[1] Sagara beddhi ban tana kerreng bakal gumbira, bang-kembang padha mekkar e ra-ara.
[2] Ra-ara tombu ce' gumbussa, anyanyeyagi gu-lagu se gumbira. Kabagusanna padha ban Gunong Libanon, kaasreyanna akantha Cora Karmel ban Saron. Daddi oreng bakal padha'a nangale kakobasa'anna PANGERAN, ban kaagunganna Allahna sengko' ban ba'na.
[3] Pakowat tanang se lempo, pakoko to'ot se ngetter.
[4] Kabala ka oreng se kene' ate kantha reya, “Pakowat atena, ta' osa tako', Allahna ba'na rabu ngokoma moso, aparenga kasalameddan ka ba'na.”
[5] E bakto jareya oreng buta bakal nangaleyana, ban oreng se kopok bakal ngedhinga.
[6] Oreng empon ca'-lonca'an akantha manjangan, oreng buwi kaperagen sambi asorak. Sabab somber nancel e sagara beddhi, songay agili e ra-ara.
[7] Beddhi se panas bakal daddiya taman, tana kajal daddi somberra aeng. Kennengngan se dha'-adha'na ekennengnge pate' alas, bakal etombuwana galagas ban pandhan.
[8] E jadhiya bakal badha'a lorong raja, nyamana “Lorong se nojju ka kasalameddan”. Oreng dusa ta' kera lebat e jadhiya, oreng budhu ta' kera maposang oreng se lebat.
[9] E kennengngan jareya ta' kera badha macan otaba burun alas laenna. Reng-oreng se epasalamet PANGERAN bakal lebada e lorong jareya.
[10] Reng-oreng se epabebas PANGERAN bakal moleya; reng-oreng jareya bakal maso'a ka Yerusalim sambi asorak, mowana binar polana kasennengngan se langgeng tadha' pegga'na. Reng-oreng jareya bakal peraga ban anga-bunga, kasossa'an ban serrona la elang mosna.