[1] E bakto jareya PANGERAN bakal ngagemma peddhangnga se koko ban tajem epangokoma Lewiyatan, olar naga se yar-galiyuran, ban mateyana naga se badha e tase'.
[2] E bakto jareya PANGERAN bakal adhabuwa kantha reya, “Mara anyanye parkara Tang kebbun anggur se bagus.
[3] Sengko', PANGERAN, se ajaga kebbun jareya; bi' Sengko' terros eseram tadha' ambuna, seyang malem bi' Sengko' ejaga, sopaja ta' sampe'a ele'-ole' oreng.
[4] Sengko' sateya la ta' peggel. Ja' sakenga badha rebba ban ombut se adhuri, bi' Sengko' tanto ebasbas, eobbar epasampe' tadha' kabbi.
[5] Tape mon so-mosona Tang ommat nyare pangaoban ka Sengko', dina reng-oreng jareya me' olle mabagus pole hubunganna ban Sengko'; iya, dina me' olle mateppa' pole hubunganna ban Sengko'.”
[6] E budhi are bangsa Isra'il bakal kantha'a kajuwan se aramo' ban tombu, mossa'e bume bi' buwana.
[7] PANGERAN ngokom ommadda ta' padha berra'na ban se ngokom sa-bangsa se ngamoso ommat jareya. Pangeran ta' mate'e ommadda akantha se mate'e so-mosona.
[8] PANGERAN ngokom ommadda kalaban mowang reng-oreng jareya ka nagara manca; eojuk ngangguy angen jahat dhari temor.
[9] Tape sa-dusana Isra'il pera' bisa esapora mon mezbana ba-dibana egilis epaalos epakantha kapor. Padupa'an ban lambangnga Dewi Asyera kodu eancor kabbi.
[10] Kottha se badha bintengnga rowa la seppe, eonduri akantha ra-ara se kosong. Ebin ngamba ban arendhu e jadhiya sambi matadha' un-dhaun dhari ka-cangkana kajuwan.
[11] Mon ca'-ranca'na la kerreng ban potong, babine'an entar ka jadhiya, ca'-ranca' jareya epakompol ekakaju. Bangsa jareya ta' ngarte pa-apa, daddi bi' Allah Panceptana la ta' ekaneserre ban ta' ekataresnae pole.
[12] E bakto jareya PANGERAN bakal makompola bangsana gan settong dhari Songay Efrat sampe' ka batessa Messer. Reng-oreng jareya bakal epalaena akantha bigina gandum se epalaen dhari sekkemma.
[13] E bakto jareya tarompet se raja bakal epamonyeya ngolok reng-oreng Isra'il se ebuwang ka Asyur ban Messer, epabaliya ka kennengnganna pole. Reng-oreng jareya bakal dhatengnga ka Yerusalim abakteya ka PANGERAN e gumo'na se socce.