[1] جَوَابْ مِنِّي أَنَا بُولُسْ رَسُولْ هَنَا عِيسَى الْمَسِيحْ بِإِذِنْ اللّٰهْ. وَ دَاهُو نَكْتِبْ لَيْكُو مَعَ أَخُونَا تِمُوتَاوُسْ. وَ أَنِحْنَ نِسَلُّمُوكُو إِنْتُو أُمَّةْ الْمَسِيحْ الْاللّٰهْ إِخْتَارَاكُو الْقَاعِدِينْ فِي حِلَّةْ كُرُنْتُسْ وَ لِكُلَّ الصَّالِحِينْ الْقَاعِدِينْ فِي أَيِّ بَكَانْ مِنْ بَلَدْ الْيُونَانْ.
[2] عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
[3] خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ. هُو أَبُونَا الرَّحِيمْ وَ كُلَّ شَجَاعَةْ جَايَةْ مِنَّهْ هُو.
[4] وَ اللّٰهْ يِشَجِّعْنَا فِي كُلَّ ضِيْقَةْ أَشَانْ أَنِحْنَ كُلَ بِالشَّجَاعَةْ دِي نِشَجُّعُوا الْآخَرِينْ الْقَاعِدِينْ فِي أَيِّ ضِيْقَةْ.
[5] وَ صَحِيحْ، قَاعِدِينْ نِشَارُكُوا كَتِيرْ فِي تَعَبْ الْمَسِيحْ وَ لَاكِنْ بِعَلَاقِتْنَا مَعَايَهْ، كُلَ نَلْقَوْا شَجَاعَةْ زِيَادَةْ.
[6] وَ كَانْ أَنِحْنَ قَاعِدِينْ فِي الضِّيقَةْ، دَا بِقِي أَشَانْ إِنْتُو تَلْقَوْا الشَّجَاعَةْ وَ النَّجَاةْ. وَ كَانْ اللّٰهْ أَنْطَانَا الشَّجَاعَةْ، دَا بِقِي أَشَانْ إِنْتُو كُلَ تَلْقَوْا الشَّجَاعَةْ وَ تَقْدَرَوْا تَحْمَلَوْا التَّعَبْ بِصَبُرْ مِثِلْنَا.
[7] عَشَمْنَا فَوْقكُو قَوِي بِلْحَيْن أَشَانْ نَعَرْفُوا كَدَرْ تِشَارُكُوا فِي الشَّجَاعَةْ مِثِلْ أَوَّلْ قَاعِدِينْ تِشَارُكُوا مَعَانَا فِي التَّعَبْ.
[8] يَا أَخْوَانَّا نِدَوْرُوا نِعَرُّفُوكُو بِالضِّيقَةْ الْجَاتْ فَوْقنَا فِي بَلَدْ آسِيَا. وَ الضِّيقَةْ دِي شَدِيدَةْ بِلْحَيْن وَ فَاتَتْ قُدْرِتْنَا لَحَدِّي قُلْنَا مُتْنَا خَلَاصْ.
[9] وَ فِي الْبَكَانْ دَا، بِقِينَا مِثِلْ نَاسْ الْحَكَمَوْا لَيْهُمْ بِالْمَوْت. وَ دَا بِقِي أَشَانْ مَا نِنْتَكُلُوا عَلَيْ نُفُوسْنَا لَاكِنْ نِنْتَكُلُوا عَلَيْ اللّٰهْ الْيَبْعَثْ الْمَيْتِينْ.
[10] وَ أَكِيدْ اللّٰهْ الْفَزَعَانَا مِنْ الْمَوْت دَا، هُو يَفْزَعْنَا بَتَّانْ. خَطَّيْنَا عَشَمْنَا فَوْقَهْ هُو بَسْ وَ أَكِيدْ هُو يَفْزَعْنَا بَتَّانْ.
[11] وَ إِنْتُو كُلَ وَاجِبْ تِعَاوُنُونَا بِدُعَاكُو. وَ اللّٰهْ يَقْبَلْ دُعَاكُو الْكَتِيرْ وَ بِسَبَبْ دُعَاكُو دَا، هُو يِبَارِكْنَا وَ خَلَاصْ نَاسْ كَتِيرِينْ يَشْكُرُوا فِي شَانَّا.
[12] وَ أَنِحْنَ فَرْحَانِينْ أَشَانْ قُلُوبْنَا قَاعِدِينْ يِأَكُّدُوا لَيْنَا كَدَرْ عِشْنَا مَعَ كُلَّ نَاسْ الدُّنْيَا وَ خَاصَّةً مَعَاكُو إِنْتُو بِقَلِبْ أَبْيَضْ وَ بِالنِّيَّةْ الْمُخْلِصَةْ الْاللّٰهْ يَرْضَى بَيْهَا. مَا عِشْنَا حَسَبْ فِكِرْ نَاسْ الدُّنْيَا لَاكِنْ عِشْنَا بِنِعْمَةْ اللّٰهْ.
[13] وَ أَبَداً مَا نَكْتُبُوا لَيْكُو إِلَّا الْكَلَامْ الْوَاضِحْ التَّقْرُوهْ وَ طَوَّالِي تَفْهَمَوْه. وَ أَنَا نِتْمَنَّى كَدَرْ تَفْهَمَوْا نِيِّتْنَا تَمَامْ.
[14] وَ قُلْت الْكَلَامْ دَا أَشَانْ إِنْتُو لِسَّاعْكُو مَا فِهِمْتُوا نِيِّتْنَا تَمَامْ. وَ كَانْ فِهِمْتُوا نِيِّتْنَا خَلَاصْ، فِي يَوْم جَيَّةْ رَبِّنَا عِيسَى، إِنْتُو تَبْقَوْا فَرْحَانِينْ بَيْنَا مِثِلْ أَنِحْنَ نَبْقَوْا فَرْحَانِينْ بَيْكُو.
[15] وَ أَكِيدْ، عَشَمِي فَوْقكُو بِقِي قَوِي. وَ أَشَانْ دَا، دَوَّرْت نَمْشِي لَيْكُو طَوَّالِي وَ نِسَلِّمْكُو مَرَّتَيْن وَ تَلْقَوْا مِنِّي بَرَكَةْ مَرَّتَيْن.
[16] وَ دَوَّرْت نَخْشَاكُو أَوَّلْ مَرَّةْ وَكِتْ أَنَا مَاشِي فِي مَقِدُونِيَةْ وَ بَتَّانْ وَكِتْ أَنَا مُقَبِّلْ مِنْهَا. وَ دَوَّرْت تِسَاعُدُونِي فِي سَفَرِي لِدَارْ الْيَهُودِيَّةْ.
[17] وَ كَانْ دَوَّرْت نَمْشِي لَيْكُو مِثِلْ دَا هَلْ تُقُولُوا أَنَا شِلْت نِيَّةْ بَلَا فِكِرْ وَلَّا؟ هَلْ تُقُولُوا أَنَا نِشِيلْ نِيَّةْ مِثِلْ النَّادُمْ الْمَا مُؤْمِنْ الْبُقُولْ فِي نَفْس الْوَكِتْ «أَيْوَى» و «لَا»؟
[18] اللّٰهْ صَادِقْ! كَلَامْنَا لَيْكُو أَبَداً مَا يَبْقَى «أَيْوَى» و «لَا» فِي نَفْس الْوَكِتْ.
[19] وَ إِبْن اللّٰهْ عِيسَى الْمَسِيحْ الْأَنَا وَ أَخْوَانِي سِيلَا وَ تِمُوتَاوُسْ بَلَّغْنَاكُو، بَيَّهْ أَبَداً مَا يِخَلْبِطْ «أَيْوَى» وَ «لَا». كَلَامَهْ كُلَ كَيْ دَايْماً أَيْوَى.
[20] أَشَانْ كُلَّ شَيْء الْاللّٰهْ قَالْ يِسَوِّيهْ، هُو تَمَّهْ فِي الْمَسِيحْ. وَ بِالْمَسِيحْ اللّٰهْ يُقُولْ «أَيْوَى». وَ بِالسَّبَبْ دَا بَسْ، نُقُولُوا آمِينْ بِأُسْمَهْ وَ نِمَجُّدُوا اللّٰهْ.
[21] وَ اللّٰهْ بَسْ ثَبَّتَانَا مَعَاكُو فِي عَلَاقَةْ مَعَ الْمَسِيحْ. وَ هُو بَسْ الْإِخْتَارَانَا لِخِدِمْتَهْ.
[22] وَ هُو خَطَّ فَوْقنَا خِتْمَهْ وَ نَزَّلْ فِي قُلُوبْنَا الرُّوحْ الْقُدُّوسْ أَشَانْ يَبْقَى الْعَلَامَةْ التِّوَصِّفْنَا كَدَرْ اللّٰهْ يِسَوِّي كُلَّ شَيْء الْقَالَهْ.
[23] وَ اللّٰهْ شَاهِدْ لَيِّ كَدَرْ مَا دَوَّرْت يَبْقَى لَيْكُو قَاسِي. وَ أَشَانْ دَا بَسْ، أَنَا مَا مَشَيْت بَتَّانْ فِي كُرُنْتُسْ.
[24] وَ مَا نَعَصُرُوكُو فِي الشَّيْء الْبُخُصّ الْإِيمَانْ أَشَانْ نَعَرْفُوا كَدَرْ إِنْتُو ثَابْتِينْ فِي الْإِيمَانْ. أَخَيْر لَيْنَا نَخْدُمُوا مَعَاكُو أَشَانْ فَرْحِتْكُو تِزِيدْ.