[1] E bakto jareya oreng bakal anyanyeya kantha reya e tana Yehuda: “Koko onggu tang kottha reya; Allah dibi' se maddek bintengnga, e dhinna' sengko' ban ba'na padha salamet.
[2] Mara bukka' bang-labang sakethengnga, soro maso' sa-bangsa se esto jareya, bangsa se ngalakone kasokanna Allahna.
[3] GUSTE, Junandalem apareng kataremtemman sareng odhi' se nyaman ka oreng se koko atena, se parcaja sareng passra ka Junandalem.
[4] Paparcaja ka PANGERAN salanjangnga, sabab Guste Allah ngaobi sengko' ban ba'na.
[5] Pangeran ngapessagi oreng se angga'; kotthana se ngangguy binteng epaancor sarta eparata ban tana.
[6] Reng-oreng se mesken ban nyangsara bakal nyek-ngenyegga cor-ancoranna jareya.”
[7] Oreng jujur ajalan e lorong se loros, sabab Junandalem, GUSTE, se ababat jalanna.
[8] Abdidalem padha atoro' ka kapotosannepon Junandalem, GUSTE, sareng passra ka Junandalem; namong Junandalem se earep sareng se epoji abdidalem sadajana.
[9] E baja malem sokma abdidalem ce' kerrongnga ka Junandalem, e baja laggu rep-ngarep Junandalem. Manabi Junandalem ahakime bume pagi', manossa e dunnya bakal onenga ponapa se lerres.
[10] Sanare oreng jahat sareng Junandalem ekabecce'e gi' paggun ta' kera oneng ponapa se lerres. Sanare e nagara hokom sakale oreng jahat gapaneka gi' paggun alako juba', sareng ta' poron ngakone kobasaepon Junandalem.
[11] GUSTE, Junandalem ampon asadhiya se ngokoma mosoepon, namong reng-oreng gapaneka padha ta' oneng. Diggal reng-oreng gapaneka me' padha malo sadaja, nengale kataresna'annepon Junandalem ka ommadda. Diggal reng-oreng gapaneka me' olle obus tadha' karena lantaran okoman se esadhiya'agi sareng Junandalem.
[12] GUSTE, Junandalem aparenga odhi' se nyaman ka abdidalem sadaja; sadaja se elakone abdidalem sadaja, elampa'agi Junandalem kaangguy abdidalem sadaja.
[13] Abdidalem sadaja oneng ekobasae sareng ra-lora laenna, GUSTE, namong coma Junandalem se eakone abdidalem sadaja, Junandalem GUSTE Allah, Pangeran kaula.
[14] Samangken reng-oreng gapaneka ampon padha mate, ta' kera bisa odhi' pole, sokmana ta' kera jaga pole. Sabab reng-oreng gapaneka sareng Junandalem ampon padha epatompes sareng epaelang dhari engeddanna oreng.
[15] GUSTE, abdidalem sadaja, ommattepon Junandalem ka'dhinto, sareng Junandalem epabannya' kantos akel-tekel bannya'na, baba kakobasa'an abdidalem sadaja sareng Junandalem epalebar; daddi Junandalem laju eagungngagi.
[16] Junandalem ngokom abdidalem sadaja; e dhalem karekongan abdidalem sadaja abalik ka Junandalem, sareng adu'a ka Junandalem, GUSTE.
[17] Akadi babine' se rembi'a, ale'-pale' sareng acerreng kasake'en, sapaneka jugan abdidalem sadaja e ajunannepon Junandalem, GUSTE.
[18] Abdidalem sadaja ngandhung, ale'-pale' kasake'en, namong ta' rembi' pa-ponapa; ta' madhateng kasalameddan ka dunnya, jugan ta' nambai pandhudhu'na.
[19] Ommattepon Junandalem se mate badhi odhi'a pole, yit-mayyidda badhi jaga'a pole. Oreng se ampon ekobur e dhalem tana bakal jaga'a sareng rak-soragana. Akadi ebbun se macengngar bume Junandalem maodhi' ommadda se ampon abit mate.
[20] Mara ba'na maso' ka bengkona, tang bangsa, pas totop labangnga. Ngetek sabatara, sampe' dukana Pangeran la terep.
[21] PANGERAN bakal torona dhari kalenggiyanna e sowarga, ngokoma essena bume polana dusana. Oreng se mate'e oreng laen kalaban tek-ngetek bakal ebukka'a roseyana. Tana ta' notobi pole reng-oreng se epate'e oreng.