[1] Yerusalim, lamba' ba'na padha ban babine' se jubeng se ta' bisa andhi' ana'. Tape sateya mara asorak, ban anyanye paperak! Sabab ana'na ba'na ce' bannya'na, abannya'an dhari ana'na babine' se ta' edina'agi lakena.
[2] Palebar mah-kemah se ekennengnge ba'na; palanjang le-talena ban pakoko ji-pajina!
[3] Ba'na bakal atamba'a lebar ka kangan ban ka kacer, pandhudhu'na ba'na bakal ngobasa'ana tanana sa-bangsa ban ngennengngana tha-kottha se sateya ce' seppena.
[4] Ja' tako', ba'na ta' epatodhusa; ta' kera eya-seya ban arassa malo. Ba'na bakal loppa'a ka kata'estowanna gi' ngodhana; ta' enga' ka kaseppeyanna se odhi' daddi randha.
[5] Panceptana ba'na akantha lake monggu ka ba'na, Allah se socce se esemba Isra'il panyalamedda ba'na, PANGERAN Se Mahakobasa asmana, Salerana Allah se ngobasane sabingkerra dunnya.
[6] Isra'il, ba'na akantha bine ngodha se sossa polana edina'agi lakena. Tape bi' Allah ba'na etembali pole, dhabuna,
[7] “Pera' sakejja' Sengko' adina'agi ba'na; kalaban ate se ce' taresnana bi' Sengko' ba'na ekone'e pole.
[8] Pera' sakejja' Sengko' ta' ngabas ka ba'na polana Sengko' peggel parana. Tape Sengko' neser ka ba'na kalaban kataresna'an se langgeng, tadha' obana.” Kantha jareya dhabuna Allah panyalamedda ba'na.
[9] “Akantha gi' jamanna Ennoh Sengko' ajanji ja' bume ta' epangemmengnga ban banjir pole, bariya keya sateya Sengko' ajanji Sengko' ta' peggella ban ta' ngara'a ba'na pole.
[10] Maske nong-gunong ban mo'-gumo' agundhek, Sengko' teptebba taresna ka ba'na. Tang parjanjiyan karokonan bi' Sengko' eteggu'a salanjangnga,” jareya dhabuna PANGERAN se taresna ka ba'na.
[11] PANGERAN adhabu, “He, Yerusalim, kottha se palang, ba'na ta' bisa apa-rapa ban tadha' se alepor atena. Sar-dhasarra ba'na bi' Sengko' epasanga pole, ngangguya to-bato mamatan.
[12] Teng-bintengnga bi' Sengko' epaddegga dhari bato dalima, bang-labang sakethengnga dhari bato mamatan, dhung-geddhungnga dhari mamatan ana-barna.
[13] Pandhudhu'na ba'na kabbi daddiya Tang mored, odhi'na bakal amana ban taremtem.
[14] Ba'na epaddek e attassa dhasar kaadilan, epajau dhari sabarang se nako'e ban dhari seksa'an.
[15] Mon ba'na eserrang, banne Sengko' se nyoro, sapa'a bai se nyerrang ba'na tanto ngalotor.
[16] Sengko' se nyepta'agi pandhi se ngeppay apoy nempa sanjata. Sengko' se agabay parjurit se ngangguy sanjata mateyana mosona.
[17] Tape saneyap sanjata se etempa kaangguy merrange ba'na ta' kera ahasel. Ban sapa'a bai se agugat ba'na e pangadilan bi' ba'na bakal ebukteyagiya salana. Tang di-abdi kabbi bi' Sengko' epamennanga,” jareya dhabuna PANGERAN.