِبْ الْمُؤمِنِينْ.
[9] وَ بَيْدَا، تَبْقَى صَالِحْ وَ تِسَوِّي الْحَقّ وَ الْعَدَالَةْ وَ تَعَرِفْ كُلَّ طَرِيقْ الْيِوَدِّيكْ لِلْخَيْر.
[10] وَ الْحِكْمَةْ تَدْخُلْ فِي قَلْبَكْ وَ تَفْرَحْ بِالْمَعْرَفَةْ إِنْتَ ذَاتَكْ.
[11] الْفِكِرْ الْعَدِيلْ، يَحْفَضَكْ وَ الْفِهِمْ الصَّحِيحْ، يَحْمِيكْ.
[12] الْحِكْمَةْ تِقَبِّلَكْ مِنْ دَرِبْ الْفَسْلِينْ وَ تِنَجِّيكْ مِنْ النَّاسْ الْمُفْسِدِينْ
[13] الْيَابَوْا دَرِبْ النُّورْ وَ يَمْشُوا فِي دَرِبْ الضَّلَامْ.
[14] هُمَّنْ فَرْحَانِينْ بِالْفَسَالَةْ وَ يِحِبُّوا دَايْماً الْفَسَادْ.
[15] هُمَّنْ دَرِبْهُمْ أَعْوَجْ وَ طَرِيقْهُمْ مُكَنْجَرْ.
[16] وَ بِالْحِكْمَةْ مِنْ الزَّانِيَةْ تَنْجَى، الْعَيْنهَا وَسِيعَةْ وَ تُغُشّ // بِكَلَامْهَا.
[17] هِي خَلَّتْ رَاجِلْهَا هَنَا أَوَّلْ شَبَابْهَا وَ نِسَتْ مُعَاهَدَتْهَا قِدَّامْ إِلٰـهَّا.
[18] الْيَمْشِي لِبَيْتهَا يَمْشِي لِلْمَوْت وَ الْيِشِيلْ دَرِبْهَا يَقَعْ // فِي الْهَاوِيَةْ.
[19] الْيِفَتِّشْهَا مَا يَلْقَى الدَّرِبْ الْيِقَبِّلَهْ وَ لَا يَلْقَى الطَّرِيقْ الْيِوَدِّيهْ // لِلْحَيَاةْ.
[20] وَ خَلَاصْ، يَا وِلَيْدِي، أَمْشِي فِي دَرِبْ الزَّيْنِينْ وَ شِيلْ طَرِيقْ الصَّالِحِينْ.
[21] أَشَانْ الْأَرْض، الْعَدِيلِينْ بَسْ يَوْرُثُوهَا وَ التَّمَامِينْ دَايْماً يَسْكُنُوهَا.
[22] لَاكِنْ الْعَاصِيِينْ، مِنْ الْأَرْض يَمُرْقُوهُمْ وَ الْغَدَّارِينْ، مِنْهَا يَطُرْدُوهُمْ.