[1] Воннэзӧ, тіянлӧ юӧртам Македонияись вичкуэз йылісь. Еныс козьналіс нылӧ Ассис бурсетӧмсӧ.
[2] Нія эд ёна мырсьӧмӧн, тӧждісьӧмӧн овтӧн гажнысӧ озӧ ӧштӧ. Нія олӧны ӧддьӧн умӧля, асьныс тай уна отсасьӧны.
[3] Ме ачым адззылі: нія отсасьӧны, мымда позьӧ, и нельки унажык.
[4] Нія ӧддьӧн корсисӧ отсасьны Кристослӧн вежа отирлӧ.
[5] Нія керисӧ видзчисьӧмнымся унажык. Нія медодз сетісӧ асьнысӧ Дӧсвидзисьлӧ, а сэсся вӧлись Ен отсӧтӧн и миянлӧ.
[6] Сійӧн мийӧ Титсӧ тшӧктім тіян дынын ештӧтны этӧ бур уджсӧ, кӧдӧ сія пондӧтіс.
[7] Тіян эд быдӧсын тырдоз: ёна веритат, кужат баитны, уна тӧдат, быд вынісь уджалат, миянӧс радейтат. Сідзкӧ, и вежа отирлӧ отсӧтныт ась оз ло надз.
[8] Этадз баитӧмӧ абу тшӧктӧм. Ме тіянлӧ висьтася мӧдіккезлӧн быд вынісь отсасьӧм йылісь, медбы тӧдмавны-видзӧтны, сьӧлӧмсянь я тійӧ радейтат.
[9] Миян Дӧсвидзись Кристос Исуслісь радейтӧмсӧ тійӧ тӧдат. Сылӧн вӧлі быдӧс. Но тіян понда Сія быдӧс колис, медбы Сылӧн быдӧс кольӧмсянь тіян быдӧс вӧлі.
[10] Эстӧн ме велӧта тіянӧс. Велӧтӧмӧсянь буржык лоас тіянлӧ. Тійӧ мӧймусянь ни лӧсьӧтчит керны этӧ, да и пондӧтчит ни.
[11] Ӧні ештӧтӧ сійӧ уджсӧ, кӧдӧ ӧддьӧн мӧдіт керны. Отсӧтсӧ ӧктӧ сы сьӧрті, кинлӧ мымда позьӧ сетны.
[12] Мортыс отсасьӧ сьӧлӧмсянь. Сія сетӧ, мый сылӧн эм, сетӧмсӧ босьтӧны. А мый сылӧн абу, сія оз вермы сетны.
[13] Корам не сійӧн, медбы тіянлӧ вӧлі сьӧкыт, а мӧдіккезлӧ кокнит, но медбы быдӧннытлӧн вӧлі ӧтмымдаӧн.
[14] Ӧні тіян уна, и тійӧ сетат нылӧ. Мӧдпырись нылӧн лоас уна, сэк нія сетасӧ тіянлӧ, тіян оз кӧ ло. Сідз быдӧннытлӧн лоас ӧтмымдаӧн.
[15] Вежа Гижӧтас тай висьталӧм: ─ Кин ӧктіс уна, сылӧн унаӧлыс эз вӧв. Кин ӧктіс етша, сылӧ тырмис.
[16] Ошка Енсӧ, Сія эд Титыслӧ пуктіс сьӧлӧм вылас сідз тӧждісьны тіян понда.
[17] Ме кори сійӧ мунны тіян дынӧ. Сія тай ачыс лӧсьӧтчӧм ни вӧлі мунны, тіян понда тӧждӧ да.
[18] Мийӧ сыкӧт ыстам воннымӧс. Бур Юӧрсӧ нуӧтӧм понда сійӧ быд вичкуын ошкӧны.
[19] Сійӧ бӧрйисӧ вичкуэс миянкӧт ӧтлаын нӧбӧтны ӧктӧм отсӧтсӧ. Тійӧ мӧдіккезлӧ сетат отсӧтсӧ сьӧлӧмсянь. Сійӧ отсӧтсӧ мийӧ ӧктам Дӧсвидзисьсӧ ошкӧм могись.
[20] Вичкуэс эд ӧддьӧн уна сетӧны миян пыр. Сійӧн мийӧ быдӧс керам видзӧтчӧмӧн, медбы некин эз вермы висьтавны умӧльсӧ миян керӧм йылісь.
[21] Мийӧ эд вынсьӧтчам быдӧс керны бура и Дӧсвидзись одзын, и отир одзын.
[22] Ныкӧт мийӧ ыстім и ассиным воннымӧс. Сылісь унаись да уналаын бура керӧмсӧ мийӧ тӧдам. Ӧні сія лӧсьӧтчис керны быдӧс коланасӧ тіян дынын, бура тӧдӧ тіянӧс да.
[23] Мый висьтала Титыс йылісь? Сія менам ёрт, тіянлӧ уджалісь. А мӧд воннэзӧс бӧрйисӧ вичкуэс. Нія содтӧны ошкӧмсӧ Кристосыслӧ.
[24] Сідзкӧ, вичкуэс одзын осьтӧ нылӧ ассиныт радейтӧмнытӧ. Сетӧмныт мыччалас: мийӧ огӧ ошкӧ тіянӧс весись.