[1] Ketab reya aesse sen-pessen parkara Yehuda ban Yerusalim se enyata'agi Allah ka Yesaya, pottrana Amos, e bakto Uziya, Yotam, Ahas ban Hizkiya marenta e Yehuda.
[2] Mara edhingngagi, langnge', mara edhingngagi pagu-onggu bume! Dhabuna PANGERAN, “Na'-ana' se epeyara bi' Sengko' sateya aberonta' ka Sengko'.
[3] Sape bai tao ka lorana, hemar gi' tao ka baddhana kakanna se esadhiya'agi lorana. Tape Tang ommat Isra'il ta' kantha jareya; kabbi padha ta' ngarte.”
[4] Palang ba'na, bangsa se dusa, reng-oreng se bejjat ban daraka! Ba'na tabalusok polana dusana dibi'! Ba'na nolak PANGERAN ban mongkore Allah Se Mahasocce se kodu esemba bi' ba'na.
[5] Arapa ba'na me' gi' terros alaban? Apa ba'na terro eokoma jang berra'an? Cethagga ba'na la bannya' porona, ate ban pekkeranna ba'na sake'.
[6] Dhari cethak sampe' ka pa'-dapa'na sokona ba'na tadha' se barasa. Ba'na bannya' barana, dhang-malendhang ban ka-loka. Ka-lokana ba'na jareya gi' ta' eberse'e otaba ebetbet, ban gi' ta' etambai bi' mennya'.
[7] Nagarana ba'na la epaancor; tha-kotthana la eobbar, tadha' karena. Tanana ba'na ekala' ban sabarang epaancor kabbi bi' reng-oreng manca e adha'na matana.
[8] Pera' kare Yerusalim se la ekeppong ban ta' bisa apa-rapa, akantha ranggun e kebbun anggur otabana ko-bengkowan e kebbun temon.
[9] Ja' sakenga PANGERAN Se Mahakobasa ta' apareng partolongan sampe' badha reng-oreng se gi' salamet e antarana sengko' ban ba'na, tanto kabbi la padha mate tadha' karena akantha Sodom ban Gomora.
[10] Yerusalim, para pamimpin ban bangsana ba'na la daddi akantha Sodom ban Gomora. Edhingngagi apa dhabuna PANGERAN ka ba'na; tetene apa se eajarragi Allahna sengko' ban ba'na.
[11] PANGERAN adhabu, “Ca'na ba'na Sengko' esanggu senneng narema kurban se ros-terrosan eatorragi ba'na ka Sengko'? Sengko' busen ka ba-dumba kurban obbaranna ba'na ban ka gajina budhu'na sapena ba'na. Dharana sape lake', dumba ban embi', Sengko' ta' endha'.
[12] Sapa se nyoro ba'na ngeba sakabbinna tor-ator jareya e bakto ba'na entar abakte ka Sengko'? Sapa se nyoro ba'na abek-lembek e Tang Padalemman Socce?
[13] Parcoma ba'na ngeba tor-ator jareya. Sengko' ngalennyer ngedhing bauna. Sengko' baji' nangale'e ba'na araya'agi Bulan Anyar, re-are Sabat ban re-are raja sarta kompolan-kompolan kaagama'an. Jareya kabbi bi' ba'na epagedda' bi' sa-dusana ba'na ban jareya maberra' Sengko'; Sengko' la lesso se nanggung.
[15] Mon ba'na ngangka' tanangnga kaangguy adu'a, Sengko' ta' ngedhingngagiya. Maske saapa bannya'na du'ana ba'na, bi' Sengko' ta' eedhingngagiya, sabab tanangnga ba'na jareya la seggut eangguy mate'e oreng.
[16] Baccowe badanna ba'na pasampe' berse. Ambuwi sakabbinna lalakonna ba'na se daraka jareya. Onggu, ambu, ja' alako daraka pole,
[17] mara ajar alako becce'. Pajaga kaadilan ban patadha' panganeyaja'an; bagi ha'na na'-kana' jatim ban billai parkarana randha.”
[18] PANGERAN adhabu, “Mara oros pamare parkara reya. Maske ba'na mera metthal polana sa-dusana, bi' Sengko' ebaccowa epasampe'a pote ngetthak. Maske dusana ba'na bannya' ban berra', bi' Sengko' esapora'a kabbi.
[19] Mon ba'na endha' ta'at ka Sengko', ba'na bakal arassa'agiya kobassana sakabbinna se bagus se ehasellagi nagarana ba'na.
[20] Tape mon ba'na ta' endha' atoro' ka Sengko', ba'na bakal mateya e dhalem perrang. Sengko', PANGERAN, la ngoca'.”
[21] Kottha se lamba' esto, sateya akantha sondel! Lamba' pandhudhu'na kabbi adil ban jujur, tape sateya aesse reng-oreng se dujan mate'e oreng.
[22] Yerusalim, lamba' ba'na akantha salaka, tape sateya la tadha' ajina. Lamba' ba'na akantha anggur se nyaman, tape sateya pera' aeng malolo.
[23] Para pamimpinna ba'na pamberonta' ban daddi ro-sorona maleng; dujan narema tor-ator ban pesse sogo'. Ta' endha' abillai na'-kana' jatim e pangadilan; ta' endha' ngedhingngagi gugadda dha-randha.
[24] Daddi PANGERAN Se Mahakobasa, Allahna Isra'il adhabu, “He, Tang so-moso, Sengko' malessa sake' ate ka ba'na, sampe' ba'na ta' marepot Sengko' pole.
[25] Bi' Sengko' ba'na eokoma. Akantha oreng se mamorne logam, bariya keya bi' Sengko' ba'na epamorneya; tor-kotorra epanyeseya dhari ba'na.
[26] Bi' Sengko' ba'na eberri'ana pole kim-hakim ban panasehat akantha lamba'. Daddi Yerusalim bakal esebbuda kottha se adil ban esto.”
[27] PANGERAN reya adil, daddi tanto masalamet Yerusalim ban reng-oreng se atobat.
[28] Tape reng-oreng dusa se aberonta' ka Salerana bakal epamateya, ban se ajauwi Salerana bakal epamosna'a.
[29] Reng-oreng jareya bakal todhusa polana nyemba ka ka'-bungka'an ban andhi' bun-kebbun se eangguy abakte ka ba-diba.
[30] Reng-oreng jareya bakal daddiya akantha kajuwan raja se elop dhaunna, ban akantha kebbun se ta' eseram.
[31] Akantha darameyan se katonon polana elette'e apoy, bariya keya reng-oreng se andhi' kakobasa'an bakal epamateya polana lalakonna dibi' se daraka, ban tadha' se bisa'a nahan sopaja reng-oreng jareya ta' sampe'a epaancor.