[1] شِيلُوا صَبُرْ أَشَانْ هَسَّعْ نِدَوْر نِحَجِّي لَيْكُو شِيَّةْ مِثِلْ نَادُمْ مَا عِنْدَهْ فِكِرْ. شِيلُوا صَبُرْ بَسْ.
[2] أَنَا زَعْلَانْ فِي شَانْكُو وَ زَعَلِي دَا جَايِ مِنْ اللّٰهْ. أَنَا مِثِلْ أَبُو هَنَا بِنَيَّةْ لِسَّاعْ مَا شَافَتْ رَاجِلْ وَ إِنْتُو بَسْ الْبِنَيَّةْ. وَ أَنَا سَوَّيْت مَوْعِدْ أَشَانْ الْبِنَيَّةْ دِي تَاخُدْ رَاجِلْ وَاحِدْ وَ هُو الْمَسِيحْ. وَ نِدَوْر نِقَدِّمْكُو لَيَّهْ مِثِلْ بِنَيَّةْ الْمَا عِنْدَهَا عَيْب.
[3] لَاكِنْ إِنْتُو تَعَرْفُوا كَدَرْ الدَّابِي غَشَّ حَوَّاءْ بِنَجَاضْتَهْ وَ هَسَّعْ أَنَا خَايِفْ لَيْكُو. أَكُونْ نَادُمْ يِتَلِّفْ فِكِرْكُو وَ مَا تِتَابُعُوا الْمَسِيحْ بِمَحَبَّةْ صَحِيحَةْ وَ مُخْلِصَةْ.
[4] أَنَا خَايِفْ أَشَانْ كَانْ نَادُمْ يَمْشِي لَيْكُو وَ يِبَلِّغْ لَيْكُو عِيسَى آخَرْ شِقْ مِنْ عِيسَى الْأَنِحْنَ بَلَّغْنَاكُو بَيَّهْ، إِنْتُو تَقْبَلَوْه. وَ إِنْتُو جَاهِزِينْ أَشَانْ تَقْبَلَوْا رُوحْ شِقْ مِنْ الرُّوحْ الْقُدُّوسْ الْأَوَّلْ قِبِلْتُوهْ وَ كَانْ نَادُمْ يِبَلِّغْ لَيْكُو بِشَارَةْ شِقْ مِنْ الْبِشَارَةْ الْأَوَّلْ قِبِلْتُوهَا، إِنْتُو تِتَابُعُوهْ عَجَلَةْ. وَ تَصْبُرُوا لِلنَّادُمْ الْمِثِلْ دَا.
[5] وَ الرُّسُلْ الْإِنْتُو تُقُولُوا هُمَّنْ كُبَارْ دَوْل، أَنَا نُقُولْ أَنَا مَا صَغَيَّرْ مِنْهُمْ بِأَيِّ شَيْء.
[6] صَحِيحْ، أَنَا مَا نِكَلِّمْ كَلَامْ صَعَبْ مِثِلْ كَلَامْ الْعُلَمَاءْ لَاكِنْ عِلْمِي شَدِيدْ بِلْحَيْن. وَ دَا وَضَّحْنَاهْ لَيْكُو كُلُّكُو فِي كُلَّ شَيْء.
[7] وَ تَعَرْفُوا كَدَرْ مَا طَلَبْت مِنْكُو قُرُسْ وَكِتْ بَلَّغْت لَيْكُو بِشَارَةْ اللّٰهْ. وَ بِمِثِلْ دَا، أَنَا سَوَّيْت نَفْسِي صَغَيَّرْ أَشَانْ إِنْتُو تَبْقَوْا كُبَارْ. وَ هَسَّعْ تُقُولُوا دَا خَطَأْ مِنِّي أَنَا وَلَّا؟
[8] هَايْ! أَنَا شِلْت مُسَاعَدَةْ مِنْ مُؤْمِنِينْ بَلَاكُو أَشَانْ نَخْدِمْ لَيْكُو. وَ دَا مِثِلْ أَنَا سِرِقْت مِنْهُمْ فِي شَانْكُو.
[9] وَ وَكِتْ أَنَا مَعَاكُو وَ بِقِيتْ حَوْجَانْ، أَنَا مَا كَلَّفْت أَيِّ نَادُمْ مِنْكُو. الْأَخْوَانْ الْجَوْا مِنْ مَقِدُونِيَةْ بَسْ سَاعَدَوْنِي فِي الشَّيْء الْقَصَّرْ لَيِّ. وَ أَنَا أَبَيْت مَا كَلَّفْتُكُو بِأَيِّ شَيْء الدَّوَّرْتَهْ وَ أَبَداً مَا نِكَلِّفْكُو.
[10] وَ بِالْكَلَامْ الصَّحِيحْ هَنَا الْمَسِيحْ الْقَاعِدْ فَوْقِي، نُقُولْ لَيْكُو نَادُمْ وَاحِدْ مَا يَدْحَرْنِي مِنْ الْفَرْحَةْ دِي فِي أَيِّ بَكَانْ فِي الْيُونَانْ.
[11] وَ مَالَا مَا نِكَلِّفْكُو؟ أَشَانْ مَا نِحِبُّوكُو وَلَّا؟ اللّٰهْ يَعَرِفْ كَدَرْ أَنَا نِرِيدْكُو بِلْحَيْن.
[12] وَ أَنَا نَخْدِمْ دَايْماً مِثِلْ أَنَا خَدَمْت مِنْ أَوَّلْ. وَ مِثِلْ دَا، النَّاسْ الْيِفَاشُرُوا بِخِدْمِتْهُمْ مَا يَلْقَوْا فُرْصَةْ يُقُولُوا هُمَّنْ رُسُلْ سَوَا سَوَا مَعَايِ.
[13] الْفَشَّارِينْ دَوْل هُمَّنْ مَا رُسُلْ بَالصَّحِيحْ. هُمَّنْ خَدَّامِينْ غَشَّاشِينْ وَ يِسَوُّوا نُفُوسْهُمْ يِشَابُهُوا رُسُلْ الْمَسِيحْ.
[14] وَ وَاجِبْ مَا تِعَجُّبُوا مِنْ الْكَلَامْ دَا أَشَانْ إِبْلِيسْ ذَاتَهْ يِسَوِّي نَفْسَهْ يِشَابِهْ مَلَائِكَةْ النُّورْ.
[15] وَ كَانْ خَدَّامِينْ إِبْلِيسْ كُلَ يِسَوُّوا نُفُوسْهُمْ يِشَابُهُوا خَدَّامِينْ اللّٰهْ الصَّالِحِينْ، مَا نِعَجُّبُوا مِنْهُمْ. وَ فِي الْأَخِيرْ، يَلْقَوْا الْوَاجِبْ لَيْهُمْ حَسَبْ خِدْمِتْهُمْ.
[16] وَ نُقُولْ بَتَّانْ مَا تَحْسُبُونِي أَنَا نَادُمْ مَا عِنْدَهْ فِكِرْ. لَاكِنْ كَانْ فِي فِكِرْكُو أَنَا نَادُمْ مَا عِنْدِي فِكِرْ كُلَ، أَقْبَلَوْنِي بَسْ. وَ بَيْدَا، أَنَا نَقْدَرْ نِلْفَشَّرْ شِيَّةْ.
[17] وَ الْكَلَامْ النُّقُولَهْ بِفَشَّارْ دَا مَا مِثِلْ رَبِّنَا يِدَوْرَهْ لَاكِنْ مِثِلْ كَلَامْ هَنَا نَادُمْ مَا عِنْدَهْ فِكِرْ.
[18] أَكِيدْ نَاسْ كَتِيرِينْ يِلْفَشَّرَوْا بِالشَّيْء الْبُخُصّ الْبَشَرْ وَ أَنَا كُلَ نِلْفَشَّرْ مِثِلْهُمْ.
[19] أَشَانْ أَنَا شِفْت كَدَرْ إِنْتُو التُّقُولُوا فِكِرْكُو قَوِي تَحْمَلَوْا بِفَرَحْ النَّاسْ الْمَا عِنْدُهُمْ فِكِرْ.
[20] وَ إِنْتُو تَحْمَلَوْا النَّادُمْ الْيِسَوِّيكُو عَبِيدَهْ وَلَّا يَاكُلْ مَالْكُو وَلَّا يَسْرِقْ مِنْكُو بِالْغَشّ وَلَّا يِسْتَكْبَرْ قِدَّامْكُو وَلَّا يُدُقُّكُو أَمْ كَفّ.
[21] وَ كَانْ دَا بَسْ الشَّيْء الْيِسَوُّوهْ الرُّسُلْ الْقَوِيِّينْ، صَحِيحْ أَنِحْنَ مَا قَوِيِّينْ وَ دَا عَيْب لَيْنَا. وَ لَاكِنْ كَانْ نَادُمْ يِدَوْر يِلْفَشَّرْ بِأَيِّ شَيْء، أَنَا نِلْفَشَّرْ مِثْلَهْ. شِفْتُوا؟ أَنَا نِحَجِّي مِثِلْ مَا عِنْدِي فِكِرْ.
[22] بُقُولُوا هُمَّنْ يَهُودْ وَلَّا؟ أَنَا كُلَ يَهُودِي. هُمَّنْ مِنْ بَنِي إِسْرَائِيلْ وَلَّا؟ أَنَا كُلَ مِنْ بَنِي إِسْرَائِيلْ. هُمَّنْ مِنْ ذُرِّيَّةْ إِبْرَاهِيمْ وَلَّا؟ أَنَا كُلَ مِنْ ذُرِّيَّةْ إِبْرَاهِيمْ.
[23] هُمَّنْ خَدَّامِينْ الْمَسِيحْ وَلَّا؟ شِفْتُوا؟ هَسَّعْ نِحَجِّي مِثِلْ رَاسِي لَفَّ مَرَّةْ وَاحِدْ! أَنَا خَدَّامْ أَخَيْر مِنْهُمْ. خَدَمْت بِشِدَّةْ زِيَادَةْ مِنْهُمْ. كَرَبَوْنِي فِي السِّجِنْ زِيَادَةْ مِنْهُمْ. فَرَشَوْنِي زِيَادَةْ مِنْهُمْ. وَ قَعَدْت فِي أُسْط الْمَوْت كَتِيرْ.
[24] الْيَهُودْ جَلَدَوْنِي خَمْسَةْ مَرَّاتْ وَ فِي أَيِّ جَلْدَةْ تِسْعَةْ وَ تَلَاتِينْ ضَرْبَةْ.
[25] الرَّوْمَانِيِّينْ فَرَشَوْنِي تَلَاتَةْ مَرَّاتْ بِعَصَايْ. وَ النَّاسْ رَجَمَوْنِي مَرَّةْ وَاحِدَةْ. تَلَاتَةْ مَرَّاتْ أَنَا مُسَافِرْ بِسَفِينَةْ وَ السَّفِينَةْ أَنْكَسَرَتْ بَيِّ فِي أُسْط الْبَحَرْ. يَوْم وَاحِدْ أَنَا قَعَدْت فِي أُسْط الْبَحَرْ يَوْم كَامِلْ لَيْل وَ نَهَارْ.
[26] أَنَا سَافَرْت كَتِيرْ بِلْحَيْن وَ وَاجَهْت خُطُورَةْ كَتِيرَةْ. خُطُورَةْ وَكِتْ أَنَا قَاطِعْ الْبُحُورْ. وَ خُطُورَةْ من رَبَّاطِينْ الدُّرُوبْ. وَ خُطُورَةْ فِي أُسُطْ نَاسِي الْيَهُودْ وَ خُطُورَةْ فِي أُسْط النَّاسْ الْمَا يَهُودْ. وَ خُطُورَةْ فِي الْحِلَّالْ وَ خُطُورَةْ فِي الْكَدَادَةْ وَ خُطُورَةْ فِي أُسْط الْبَحَرْ الْمَالِحْ. وَ خُطُورَةْ فِي أُسْط الْمُؤْمِنِينْ الْخَايْنِينْ.
[27] أَنَا خَدَمْت بِدُرَاعِي و تِعِبْت وَ فَقَدْت دَايْماً النَّوْم وَ الْأَكِلْ وَ الشُّرَابْ. وَ كَتِيرْ كَيْ الْبَرِدْ لِحِقَانِي وَ خُلْقَانْ قَصَّرَوْا لَيِّ.
[28] وَ بَتَّانْ، فِي شَيْء آخَرْ. كُلَّ مَا يَوْم، الْهَمّ الشَّدِيدْ يَكْرُبْنِي فِي شَانْ الْمُؤْمِنِينْ الْفِي أَيِّ بَكَانْ.
[29] كَانْ أَخُو وَاحِدْ تَعْبَانْ أَنَا كُلَ، تَعْبَانْ. كَانْ نَادُمْ مَرَقَوْه مِنْ الدَّرِبْ، أَنَا نِحِسّ بِنَارْ.
[30] كَانْ وَاجِبْ نِلْفَشَّرْ، نِلْفَشَّرْ بِالشَّيْء الْيِوَصِّفْ كَدَرْ أَنَا مَا عِنْدِي قُدْرَةْ.
[31] وَ اللّٰهْ أَبُو رَبِّنَا عِيسَى هُو الْوَاجِبْ لَيَّهْ الشُّكُرْ إِلَى الْأَبَدْ، يَعَرِفْ كَدَرْ كَلَامِي مَا كِدِبْ.
[32] وَكِتْ أَنَا قَاعِدْ فِي مَدِينَةْ دِمَشْق، دَوَّرَوْا يَكُرْبُونِي. وَ فِي الْوَكِتْ دَاكْ، حَاكِمْ الْمَدِينَةْ الْكَلَّفَهْ مِنْ الْمَلَكْ الْحَارِثْ رَسَّلْ عَسْكَرَهْ أَشَانْ يَحَرْسَوْا كُلَّ بِيبَانْ الْمَدِينَةْ أَشَانْ مَا نَمْرُقْ.
[33] وَ أَنَا دَا، الْأَخْوَانْ دَلَّوْنِي بِشَبَكَةْ مِنْ شُبَّاكْ وَاحِدْ الْقَاعِدْ فِي دُرْدُرْ الْمَدِينَةْ. وَ مِثِلْ دَا بَسْ نِجِيتْ مِنَّهْ.