[1] Kantha reya dhabuna Allahna ba'na, “Leporragi, leporragi Tang bangsa!
[2] Paayemmagi atena reng-oreng Yerusalim, kabala ja' sateya la ta' ekadunora pole. Kasala'anna bi' Sengko' la esapora, sa-dusana la eokom tekel dhuwa'na.”
[3] Badha sowara se aera', “Sadhiya'agi jalan e ra-ara kaagem PANGERAN. Paloros lorong raja e ra-ara kaagem Allahna sengko' ban ba'na.
[4] Saneyap cora kodu tembuk, gunong ban gumo' kodu eparata. Tana se amo'-gumo' kodu padaddi tana lapang, se gem-celgem kodu paalos.
[5] Daddi kaagunganna PANGERAN bakal enyata'agiya; sakabbinna ommat manossa bakal nyakseyagiya. Onggu, PANGERAN dibi' se ajanjiyagi jareya!”
[6] Badha sowara se adhabu, “Berta'agi!” Sengko' atanya, “Ponapa se eberta'agiya abdidalem?” “Kabarragi ja' manossa reya padha ban rebba, padha ban kembang se kabagusanna pera' sakejja'.
[7] Rebba daddi kerreng ban kembang daddi elop, mon PANGERAN madhateng angen panas. Onggu, bangsa jareya padha ban rebba.
[8] Rebba daddi kerreng ban kembang daddi elop, tape dhabuna Allah ta' aoba salanjangnga.”
[9] Kassa' ongga ka gunong se tenggi, pabalattra kabar becce' ka Yerusalim! Mara aera' paranyeng, pabalattra kabar becce' ka Siyon! Kabala ka tha-kottha Yehuda ja' Allahna bakal rabuwa!
[10] Abas, GUSTE Allah Se Mahatenggi rabu kalaban kobasana, alampa'agiya karsana kalaban parjuga. Parabuna eerengngagi reng-oreng se epabebas Salerana.
[11] Akantha oreng ngowan se meyara sape ban dumbana; Salerana dibi' se makompol sape ban dumbana jareya. Dhu'-budhu'na dumbana egindhung; bi-korbina etonton kalaban alos.
[12] Sapa se naker tase' raja kalaban erako' bi' tanangnga otabana ngokor langnge' ngangguy kelananna? Sapa se naker tanana bume ban ker-taker, otabana nembang gumo' ban gunong ngangguy dhacen?
[13] Sapa se mimpin PANGERAN, otabana daddi panasehadda ban ngajari Salerana?
[14] Ka sapa PANGERAN atanya polana terro taowa otaba terro ngarteya? Sapa se la-malae Salerana sopaja se elampa'agi teppa'a?
[15] Monggu ka PANGERAN sa-bangsa reya padha ban aeng sacapcap e dhalem temba, padha ban abu sabuter e tembangan; lo-polo padha dhammangnga ban abu se alos.
[16] Sakabbinna keban e alas Libanon maske ekagabaya kurban kabbi gi' ta' cokop; ka'-bungka'an gi' korang mon ekagabaya kajuna.
[17] Sakabbinna bangsa tadha' artena monggu ka Salerana, katon akantha se tadha' e ajunanna.
[18] Daddi epapadha'a bi' sapa Allah reya bi' ba'na? Bi' ba'na eanggep akantha sapa Salerana?
[19] Salerana ta' padha ban ca-arca gabayanna tokang, arca se akole' emmas ban alanggan salaka.
[20] Oreng se ta' kellar melle emmas ban salaka mele kaju se ta' gampang rosak. Oreng jareya nyare tokang se ahli, kaangguy agabay arca se ta' gampang robbu.
[21] Masa' ba'na ta' tao ban ta' ngedhing, ta' ebalai oreng molae lamba' mola? Masa' ba'na ta' ngarte dhari lamba' mola baramma mamolanna dunnya reya?
[22] Se nyepta'agi alenggi e attasanna bume, pandhudhu'na katon akantha balang se ne'-kene'. Salerana ngampar langnge' epakantha kaen, pas epasang akantha kemah se bakal ekennengnge.
[23] Para pangobasa epata'bisa apa-rapa, ja-pangraja kaelangan kakobasa'anna.
[24] Reng-oreng jareya padha ban men-tamennan se gi' ngodha se gi' buru molae tombu ramo'na. Mon PANGERAN madhateng angen, kabbi pas kerreng eabber akantha darameyan.
[25] Sapa se eanggep ba'na padha ban Allah Se Mahasocce jareya? Epapadha'a ban sapa Salerana bi' ba'na?
[26] Kodda' abas ka langnge', pas tetene! Sapa se nyepta'agi tang-bintang rowa? Allah se ngator tang-bintang jareya epakantha pasukan, Salerana ngagali barampa bannya'na, kabbi eparenge nyama bang-sebang. Tadha' settonga se elang, lantaran rajana kobasana Pangeran!
[27] Daddi Isra'il, arapa ba'na me' aserrowan, akantha GUSTE Allahna ta' ngagali ja' ba'na sossa? Akantha Salerana se ta' parduli ka odhi'na ba'na, ban ta' marduli apa se daddi ha'na ba'na?
[28] Masa' ba'na ta' tao ban ta' ngedhing? PANGERAN reya Allah se langgeng, se nyepta'agi langnge' ban bume. Salerana ta' tao pendhet otaba lesso; tadha' se ngarteya ka panggaliyanna.
[29] Oreng se lesso epakowat, se ta' bisa apa-rapa eparenge samangat.
[30] Ngangodhadan daddi pendhet ban lesso, na'-kana' ngodha labu tatandhung.
[31] Tape oreng se ngandellagi PANGERAN, bakal olleya kakowadan se anyar. Reng-oreng jareya akantha mano' rajabali se ngabber ka tenggina ngangguy kakowadanna kalembangnga. Reng-oreng jareya berka' tape ta' endha' lesso, ajalan tape ta' gellem pendhet.