[1] وَ خَلَاصْ اللّٰهْ بَسْ رَحَمَانَا بِالْخِدْمَةْ دِي وَ أَشَانْ دَا، أَبَداً مَا نَكْسَلَوْا مِنْهَا.
[2] وَ أَنِحْنَ أَبَيْنَا مَا تَابَعْنَا الْحَالْ التِّجِيبْ الْعَيْب وَ لَا الذُّنُوبْ الْيِسَوُّوهُمْ النَّاسْ بِعَشِيرْ. نَابَوْا مَا نِسَوُّوا شَيْء بِنَجَاضَةْ وَ أَبَداً مَا نِبَدُّلُوا كَلَامْ اللّٰهْ. لَا. لَاكِنْ نِكَلُّمُوا الْحَقّ بِكَلَامْ وَاضِحْ وَ نِخَلُّوا قَلِبْ هَنَا أَيِّ نَادُمْ يَشْهَدْ لِحَالْنَا الْعَدِيلَةْ قِدَّامْ اللّٰهْ.
[3] وَ كَانْ الْبِشَارَةْ النِّبَلُّغُوهَا مَا تِنْفَهِمْ، هِي مَا تِنْفَهِمْ إِلَّا لِلْمُوَدِّرِينْ.
[4] النَّاسْ الْمَا مُؤْمِنِينْ دَوْل قُلُوبْهُمْ مَسْدُودِينْ أَشَانْ إِبْلِيسْ عَمَاهُمْ. هُو يِدَوْر يَدْحَرْهُمْ مَا يِشِيفُوا النُّورْ الْمَجِيدْ هَنَا الْمَسِيحْ النِّبَلُّغُوا بَيَّهْ فِي الْبِشَارَةْ. الْمَسِيحْ هُو صُورَةْ اللّٰهْ.
[5] وَ الْكَلَامْ النِّبَلُّغُوهْ مَا بُخُصّ نُفُوسْنَا. نِبَلُّغُوا بِعِيسَى الْمَسِيحْ وَ نُقُولُوا هُو بَسْ الرَّبّ. وَ أَنِحْنَ خَدَّامِينْ بَسْ وَ نَخْدُمُوا لَيْكُو فِي شَانَهْ.
[6] أَشَانْ اللّٰهْ بَسْ الْقَالْ <خَلِّي النُّورْ يِضَاوِي فِي أُسْط الضَّلَامْ> وَ هُو نَوَّرْ قُلُوبْنَا أَشَانْ نَعَرْفُوا نُورْ اللّٰهْ الْمَجِيدْ الْقَاعِدْ فِي وِجِهْ عِيسَى الْمَسِيحْ.
[7] وَ الْبَرَكَةْ الْعِنْدِنَا دِي مِثِلْ دَهَبْ صَافِي الْقَاعِدْ فِي مَاعُونْ هَنَا تِينَةْ. وَ دَا يِوَصِّفْ كَدَرْ الْقُدْرَةْ الْعَجِيبَةْ النَّخْدُمُوا بَيْهَا مِنْ اللّٰهْ بَسْ وَ مَا مِنِّنَا أَنِحْنَ.
[8] أَنِحْنَ يِضَايُقُونَا فِي أَيِّ بَكَانْ لَاكِنْ مَا يِوَقُّفُونَا. وَ أَنِحْنَ مُلْحَيِّرِينْ لَاكِنْ مَا وَدَّرْنَا الْعَشَمْ.
[9] وَ النَّاسْ يِتَعُّبُونَا لَاكِنْ اللّٰهْ مَا يِخَلِّينَا. يَرْمُونَا لَاكِنْ مَا يِدَمُّرُونَا.
[10] الْمَسِيحْ تِعِبْ وَ مَاتْ. وَ فِي أَيِّ بَكَانْ أَنِحْنَ كُلَ نَتْعَبَوا مِثْلَهْ أَشَانْ حَيَاةْ عِيسَى كُلَ تِنْشَافْ فِي جِسِمْنَا.
[11] أَنِحْنَ حَيِّينْ لَاكِنْ دَايْماً يِسَلُّمُونَا لِلْمَوْت فِي شَانْ خِدْمِتْنَا لِعِيسَى. وَ دَا يَبْقَى لَيْنَا أَشَانْ حَيَاةْ عِيسَى تِنْشَافْ فِي جِسِمْنَا الْيُمُوتْ.
[12] وَ خَلَاصْ، أَنِحْنَ نِعِيشُوا فِي أُسْط الْمَوْت أَشَانْ إِنْتُو تَلْقَوْا الْحَيَاةْ الْأَبَدِيَّةْ.
[13] مَكْتُوبْ فِي الْكِتَابْ <أَنَا آمَنْت وَ أَشَانْ دَا كَلَّمْت>. وَ أَنِحْنَ كُلَ عِنْدِنَا إِيمَانْ مِثِلْ الْإِيمَانْ دَا. أَنِحْنَ مُؤْمِنِينْ وَ أَشَانْ دَا نِكَلُّمُوا.
[14] وَ نَعَرْفُوا كَدَرْ اللّٰهْ الْبَعَثْ رَبِّنَا عِيسَى مِنْ أُسْط الْمَيْتِينْ يَبْعَثْنَا أَنِحْنَ كُلَ مَعَ عِيسَى وَ يِوَدِّينَا مَعَاكُو فِي حَضَرَتَهْ.
[15] وَ كُلَّ خِدْمِتْنَا دِي لِفَايْدِتْكُو. وَ نَخْدُمُوا أَشَانْ بَرَكَةْ اللّٰهْ تَلْحَقْ كُلَّ النَّاسْ وَ هُمَّنْ يَشْكُرُوا اللّٰهْ زِيَادَةْ وَ خَلَاصْ كُلُّهُمْ يِمَجُّدُوا اللّٰهْ.
[16] أَشَانْ دَا أَبَداً مَا نَكْسَلَوْا. صَحِيحْ، جِسِمْنَا قَاعِدْ يُمُوتْ وَ لَاكِنْ الْحَيَاةْ الْجَدِيدَةْ قَاعِدَةْ تِزِيدْ فِي قُلُوبْنَا كُلِّ يَوْم.
[17] وَ التَّعَبْ الْعِنْدِنَا هَسَّعْ دَا، هُو خَفِيفْ وَ مَا يِطَوِّلْ. لَاكِنْ التَّعَبْ دَا يِجَهِّزْنَا لِلْمَجْد الْعَظِيمْ الْأَبَداً مَا يِكَمِّلْ.
[18] وَ مَا نُخُطُّوا بَالْنَا فِي الْبِنْشَافْ. نُخُطُّوا بَالْنَا فِي الْمَا بِنْشَافْ. أَشَانْ الْبِنْشَافْ يِكَمِّلْ وَ لَاكِنْ الْمَا بِنْشَافْ مَا يِكَمِّلْ أَبَداً.