[1] Mara jaga, Yerusalim, mara jaga! Pakowat atena ba'na! Pasang pangangguy kabessaranna! He, Yerusalim, kottha se socce, oreng najjis ta' kera maso' lebat e labangnga ba'na pole.
[2] Mara jaga dhari abu, he, Yerusalim, kepattagi abu se cekka' ka ba'na. Bukka' rantay se ajira' le'erra ba'na, he pandhudhu' Siyon se etawan!
[3] GUSTE Allah Se Mahatenggi adhabu ka ommadda, “Ba'na ejuwal kalaban ma-coma, daddi sateya eocol kalaban ma-coma keya.
[4] Lamba' ba'na entar ka Messer pas enneng e jadhiya menangka oreng manca. Saellana jareya ba'na eperres bi' oreng Asyur ta' kalaban badha sababba.
[5] Sateya apa Tang orosan e dhinna'? Oreng Babil nawan ba'na ta' majar pa-apa. Reng-oreng se nendhes ba'na thak-magathak ban ros-terrosan ya-nyeya Sengko'.
[6] Daddi ba'na bakal ngakone ja' Sengko' reya Allah, ban e bakto jareya ba'na bakal taowa ja' Sengko' se acaca ka ba'na.”
[7] Saapa sennengnga nangale padhatengnga otosan, se alomampa lebat e pagunongan abakta kabar bagus, kabar kataremtemman, kabar kasalameddan kaangguy Siyon; dhabuna, “Allahna ba'na reya Rato!”
[8] Edhingngagi soragga pangawalla kottha, padha abareng rak-soragan! Sabab reng-oreng jareya padha nangale'e bi' matana dibi' PANGERAN abali ka Siyon.
[9] Mara asorak pagumbira, jur-gujuranna Yerusalim, sabab PANGERAN alepor ommadda ban mabebas Yerusalim.
[10] PANGERAN noduwagi kakobasa'anna e adha'na matana sakabbinna bangsa. Daddi saantero bume bakal nangaleyana kasalameddan dhari Allahna sengko' ban ba'na.
[11] Kassa' mangkat, onduri kottha Babil jareya, he, reng-oreng se ngeba pakakassa Padalemman Socce! Ja' nyedding barang se najjis; socce'e gallu aba'na sabellunna mangkat.
[12] Ba'na ta' osa ru-kaburu pamangkadda, ja' pakantha oreng se buruwa. Sabab ba'na bakal etontona bi' PANGERAN; Allah Isra'il bakal ajaga'a ba'na dhari kangan kacerra, dhari adha' ban dhari budhina.
[13] PANGERAN adhabu, “Onggu, Tang abdi tanto ahasel; Tang abdi bakal ealemma ban etenggiyagi bi' oreng.
[14] Lamba' bannya' oreng takerjat nangale'e Tang abdi jareya, mowana erosak sampe' ta' aropa manossa.
[15] Tape sateya bannya' bangsa se daddi heran, to-rato ta' metto oca' polana tacengnga'. Reng-oreng bakal nangaleyana ban bakal ngarteya sabarang se ta' ekataowe sabellunna.”